Ձեր վստահելի աղբյուրը

ՀՀ վարչապետ Հովիկ Աբրահամյանն այսօր խորհրդարանում լրագրողների հետ զրույցում անդրադառնալով էլեկտրաէներգիայի սակագնի թանկացմանը՝ հաստատեց, որ թանկացում լինելու է, բայց ոչ թե 17 դրամով, այլ՝ 6, 93 դրամով:

«Հիմա հաշվարկում ենք տնտեսության վրա և բնակչության վրա, մենք նաև փորձելու ենք մեր նպաստառուներին աջակցել, օգնել, որպեսզի իրենք այդ բեռը չզգան: Ամեն դեպքում, հիմա հաշվարկներ են կատարվում համապատասխան նախարարությունների կողմից, կներկայացվի: Ուղղակի թող հանձնաժողովը հաստատի, և մենք դրա հետևանքների մասին բարձրաձայն խոսելու ենք»,- ասաց վարչապետը:

Նա հիշեցրեց, որ հունիսի 12-ին ԱԺ-ում լսումներ կանցկացվեն հարցի վերաբերյալ, նախարարությունները կներկայանան և բացատրություն կտան հանրությանը. «Մենք լինելու ենք թափանցիկ, շատ բաց, որպեսզի հանրությանը բացատրենք այն, ինչ տեղի է ունենալու: Բոլոր մեր պատկան մարմինները օրենքի կետը պաշտպանելու են, և որևէ խնդիր ես չեմ կարծում, որ լինի: Խոսում են մեքենաների մասին և այլն, որևէ նման բաղադրիչ չի ընդունվելու: Դա հանձնաժողովն արդեն հայտարարել է, ես կարծում եմ, կառավարությունը հետամուտ կլինի»:

Հարցին, թե Էներգետիկայի և բնական պաշարների նախարար Երվանդ Զախարյանը հայտարարում է, թե ոլորտում գողություն է եղել, արդյոք տարօրինակ չէ, որ գողություն կա, բայց պատժվողներ չկան, Հովիկ Աբրահամյանն ասաց, որ ինքը չի լսել, որ Զախարյանն ասել է գողություն:

«Ասել է բացթողումներ, ամեն դեպքում ես հետամուտ կլինեմ, կհասկանամ ինչի մասին է խոսքը: Եվ եթե կա նման բան, ուրեմն պետք է դիմել պատկան մարմիններին, ովքեր որ պետք է զբաղվեն այդ գործով»,- նշեց վարչապետը:

Հարցին, թե միգուցե ինքը լինի առաջին պաշտոնյան, ով ՀԷՑ-ի գործողությունների վերաբերյալ կդիմի իրավապահ մարմիններին, Հ.Աբրահամյանը պատասխանեց, որ ինքը կոնկրետ որևէ փաստ չունի, որ ունենա, անպայման կդիմի:

Դիտարկմանը, թե միայն նպաստառուներին օգնելով հարցը լուծում չի ստանում, քանի որ հասարակ ժողովուրդն էլ մի լավ օրի չի, չեն բարձրացվում աշխատավարձերը, իսկ տնտեսության վիճակը գնալով վատանում է, Հովիկ Աբրահամյանը պատասխանեց.

«Դե դուք ինչի՞ եք էդքան վատ տրամադրված, որ գնալով վիճակը չի լավանում: Գնալով վիճակը, մենք պետք է այնպես անենք, որ լավանա, և մենք այդ գործին ենք լծված: Եվ ձեզ մի քանի անգամ ասել եմ և ևս մեկ անգամ ուզում եմ հատուկ ձեզ համար ասեմ, որ մենք երկրորդ կիսամյակում ունենք բազմաթիվ ծրագրեր, որոնք իրականացնելու ենք, և դա բերելու է տնտեսության ակտիվացմանը: Իսկ դա կխթանի նաև բարեկեցությունը մեր ժողովրդի, ամեն դեպքում մենք կառավարությունով լծված ենք այդ գործընթացներին»,- ասաց նա՝ հավելելով, որ անպայման տնտեսական աճ է սպասվում այս տարի: