Ձեր վստահելի աղբյուրը

Ազգային ժողովի Դաշնակցություն խմբակցության անդամ Արծվիկ Մինասյանի հեղինակած «Հանրաքվեի մասին» օրենքում փոփոխություններ ու լրացումներ կատարելու մասին նախագիծն այսօր Ազգային ժողովում ընդունվեց բուռն իրարանցման պայմաններում: Օրինագծին կողմ քվեարկեց 74 պատգամավոր, դեմ էին` 11-ը, իսկ ձեռնպահ` 20-ը:

Մինչև քվեարկությունը օրինագծի վերաբերյալ խմբակցությունների ներկայացուցիչները հայտնեցին իրենց դիրքորոշումը, ինչի ընթացքում մեծ իրարանցում առաջացավ նիստերի դահլիճում:

ԱԺ «Բարգավաճ Հայաստան» խմբակցության ղեկավար Նաիրա Զոհրաբյանը հայտարարեց, որ իրենք ձեռնպահ են քվեարկելու` քանի որ իրենց առաջարկությունները չեն ընդունվել և հաշվի են առնում այն, որ առաջարկվող օրինագիծը նախորդի համեմատ առաջընթաց է ապահովելու:

«Օրինաց երկիր» խմբակցության ղեկավար Հեղինե Բիշարյանը հիշեցրեց երեկվա ելույթը, հայտարարեց, որ իրենք առաջարկություններ են ներկայացրել, թեպետ հեղինակը պնդում էր, որ Օրինաց երկիր խմբակցությունը առաջարկներ չի ներկայացրել:

«Մենք առաջարկում ենք հետաձգել այս նախագիծը, եթե ոչ, մենք դեմ կքվեարկենք և խորհուրդ կտամ իմ ընկերներին ուշադիր լսել հետո անցնել կոռեկտության սահմանները»,- հայտարարեց Բիշարյանը` ակնարկելով պատգամավոր Արծվիկ Մինասյանին, որը երեկվա նիստում Բիշարյանին անվանել էր «չհասկացող»:

Դարձյալ քվեարկությունից առաջ ԱԺ ՀԱԿ խմբակցության ղեկավար Լևոն Զուրաբյանը հայտարարեց, որ 4 խմբակցության կողմից ներկայացրած առաջարկությունները չընդունելով Հայաստանում կկայանա «ևս մեկ ոչ լեգիտիմ հանրաքվե»:

«Այդ հանրաքվեն հենց այսօրվանից կարելի է ոչ լեգիտիմ համարել, բայց մենք, միևնույնն է, մարտահրավերն ընդունում ենք և ամեն ինչ կանենք, որ այդ հանրաքվեն վերածենք Սերժ Սարգսյանի ռեժիմին անվստահություն հայտնելու հանրաքվեի»,-հայտարարեց Զուրաբյանը:

Օրինագծի հեղինակ Արծվիկ Մինասյանը ստիպված եղավ բացատրել, որ ներկայացված 13 առաջարկություններից 8-ն ընդունվել են, մյուս հինգ առաջարկությունները առաջարկվել է քննարկել ընտրական համակարգի փոփոխությունների համատեքստում:

«Մենք ոչ թե մերժել ենք, կամ չենք ընդունել, այլ հակառակը, ասել ենք համընդհանուր քննարկման առարկա դարձնենք»,-հավելեց պատգամավորը:

Պատգամավորների շրջանում բարձրացված աղմուկն այնքան մեծ էր, որ նիստը վարող ԱԺ նախագահ Գալուստ Սահակյանը խնդրեց «վերջացնել պատերազմը»:

«Իմիջիայլոց, սա առաջին դեպքն է. միշտ ընդդիմություն-իշխանությունն են կռվել, էսօր ընդդիմությունն է կռվում ընդդիմության հետ: Գործ չունեք իրար հետ, եկեք, մեզ հետ կռվեք», -դիմելով պատգամավորներին, հայտարարեց ԱԺ նախագահը:

Նրա այս հորդորն ընդունվեց ծափահարություններով:

Հարակից հրապարակումներ`
«Սուտասանը դուք եք». Արծվիկ Մինասյանը ցավում է Լևոն Զուրաբյանի համար
Հանրապետականը և ՀՅԴ-ն դաշնակցել են Սահամանադրական փոփոխությունների «այո»-ն կեղծելու գործում. Լևոն Զուրաբյան
Պետք չէ Վենետիկի հանձնաժողովը դարձնել սուրբ կով. Նաիրա Զոհրաբյանը` Արծվիկ Մինասյանին
Հանրապետականը և ՀՅԴ-ն դաշնակցել են Սահամանադրական փոփոխությունների «այո»-ն կեղծելու գործում. Լևոն Զուրաբյան