Ձեր վստահելի աղբյուրը

Սիրիայի Ժողովրդական ասամբլեայի ազգային հաշտեցման, արաբական և արտաքին հարաբերությունների, ինչպես նաև հանրային ազատությունների ու մարդու իրավունքների հանձնաժողովների անդամները երեքշաբթի օրը հանդիպել են Հայ-սիրիական բարեկամության ասոցիացիայի պատվիրակությանը, որը ղեկավարել է պատգամավոր Տաճատ Վարդապետյանը: Այս մասին հաղորդում է սիրիական ՍԱՆԱ լրատվական գործակալությունը:

Հայաստանից եռօրյա այցելությամբ Սիրիա մեկնած պատվիրակության մեջ եղել են ՀՀ ԱԺ պատգամավորներ, որոնք միևնույն ժամանակ Հայ-սիրիական բարեկամության ասոցիացիայի անդամ են:

Հանդիպման ընթացքում ազգային հաշտեցման հանձնաժողովի ղեկավար Օմար Օսին ասել է, որ հայկական պատվիրակության այցելությունը կօգնի ավելի ամրապնդել երկու եղբայրական երկրների միջև հարաբերությունները` վերահաստատելով, որ սիրիացիները հպարտանում են սիրիահայերով, որոնք Սիրիայի սոցիալական կառուցվածքի անբաժանելի մասն են կազմում:

Հանրային ազատությունների և մարդու իրավունքների հարցերով հանձնաժողովի ղեկավար Բադի Սաքուրն հայտարարել է, որ նրանք, ովքեր թափում էին հայերի արյունը նախկինում, և նրանք, ովքեր ներկայումս թափում են սիրիացիների արյունը, նույնն են: Նա նաև ասել է, որ Հայաստանը և Սիրիան այժմ միասին կանգնած են ազատությունների և մարդասիրության թշնամիների առջև:

Տաճատ Վարդապետյանն իր հերթին ասել է, որ Սիրիան ամեն հայի համար երկրորդ տուն է, և շնորհակալություն է հայտնել այն սիրիացիներին, որոնք սիրով հյուրընկալել են հայերին և դատապարտել են հարյուր տարի առաջ հայերի նկատմամբ Օսմանյան կայսրությունում իրականացված սպանությունները: Հայկական պատվիրակության ղեկավարը նաև ասել է, որ սիրիացիներն առաջիններից էին, ովքեր օգնության ձեռք մեկնեցին հայերին:

Գործակալության փոխանցմամբ` հայկական պատվիրակության անդամները վստահեցրել են, որ Հայաստանը պատրաստ է ակտիվ դեր խաղալ միջազգային հանրության առջև իրական այն փաստերի հրապարակման գործում, որոնք տեղի են ունենում Սիրիայում, և աջակցել սիրիացի ժողովրդին միջազգային հարթակներում` ընդգծելով այն բացասական դերակատարությունը, որը Թուրքիան ունենում սիրիական ճգնաժամում: