Ցուցադրված հնագույն ջութակներից մեկը ամբողջ տարով կտրամադրվի խաչատրյանական մրցույթի դափնեկրի
Արամ Խաչատրյանի անվան 11-րդ միջազգային մրցույթի դափնեկիրներից մեկին Del Gesu հիմնադրամը որպես հատուկ մրցանակ 1 տարի ժամկետով նվագելու իրավունքով կտրամադրի Երևանում հազվագյուտ ջութակների ցուցահանդես ցուցադրված գործիքներից մեկը՝ J.B.Vuillaume-ի 1825թ. ջութակը: Այս մասին տեղեկացնում են «Արամ Խաչատրյան-մրցույթ» մշակութային հիմնադրամից:
«Արամ Խաչատրյան-մրցույթ» մշակութային հիմնադրամի գործադիր տնօրեն Աննա Տեր-Հովակիմյանը նշել է, որ այս ցուցահանդեսը մշակութային մեծ իրադարձություն է, և հանրությունը կարողացել է ծանոթանալ աշխարհահռչակ վարպետների ստեղծած գործիքներին:
Del Gesu հիմնադրամի տնօրեն Ռոբերտ Դիմիտրեսկուն էլ նշել է, որ իրենք ուրախ են լինել Արամ Խաչատրյանի անվան մրցույթի մի մասնիկը:
Արամ Խաչատրյանի անվան 11-րդ միջազգային մրցույթի շրջանակներում մեծ կոմպոզիտորի տուն-թանգարանում հունիսի 7-ին և 8-ին գործել է 18-19-րդ դդ. հազվագյուտ ջութակների ցուցահանդես-վաճառք։ «Արամ Խաչատրյան-մրցույթ» մշակութային հիմնադրամը շվեյցարական Del Gesu հիմնադրամի հետ երկարատև բանակցությունների արդյունքում կարողացել է Երևանում ներկայացնել Անտոնիո Ստրադիվարիուսի, Նիկոլո Գալիանոյի և աշխարհահռչակ այլ վարպետների պատրաստած ջութակները։ Del Gesu հիմնադրամի հավաքածուում առկա է շուրջ 150 գործիք, որոնցից Երևանում ներկայացված են 8-ը:
Del Gesu հիմնադրամը լարային գործիքներ ներկայացնող մասնագիտացված կառույց է, որի հիմնական առաքելությունն է աջակցել առավել խոստումնալից և տաղանդավոր երիտասարդ երաժիշտներին, ովքեր իրենց կարիերայում լավագույն արդյունքի հասնելու համար լավ գործիքի կարիք ունեն։ Հիմնադրամը համագործակցում է մասնավոր կոլեկցիոներների և շնորհալի երիտասարդ արվեստագետների հետ՝ օգնելով կազմակերպել փոխշահավետ գործակցություն վերջիններիս միջև: Հիմնադրամում համոզված են, որ լավ գործիքի արժեքն էլ ավելի է մեծանում, երբ այն հնչում է բարձրակարգ երաժշտի ձեռքում։ Իսկ երիտասարդ տաղանդներն էլ միշտ մեկենասների կարիք ունեն:
Նախորդող հրապարակումներ՝
Երևանում ներկայացվեցին Ստրադիվարիուսի, Գալիանոյի և այլ վարպետների հնագույն ջութակները (լուսանկարներ)
«Աշխատել ենք համեստ, բայց հասել ենք հաջողության». Արմեն Սմբատյանը Արամ Խաչատրյանի անվան միջազգային մրցույթի մասին
Լրահոս
Տեսանյութեր
Իմ կարծիքով, շատ տգեղ բան եք անում. Եղոյանը՝ Լուսինե Հակոբյանին
