Ձեր վստահելի աղբյուրը

Ամեն անգամ, երբ զինվորական մեքենա է շրջվում, պարզ հարց է առաջանում, ինչո˚ւ նման բան տեղի ունեցավ, ովքե˚ր են մեղավոր, ի˚նչ հետևություններ են արվել: Panorama.am-ի այս ու այլ հարցերին գրավոր պատասխանել է ԶՈՒ Անձնակազմի հետ տարվող աշխատանքների վարչության պետի ՊԺԿ, գնդապետ Ա. Սարգսյանը:

-Տպավորություն է, որ վերջին տարիներին զինվորական մեքենաների՝ շրջվելու դեպքերն ավելացել են: Վերջին երեք տարիների՝ 2013 թ., 2014 թ., 2015 թ. մինչ օրս տարեկան կտրվածքով քանի՞ նման դեպք է գրանցվել, դրանց հետևանքով քանի զինծառայող է մահացել:

-ՀՀ ԶՈՒ զորամասերին պատկանող ավտոտեխնիկայի վթարման դեպքերի կամ ճանապարհատրանսպորտային այլ պատահարների վիճակագրությունը ըստ նշված տարիների հետևյալն է / թվաքանակում ներառված չեն ԼՂՀ ՊԲ-ում տեղի ունեցած դեպքերը/.
2013թ.՝ 12 դեպք, մահացել է 1 զինծառայող,
2014թ.՝ 10 դեպք, մահացել է 1 զինծառայող,
2015թ.՝ 4 դեպք, մահացել է 1 զինծառայող:
Նախորդ տարիներին ավելի շատ դեպքեր են եղել: Վիճակագրական տվյալները փաստում են, որ լրագրողի «տպավորությունը»չի արտահայտում օբյեկտիվ իրողությունը:

-Յուրաքանչյուր դեպքի առթիվ հարուցվել է քրեական գործ: Ի՞նչ է ցույց տվել քննությունը: Ո՞րն է նման դեպքերի պատճառը՝ մեքենաների հնամա՞շ, անսա՞րք լինելը, վարորդի անփութությո՞ւնը, թե՞…

- Վերոգրյալ դեպքերի առնչությամբ հարուցված քրեական գործերի ընթացքի վերաբերյալ ՀՀ ԶՈՒ ԱՀՏԱ վարչությունում համապատասխան տեղեկատվություն առկա չէ, դրանք հարկավոր է ստանալ համապատասխան կառույցից:

-Ովքե՞ր են պատասխանատվության ենթարկվել:

-ՀՀ ԶՈՒ զորամասերին պատկանող ավտոտեխնիկայի վթարման մահվան ելքով դեպքերի առնչությամբ անցկացված ծառայողական քննությունների արդյունքներով արձակված ՀՀ պաշտպանության նախարարի, ՀՀ ԶՈՒ ԳՇ պետի հրամաններով կարգապահական պատասխանատվության են ենթարկվել ներքոհիշյալ զինծառայողները.
2013թ.՝ զորամիավորման հրամանատարի՝ սպառազինության գծով տեղակալ, գնդապետ Հ. Բ., զորամիավորման ավտոմոբիլային ծառայության պետ, փոխգնդապետ Ա. Բ., զորամասի հրամանատարի տեղակալ-շտաբի պետ, փոխգնդապետ Կ.Ս., զորամասի հրամանատարի՝ թիկունքի և ԿՇ գծով տեղակալ, փոխգնդապետ Ա.Փ., զորամասի հրամանատարի՝ սպառազինության գծով տեղակալ, փոխգնդապետ Ա.Ա., զորամասի վաշտի հրամանատար, կապիտան Հ.Ս., զորամասի ավտոմոբիլային ծառայության պետ, կապիտան Ա.Օ.,
2014թ.՝ զորամիավորման հրետանու շտաբի պետ, փոխգնդապետ Ա.Բ., զորամասի հրթիռահրետանային սպառազինության ծառայության պետ, մայոր Ա.Մ., ականանետային դիվիզիոնի հրամանատար, փոխգնդապետ Խ.Մ., դասակի հրամանատար, լեյտենանտ Ա.Հ.,
2015թ.՝ զորամիավորման հրամանատարի՝ հրետանու գծով տեղակալ, գնդապետ Դ.Հ., զորամիավորման ավտոմոբիլային ծառայության պետ, փոխգնդապետ Մ.Խ., զորամասի հրամանատարի՝ սպառազինության գծով տեղակալ, փոխգնդապետ Ս.Ջ., զորամասի հրետանու պետ, փոխգնդապետ Հ.Ք., դիվիզիոնի հրամանատար, փոխգնդապետ Ս.Ս., զորամասի ավտոմոբիլային ծառայության պետ, մայոր Ա.Մ.:
Նրանց հիմնական մասը ստացել է կարգապահական պատիժներ, սակայն կան նաև բանակից զորացրված սպաներ:

- Ի՞նչ հետևություններ են արվել:

-Իրականացված հետևողական աշխատանքների արդյունքում ՀՀ զինված ուժերում նվազել են տարաբնույթ ճանապարհատրանսպորտային պատահարների և դրանց հետևանքով տուժած զինծառայողների թվաքանակը: Արձանագրված դրական միտումը պահպանելու համար վերադաս հրամանատարության կողմից ՀՀ ԶՈՒ, ԶՈՒ վարչությունների, առանձին բաժինների պետերին, զորամիավորումների, զորամասերի հրամանատարներին հանձնա-րարվել է վերը նշված դեպքերը լայնորեն քննարկել անձնակազմի շրջանում, պարզաբանել դրանց պատճառահետևանքային կապերը, կրկնությունը բացառելու նպատակով ձեռնարկել գործուն կանխարգելիչ միջոցներ, անցկացվել են ճանապարհային երթևեկության կանոնների պահպանման և երթևեկության անվտանգության ապահովման նպատակով լրացուցիչ հրահանգավորումներ, խստացվել Է ավտոտեխնիկայի տեխնիկական վիճակի հսկողությունը, ինչպես նաև ՌՈ ԶԱՏ կողմից պարբերաբար ստուգումներ են իրականացվում զինտեխնիկայի ճանապարհային երթևեկության նկատմամբ: