Ձեր վստահելի աղբյուրը

Էրդողանի գլխավորած կուսակցությունը դե ֆակտո հաղթեց Թուրքիայի խորհրդարանական ընտրություններում, սակայն միևնույն ժամանակ պարտվեց, քանի որ չկարողացավ լուծել իր առջև դրված ոչ պլան մինիմումը, ոչ պլան մաքսիմումը,- լրագրողների հետ հանդիպմանը նման դիտարկում արեց ԵՊՀ Արևելագիտւոթյան ամբիոնի փոխդեկան, թուրքագետ Ռուբեն Մելքոնյանը:

«Պլան մինիմումը՝ ստանալ 216 մանդատ և ձևավորել միանձնյա կառավարություն, մաքսիմումը՝ ստանալ 330 մանդատ և հիմք ունենալ իրականացնելու նախագահական լիազորությունների ուժեղացմանը միտված սահմանադրական փոփոխություններ»,-նշեց թուրքագետը:

Նա ընդգծեց, որ Էրդողանի կուսակցությունը չնայած որ լիդեր է, բայց կանգնած է լուրջ ճգնաժամի առջև, քանի որ ըստ կանխատեսվող սցենարների՝ կամ պետք է ստիպված գնալ կոալիցիայի, կամ ձևավորել փոքրամասնության կառավարություն:

Անդրադառնալով Թուրքիայում խորհրդարանական ընտրություններում ներկայացված հայ թեկնածուներին՝ Ռ. Մելքոնյանը հայտնեց, որ թուրքական խորհրդարանում կլինի երեք հայ պատգամավոր. «Մարկար Եսայանը, ով Թուրքիայում բավականին հայտնի լրագրող է, ընտրված է իշխող կուսակցությունից: Նա միշտ եղել է իշխանամետ լրագրող, միևնույն ժամանակ նա ծանոթ է հայկական և հայ համայնքի խնդիրներին, բայց նա հայ համայնքի թեկնածուն չէ»:

Ռ. Մելքոնյանի կարծիքով, ավելի շատ Մարկար Եսայանի ազգանունն օգտագործելու է իշխանությունը՝ իր տոլեռանտությունը ապացուցելու համար:

Նա հայտնեց, որ մյուս երկու թեկնածուներից տիկին Տոհանը նույնպես հայ համայնքի թեկնածուն չէ և նրանից էլ լուրջ ակնկալիքներ պետք չէ ունենալ:

«Երրորդ թեկնածուն՝ Կարո Փայլանը, ով ներկայացնում է «ժողովրդների ժողովրդավարություն» կուսակցությունը, Թուրքիայի հայ համայնքի ներկայացուցիչներից է: Վստահորեն կարող եմ ասել, որ հայ համայնքի խնդիրներին խորագիտակ է»,-ասաց թուրքագետը:

Ըստ նրա՝ այս թեկնածուն միշտ բարձրացնում է հայկական ինքնության պահպանման հարցը:

Մելքոնյանը տեղեկացրեց նաև, որ Կարո Փալյանն այն մարդն է, ով գլխավորում է նախաձեռնությունը, որը կոչ է անում Թուրքիայում անցկացնել Պոլսո հայոց պատրիարքի ընտրություն և սատարում է Հայաստանցի թեկնածուին՝ Գուգարաց թեմի առաջնորդ Սեպուհ Սրբազանին:

Ամփոփելով ասուլիսը՝ թուրքագետը նշեց, որ 55 տարի Թուրքիայի խորհրդարանում հայ թեկնածու չի եղել, և որ Թուրքիայի խորհրդարանում հայկական թեման ակտիվանալու է: