Ձեր վստահելի աղբյուրը

Գործադիրն այսօրվա նիստում հավանության արժանացրեց «Արտոնագրային վճարների մասին» ՀՀ օրենքում փոփոխություններ կատարելու մասին օրենքի նախագիծը, որով արտոնագրային վճարների նոր դրույքաչափեր են սահմանվելու թանկարժեք մետաղների առևտրով զբաղվողների համար: Կառավարության որոշումը համարվեց անհետաձգելի, և առաջարկվեց նախագիծը հրատապ ներկայացել ՀՀ ազգային ժողովի քննարկմանը:

Վարչապետ Հովիկ Աբրահամյանի խոսքերով՝ օրենքի փոփոխությունը միտված է ոսկեգործությանը օժանդակելուն:'

«Սա մի ոլորտ է, որ պետք է լինի հատուկ մոտեցում։ Պարզ է, որ եթե մենք շրջանառության հարկի տեսանկյունից դիտարկենք, ապա թուղթ ձեռքբերելու հնարավորությունը, կարծես, զրո է, ու այդ ոլորտը կընկներ 5 տոկոս հարկման տակ։ Մենք սահմանել ենք ու տալիս ենք հնարավորություն ոլորտը զարգացնելու համար»,- ասաց վարչապետը:

Կառավարության նիստին հաջորդած ասուլիսում ՀՀ էկոնոմիկայի փոխանախարար Էմիլ Տարասյանը ներկայացնելով նախագիծը, նշեց, որ օրենքի փոփոխության համար հիմք են հանդիսացել «Շրջանառության մասին» օրենքում կատարված փոփոխությունները, որի համաձայն` շրջանառության հարկի հաշվարկման նոր մեխանիզմ էր սահմանվել։ Մասնավորապես, հանվել է փաստաթղթավորման պարտադիր պահանջը, բայց թանկարժեք մետաղների և քարերի առևտրով զբաղվող տնտեսավարողների շրջանում շարունակվեց բողոքների ալիքը:

«Դժգոհությունը պայմանավորված է եղել գործունեության առանձնահատկությամբ, մասնավորապես հաշվի առնելով վաճառվող ապրանքի` թանկարժեք մետաղի ու դրանցից պատրաստված իրերի բարձր ինքնարժեքը, միաժամանակ վաճառքի ցածր գումարը, փաստաթղթերի ներկայացման սահմանափակ հնարավորությունները»,- ասաց փոխնախարարը՝ հավելելով, որ այսպիսով որոշում է կայացվել առանձնահատուկ դրսևորել թանկարժեք մետաղների և քարերի առևտրով զբաղվող տնտեսվարողների նկատմամբ:

Է. Տարասյանը նշեց, որ օրենքի նախագծի համաձայն` առաջարկվում է մինչև 115 մլն դրամ իրացման շրջանառություն ունեցող ընկերությունների համար սահմանել արտոնագրային վճար, իսկ եթե սպառման ծավալներն ավելանան, ապա տնտեսվարող սուբյեկտը կանցնի ընդհանուր հարկման դաշտ և կհարկվի ԱԱՀ-ով:

Այսպիսով, «Արտոնագրային վճարների մասին» օրենքով ներկայացվում է հարկման սխեմա, որը Երևանի համար սահմանում է 35 հազար դրամ մինչև 0.7 գծամետր տարածքի համար, եթե լրացուցիչ ավելացվի սեղանիկի չափը, ապա յուրաքանչյուր 0.1 գծամետրի համար Երևանում աշխատող սուբյեկտից կգանձվի 5 հազար դրամ:

Մարզկենտրոններում 0.7 գծամետրի համար՝ 25 հազար և 3000 դրամ յուրաքանչյուր 0.1 գծամետրի համար։ Այլ քաղաքներում՝ 20 հազար դրամ և 2500 դրամ յուրաքանչյուր 0.1 գծամետրի համար։ Այլ վայրերում սահմանվում է 15 հազար դրամ և 2000 դրամ յուրաքանչյուր 0.1 գծամետրի համար։

Է. Տարասյանը հայտնեց, որ սահմանամերձ շրջաններում արտոնագրային վճարը սահմանվում է 0 դրամ։