Ձեր վստահելի աղբյուրը

Հայ դպրոցականները չեն մասնակցի Բաքվում կայանալիք Քիմիայի 47-րդ միջազգային օլիմպիադային ՀՀ-ն՝ ի դեմս ՀՀ կրթության և գիտության նախարարության, ելնելով երեխաների անվտանգության նկատառումներից՝ ստիպված է հրաժարվել հայ դպրոցականների Բաքու մեկնելու որոշումից: Այս մասին այսօր լրագրողների հետ հանդիպմանն ասաց ՀՀ ԿԳ նախարար Արմեն Աշոտյանն՝ ընդգծելով, որ պաշտոնական Բաքուն մինչև միջազգային օլիմպիադային մասնակցելու համար գրանցման համար սահմանված ժամկետը` հունիսի 15-ը, այդպես էլ համապատասխան քաղաքական կամք չդրսևորեց, և հայ դպրոցականնների օլիմպիական թիմը անվտանգության պետական երաշխիքներ չստացավ:

Նախարար Աշոտյանը չբացառեց, որ Ադրբեջանի նման պահվածքի պատճառ է հանդիսացել նաև Բաքվում մեր մարզիկների լավ դրսևորումը. «Ես պետք է դիմեմ միջազգային կազմակերպություններին՝ այս խնդրի առնչությամբ: Սա անմարդկային է, ինչպես կարելի է չապահովել երեխաների անվտանգությունը»:

Ներկայացնում ենք ԿԳ նախարարության հայտարարությունն ամբողջությամբ. «Հայաստանի Հանրապետությունը, կարևորելով աշակերտների մասնակցությունը միջազգային առարկայական օլիմպիադաներին, պատրաստակամություն էր հայտնել մասնակցել հուլիսի 20-29-ը Բաքվում կայանալիք՝ Քիմիայի 47-րդ միջազգային օլիմպիադային: Հայկական կողմը լայնածավալ աշխատանքներ էր իրականացրել ազգային հավաքականի նախապատրաստման և գիտելիքի միջազգային ստուգատեսին հայ աշակերտների՝ հավուր պատշաճի ներկայանալու ուղղությամբ: Ավելին՝ հայտարարվել էր, որ Հայաստանի ազգային հավաքականին Բաքու կուղեկցի ՀՀ կրթության և գիտության նախարար Արմեն Աշոտյանը:

Հայաստանի մասնակցության որոշման իրականացումը հնարավոր էր միայն Ադրբեջանի Հանրապետության կողմից հայկական պատվիրակությանը պետական մակարդակով անվտանգության երաշխիքների տրամադրումից հետո, սակայն պաշտոնական Բաքուն մինչև միջազգային օլիմպիադային մասնակցելու համար գրանցման սահմանված ժամկետը (հունիսի 15-ը) այդպես էլ համապատասխան քաղաքական կամք չդրսևորեց, և հայ դպրոցականների օլիմպիական թիմը անվտանգության պետական երաշխիքներ չստացավ:

Հետևաբար, Հայաստանի Հանրապետությունը՝ ի դեմս ՀՀ կրթության և գիտության նախարարության, ելնելով երեխաների անվտանգության նկատառումներից` ստիպված է հրաժարվել հայ դպրոցականների Բաքու մեկնելու որոշումից:
Միաժամանակ հայկական կողմը արձանագրում է, որ Ադրբեջանի իշխանությունը շարունակում է.
ա/ ջանքեր չխնայել՝ Հայաստանը միջազգային գործընթացներից մեկուսացնելու համար,
բ/ անտեսել միջազգային հանրության կարծիքը,
գ/տասնամյակներ ձգվող տնտեսական շրջափակումը և քաղաքական հակասությունները տարածել նաև հումանիտար ոլորտում,
դ/մերժողական դիրքորոշում ցուցաբերել հայկական կողմի կառուցողական նախաձեռնություններին:
ՀՀ կրթության և գիտության նախարարությունը խիստ դատապարտում է Ադրբեջանի իշխանությունների նման գործելաոճը և միջազգային պատկան մարմինների ուշադրությունն է հրավիրում այս խնդրին` միաժամանակ կոչ անելով միջազգային կազմակերպություններին` հիմք ընդունելով նման դրսևորումները` գիտակրթական միջազգային միջոցառումներ, որոնց պետք է մասնակցեն նաև Հայաստանի պատվիրակությունները, Բաքվում այլևս չկազմակերպել»:

Ավելի վաղ ԿԳՆ-ից հայտարարել էին, հաշվի առնելով օլիմպիադաներին մասնակցելու կարևորությունը հայ աշակերտների համար՝ որոշում է կայացվել, որ ՀՀ ազգային օլիմպիական թիմը կմասնակցի հուլիսի 20-29-ը Բաքվում կայանալիք Քիմիայի 47-րդ միջազգային օլիմպիադային: Հայկական օլիմպիական հավաքականին Բաքու կուղեկցի ՀՀ կրթության և գիտության նախարար Արմեն Աշոտյանը: ՀՀ մասնակցության հարցը վերջնականապես կորոշվի Ադրբեջանի Հանրապետության կողմից հայկական պատվիրակությանն անվտանգության համապատասխան երաշխիքների տրամադրումից հետո: