Ձեր վստահելի աղբյուրը

Այսօր Երևանի «Հանրապետական» մարզադաշտի մամուլի ասուլիսների սրահում Պորտուգալիայի ազգային հավաքականի գլխավոր մարզիչ Ֆերնանդու Սանթուշը հանդիպեց լրատվամիջոցների ներկայացուցիչների հետ: Նա հայտարարեց, որ Հայաստանի հավաքականը պաշտպանական խաղ է ցուցադրում, ինչը խնդիրներ է ստեղծում հարձակվող թիմի համար, սակայն իրենք Երևան են ժամանել միայն հաղթանակ տոնելու համար:

«Չնայած Հայաստանի հավաքականը Պորտուգալիայում դժվարություններ ստեղծեց մեզ համար, մենք այստեղ ենք, որպեսզի հաղթենք: Գիտենք, որ դժվարություններ կունենանք, սակայն պատրաստ ենք դրանց: Այս խաղին նախապատրաստվեցինք Վրաստանում՝ ժամային գոտուն ու կլիմայական պայմաններին հարմարվելու համար: Նույն հաջողությամբ կարող էինք մարզվել Հայաստանում, եթե մեր մրցակիցը լիներ Վրաստանի հավաքականը: Կլիմայական պայմաններին հարմարվելը կօգնի հաղթահարել հոգեբանական խնդիրները:

Հայաստանի հավաքականն իր ակտիվում մեկ միավոր ունի և ի վիճակի է նոր միավոր վաստակել մեզ հետ խաղում: Բայց մեր նպատակը այլ է՝ հայաստանյան ընտրանու հետ նախորդ չորս խաղում միշտ խնդիրներ ենք ունեցել և նույնիսկ չենք հաղթել Երևանում: Դա նշանակում է, որ հայ ֆուտբոլիստները նույնպես հաղթելու հնարավորություն ունեն: Բայց ես լիակատար հանգիստ եմ, որովհետև համոզված եմ, որ վաղը մենք անպայման կհաղթենք: Թիմում փոփոխություններ չենք նախատեսում, բայց եթե հանդիպման ընթացքում խնդիրներ առաջանան, միշտ պատրաստ ենք արձագանքել և համապատասխան փոփոխություններ կատարել»,-հայտարարեց Ֆ. Սանթուշը:

Վաղը Երևանում +35 աստիճան է սպասվում: Պորտուգալիայի հավաքականի գլխավոր մարզիչը վստահ է, որ այդ հանգամանքը դաշտի տերերին ոչ մի առավելություն չի տա:

Մամուլի ասուլիսն ներկա էր նաև Պորտուգալիայի հավաքականի ֆուտբոլիստ Տիագուն: Նա նշեց, որ Հայաստան են ժամանել երեք միավոր վաստակելու համար և ուրախ կլինեն դա անել, որովհետև այստեղ անցյալում երբեք չեն հաղթել: