Ձեր վստահելի աղբյուրը

Արմավիրի Նորապատ գյուղից «Սուրբ Աստվածամայր» բժշկական կենտրոն տեղափոխված երեխայի վիճակը ծայրահեղ ծանր է, երեխան կոմայի մեջ է: Panorama.am-ին փոքրիկի մասին տեղեկություններ հայտնեց «Սուրբ Աստվածամայր» բժշկական կենտրոնի վերակենդանացման բաժանմունքի վարիչ Չոբանյանը:

«Մեզ մոտ տեղափոխվել է կոմայի մեջ»,-ասաց բաժանմունքի վարիչը, ավելացնելով, որ Նարապատից մեկ երեխա է ԲԿ տեղափոխվել:

Առողջապահության նախարարությունից ասացին, որ թունավորված երեխաների թվի ու վիճակի մասին առայժմ նոր տվյալներ չկան: Նորապատի գյուղապետի հեռախոսն անհասանելի էր:

Հիշեցնենք, որ երեկ առողջապահության նախարարության կայքում հաղորդագրություն էր տեղադրվել, ըստ որի.

«Այսօր ցերեկն Արմավիրի բժշկական կենտրոնի ինֆեկցիոն բաժանմունք է ընդունվել Ջրաշեն գյուղի 4-ամյա աղջիկ` ջերմություն, թուլություն, փսխում, լուծ ախտանշաններով։ Վիճակը գնահատվել է միջին ծանրության` սուր աղիքային ինֆեկցիա նախնական ախտորոշումով։ Ստացել է վիճակին համապատասխան բուժում։ Երեկոյան կողմ փոքրիկի վիճակը կտրուկ վատացել է։ Տեղափոխելով վերակենդանացման բաժանմուք, մասնագետները համապատասխան միջոցներ են ձեռնարկել, սակայն երեխայի կյանքը փրկել չի հաջողվել։ Այս պահին ռեանիմոբիլով «Սուրբ Աստվածամայր» բժշկական կենտրոն է տեղափոխվում նույն ախտանշաններով, ծանր վիճակում գտնվող փոքրիկ տղա` Նորապատ գյուղից։ Մոտ երկու ժամ առաջ Արմավիր քաղաքի նույն ընտանիքի երկու երեխա (տարբեր մանկապարտեզների սաներ) ևս ընդունվել են տեղի ինֆեկցիոն բաժանմունք։ Եկուսի վիճակն էլ գնահատվում է թեթև։

ՀՀ առողջապահության նախարարի հանձնարարությամբ Արմավիրի մարզ են մեկնել նախարարի տեղակալ Սերգեյ Խաչատրյանը, ՀՀ ԱՆ գլխավոր ինֆեկցիոնիստ Արա Ասոյանը, մանկական ռեանիմատոլոգներ: Վարակի աղբյուրը պարզաբանելու, կանխարգելիչ ու հակահամաճարակային աշխատանքներ իրականացնելու նպատակով տեղում աշխատում է ՀՀ ԱՆ Հիվանդությունների վերահսկման և կանխարգելման ազգային կենտրոնի մասնագետների խումբը։ Արմավիր է մեկնել նաև ՀՀ ԱՆ առողջապահական պետական տեսչության պետ Արտակ Սահակյանը: Աշխատանքներում ընդգրկվել են նաև «Արաբկիր» և «Սուրբ Աստվածամայր» բժշկական կենտրոնների մասնագետները: Երևանի բժշկական կենտրոններում օպերատիվ աշխատանքները համակարգում է ՀՀ առողջապահության նախարարի տեղակալ Գագիկ Միրիջանյանը: Իրավիճակը հսկողության տակ է»:

Հիշեցնենք, որ մինչ այս թունավորման դեպքեր էին գրանցվել Արմավիր քաղաքի թիվ 6 և 9, ինչպես նաև Ալաշկերտ համայնքի մանկապարտեզներում:

Նախորդող հրապարակում`
Արմավիրի մանկապարտեզների հետքերով. Երեխաները կերել են խինկալի, կոտլետ, խոհանոցում էլ տաք ջուր չի եղել