Ձեր վստահելի աղբյուրը

Երևանի Բյուրատի անվան թիվ 125 դպրոցում ֆիզկուլտուրայի ուսուցչի` դասի ժամին երեխային հարվածելու մասին Panorama.am-ի հրապարակումը բուռն քննարկման թեմա էր դարձել. շատերը դասատուին մեղադրում էին, թե ինչու է երեխայի նկատմամբ նման արարք դրսևորել և ավելին, պնդում էին, թե նա տեղ չունի դպրոցում:

Հիշեցնենք` 30-ամյա Լևոն Գևորգյանին մեղադրանք է առաջադրվել, քանի որ նա մարտի 30-ին Ս. Բյուրատի անվան թիվ 125 հիմնական դպրոցի մարզադահլիճում, համապատասխան համազգեստով դասին չներկայանալու համար 7բ դասարանի աշակերտներ Հայկ Գ.-ին, Դավիթ Ա.-ին և Հենրիկ Ս.-ին հրահանգել է մարզադահլիճի մուտքից դեպի աջ ընկած հատվածում գետնի վրա հենում պառկած դիրք ընդունել:

Ըստ մեղադրանքի, Հայկ Գ.-ն չի կարողացել նրա ասած դիրքով մնալ և ոտքերի ծնկների հատվածը դրել է գետնին, ինչի համար Լ. Գևորգյանը մոտեցել է երեխային և բռունցքով հարվածել նրա աջ ուսագոտու հետին մակերեսին: Հարվածի հետևանքով Հայկ Գ.-ն մարմնական վնասվածք է ստացել: Գևորգյանին մեղադրանքն առաջադրվել է ՀՀ Քրեական օրենսգրքի 118 հոդվածի հատկանիշներով` ծեծը: Նա նախկինում դատված է և նրա նկատմամբ որպես խափանման միջոց կիրառվել է ստորագրություն չհեռանալու մասին:

Դատարանում հայտնված ուսուցիչը` Լևոն Գևորգյանը, սակայն, չի ընդունում իր նկատմամբ առաջադրված մեղադրանքը և զրպարտություն է համարում այն:

«Մեղադրանքում նշված ոչ մի կետի հետ համաձայն չեմ: Ընդհանրապես, կատարվածը կապ չուներ համազգեստի հետ ու ոչ մի հարված էլ չի եղել», -Panorama.am-ի թղթակցի հետ զրույցում ասաց ուսուցիչը:

Գևորգյանն ասաց, որ փաստաբան չունի, կարիք էլ չունի արդարանալու:

«Ծնողը չի բողոքել, երեխայի մորաքույրն է բողոքել, բայց բողոքը հետ են վերցրել: Ամբողջը զրպարտություն է, սկզբից մինչև վերջ` սուտ, հավանաբար իմ անձի դեմ է ուղղված ու դպրոցի հետ կապ չունի»,-ասաց Գևորգյանը` ընդգծելով, որ դատարանում կներկայացնի իր ցուցմունքները:

Ինչ վերաբերում է նախկինում դատված և դատվածությունը մարած լինելուն, Գևորգյանը չցանկացավ ասել, թե ինչի համար է դատված եղել և նկատեց. «Էդ անցյալում էր, անչափահաս ժամանակ պատմության մեջ եմ ընկել, 13 տարեկան էի»:

Կրթության փորձագետ Անահիտ Բախշյանի կարծիքով, կապ չունի, թե անձն ինչի համար է դատված եղել, նա դպրոցում, երեխաների հետ շփվելու իրավունք չունի:

«Դատվածություն ունեցող անձը, որպես մանկավարժ, իրավունք չունի աշխատել, իմ կարծիքով, դատապարտված մարդը երեխայի հետ շփվել չի կարող», -Panorama.am-ի թղթակցի հետ զրույցում ասաց կրթության փորձագետը:

Նշենք, որ Կրթության և հանրակրթության մասին ՀՀ օրենքները չեն արգելում դատվածություն ունեցած և այն մարած անձանց աշխատել դպրոցում: Բայց, ըստ Բախշյանի, այդ հանգամանքին պետք է մոտենալ բարոյական տեսանկյունից:

Մեր հարցին, թե արդյոք խտրականության դրսևորում չէ՞ Բախշյանի դիրքորոշումը, նա պատասխանեց. «Իհարկե, խտրականություն դնում եմ, էն էլ ոնց եմ դնում, հենց խտրականություն եմ դնում դատված և չդատված մարդու միջև: Ընդհանրապես, մեր երկրում դատվածություն ունեցող մարդը հագելի մարդ է, նրա իրավունքները նույնպես պետք է պաշտպանվեն, բայց մանկավարժության ոլորտում, չեմ կարծում, որ նա կարող է աշխատել: Մարդ կա, որ ինչ-որ փաստաթղթեր կեղծելու համար դատված է եղել ու հիմա որպես տնօրեն է աշխատում»:

Բախշյանի խոսքով, նման դեպքերը վերջերս հաճախակի են դարձել և որոշ ժամանակ առաջ իրենց հետևողականության արդյունքում Արարատի մարզպետի հրամանով, մի դպրոցի տնօրեն ազատվել է աշխատանքից:

«Ես գիտեմ դեպք, որ դպրոցի տնօրենը քրեական հանցագործություն էր արել, այսինքն` կրթության համար տրված պետական բյուջեի գումարները լափել էր դատվեց, դատվածությունը շուտով` հունիսի վերջին կմարվի ու ինքը երազում է շարունակել աշխատել դպրոցի տնօրեն: Բա դա բարոյակա՞ն է, բա դրանց կարելի՞ է դպրոց թողնել», -հավելեց Բախշյանը` նկատելով, որ անհրաժեշտ է օրենսդրության մեջ այնպիսի փոփոխություն անել, որ մանկավարժական գործունեության ժամանակ դատապարտված անձինք այլևս մանկավարժության ոլորտում իրավունք չունենան աշխատել:

Նախորդ հրապարակում`
Թիվ 125 դպրոցի ուսուցիչը հայտնվել է դատարանում` աշակերտին հարվածելու համար