Ավիացիայի խնդիրները ԱԺ-ում (տեսանյութ)
ՀՀ Ազգային ժողովում քննարկվում է «Ավիացիայի մասին» օրենքում փոփոխություն կատարելու մասին նախագիծը:
Հիմնական զեկուցող ՀՀ էկոնոմիկայի նախարար Կարեն Ճշմարիտյանը նշեց, որ նախագծի մշակումը պայմանավորված է 2013թ-ի հոկտեմբերի 23-ին ՀՀ կառավարության կողմից ընդունված Բաց երկնքի քաղաքականության շրջանակներում քաղաքացիական ավիացիայի և օդային հաղորդակցության ոլորտում բարեփոխումների իրականացմամբ: Նախագծի նպատակն է հստակ տարանջատել քաղավիացիայի ոլորտը կարգավորող լիազորված մարմինների գործառույթները, համապատասխան փոփոխություն կատարել ավիափոխադրողների հավաստագրման գործընթացում, ինչը կնպաստի ոլորտի իրավահարաբերությունների արդյունավետ կանոնակարգմանը:
ԲՀԿ խմբակցության ղեկավար Նաիրա Զոհրաբյանը դիմելով էկոնոմիկայի նախարարին՝ հարց ուղղեց օդաչուների աշխատավարձերի մասին. ««Արմավիա» ընկերությունը ճանաչվեց սնանկ: Դրա տերը միլիարդատիրոջ նման շարունակում է ապրել, չգիտես ինչու, լինելով դե յուրե սնանկ, բայց դե ֆակտո միլիարդատեր, իսկ օդաչուները և ողջ անձնակազմն ամեն օր շարունակում են կառավարության դիմաց պահանջել իրենց աշխատավարձը: Այդ խնդիրը ո՞նց է կարգավորվելու»:
Կ.Ճշմարիտյանը նշեց, որ չի կարող մեկանաբանել որևէ մեկի կարողությունները, իսկ ինչ վերաբերում է «Արմավիա»-ի սնանկացմանը՝ նախարարն ասաց. «Կարծում եմ, որ կան համապատասխան մարմիններ, որոնք դա իրականացրել են: Այդ գործընթացը պիտի գնա ՀՀ օրենսդրության սահմաններում»:
Ինչ վերաբերում է օդաչուների իրավունքներին, նա նշեց, որ կան պատկան մարմիններ, որոնք այս հարցով զբաղվում են: «Պատրաստ ենք այս հարցը նորից ուղարկել Կառավարություն»,- ասաց նա:
Ն.Զոհրաբյանը նաև անդրադարձավ ավիատոմսերի գներին՝ ասելով, որ Հայաստանում ավիատոմսերն ամենաթանկն են աշխարհում: «Հայաստանի քաղաքացիները գերադասում են իրենց մեքենայով գնալ Թբիլիսի, և այնտեղից մեկնել որևէ այլ երկիր: Ինչո՞ւ մեկը պետք է իր կազմակերպությունը հայտարարի սնանկ և այսօր ապրի միլիարդատիրոջ կարգավիճակով, օդից 10 հազար դրամները գրպանած գնա երկրից և դրա փոխարեն մարդիկ ամեն օր կառավարության առաջ ցույց անեն, և ինչո՞ւ են Հայաստանում ավիատոմսերն աշխարհում ամենաթանկը: Այս խնդիրները ո՞ր օրենքով է կարգավորվելու՝ քաղաքական, բարոյական, չգիտեն օրենսդրական»:
Կ.Ճշմարիտյանը նշեց՝ կանխատեսելով, որ այդ հարցը իրեն ԱԺ-ում կուղղեն, իր հետ վիճակագրություն է բերել: «Մի բան է, երբ ասում են թանկ է կամ էժան, իսկ վիճակագրությունը հստակ սահմանում է այդ տարբերությունները»,- ասաց նա:
Այսպիսով, ըստ վիճակագրության, 2014 թվականին 2013-ի համեմատ ուղևորափոխադրման ծավալն աճել է 20.9 տոկոսով՝ անցնելով 2 մլն-ի սահմանը: Նախորդ տարի թռիչքներն աճել են 19.3 տոկոսով, իսկ ավիատոմսերի գները նվազել են 5.1 տոկոսով: Ըստ Կ.Ճշմարիտյանի, 2015թ-ի ապրիլին 2014թ-ի ապրիլի համեմատ թռիչքների հաճախականությունը նվազել է 13 տոկոսով, իսկ ուղևորահոսքը աճել է 6 տոկոսով: Ինչ վերաբերում է սակագներին, ապա նշված ժամանակահատվածում դրանք նվազել են 14 տոկոսով: «Սա վիճակագրություն է, որի հետ ոչ ոք հաշվի չնստել չի կարող»,- ասաց Կ.Ճշմարիտյանը:
Նա նաև նշեց, որ Հայաստանից թռիչքներ են իրականացնում 24 ավիաընկերություններ, որոնցից 8-ը ռուսական է:
Ն. Զոհրաբյանն էլ արձագանքեց. «Գիտեք, մեր երկինքը բացեցինք, փակեցինք, բաց քաղաքականություն, փակ քաղաքականություն, մեծ առումով դրանից բան չփոխվեց: Ես հարգում եմ վիճակագրությունը, որը ճշգրիտ գիտություն է, բայց խորհուրդ կտամ մեր վիճակագրական ծառայությանը մոնիտորինգ անի և պարզի, թե ՀՀ քաղաքացիներից քանի տոկոսն է գնում Վրաստանից թռնում որևէ այլ երկիր և այդպես կունենանք իրական պատկերը: Ես ինքս բավականաչափ հաճախ եմ տոմս առնում, և, անկեղծ ասած, այս դեպքում մեր վիճակագրությունը թվում է խիստ կասկածելի, կամ էլ ինձ են պատահում ամսեամիս, տարեցտարի թանկացող տոմսեր»:
Նա պահանջեց, որ Ազգային վիճակագրական ծառայությունը պարզի, թե Հայաստանից ամեն ամիս քանի քաղաքացի է Վրաստանով այլ երկիր մեկնում:
Կարեն Ճշմարիտյանն էլ նկատեց, որ Թբիլիսիում ամենաէժան ու ամենացածրորակ ծառայություններն են մատուցում և այնտեղից թռչում են բյուջետային ընկերություններ:
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
