Ձեր վստահելի աղբյուրը

Բժշկական ծառայություններն արագ կազմակերպելու համար Արարատի, Արմավիրի, Լոռու, Շիրակի և Կոտայքի մարզերին կցվել են մայրաքաղաքի «Սուրբ Գրիգոր Լուսավորիչ» և «Իզմիրլյան» բժշկական կենտրոնները, Հերացու անվան թիվ 1 համալսարանական կլինիկան, ԱՆ Վնասվածքաբանության և օրթոպեդիայի գիտական կենտրոնը։ Այս մասին հայտնել են նախօրեին ՀՀ առողջապահության նախարար Արմեն Մուրադյանի մոտ կայացած աշխատանքային խորհրդակցության ժամանակ:

ԱՆ մամուլի ծառայությունից հայտնում են, որ քննարկվել են նաև վերջին շրջանում հանրապետության նախադպրոցական ուսումնական հաստատություններում սուր աղիքային վարակների դեպքերը, դրանց հնարավոր պատճառները։

Այնուհետև ներկայացվել են ՀՀ վարչապետի հանձնարարությամբ մարզերում և Երևանում գործող նախադպրոցական ուսումնական բոլոր հաստատություններում իրականացված գույքագրման արդյունքները։ Նաև հաշվարկվել է, թե ֆինանսական որքան միջոցներ են անհրաժեշտ այդ հաստատությունների խոհանոցների և սանհանգույցների վիճակը բարելավելու, անհրաժեշտ գույքով հագեցնելու համար։

Նշվել է, որ ՀՀ առողջապահության նախարարի 2002 դեկտեմբերի 20-ի «Նախադպրոցական կազմակերպությունների (հիմնարկների) N 2.III.1 սանիտարական կանոնները և նորմերը հաստատելու մասին» թիվ 857 hրամանով և 2013 թվականի օգոստոսի 12-ի «Նախադպրոցական ուսումնական հաստատություններում երեխաների սննդի կազմակերպմանը ներկայացվող հիգիենիկ պահանջներ N2.3.1-0102013 սանիտարական կանոնները և նորմերը հաստատելու մասին» 42-Ն հրամանով սահմանվել են սննդի կազմակերպման, որակի, պահպանման, պատրաստման, առանձին տարիքային խմբերի երեխաների համար անհրաժեշտ սննդանյութերի (սպիտակուցներ, ճարպեր, ածխաջրատներ) և էներգիայի օրական ֆիզիոլոգիական պահանջի նորմերը։

Նախադպրոցական հիմնարկների խոհանոցների բարելավումը կնպաստի պահանջվող նորմատիվների ապահովմանը։ Կարևորվել է ինչպես նախադպրոցական ուսումնական հաստատություններում, այնպես էլ ընտանիքներում այդ նորմերի ապահովումը։

Թեև հսկողությունն առողջապահության նախարարության իրավասության շրջանակում չէ, սակայն նախադպրոցական ուսումնական հաստատություններում առաջացող խնդիրների հետևանքներին այս համակարգն է առնչվում։

Քննարկվել է նաև Համահակական ամառային 6-րդ խաղերի մարզիկների և մասնակիցների բժշկական օգնությունը բարձր մակարդակով կազմակերպելուն վերաբերող հարցեր։ ՀՀ առողջապահության նախարարի հրամանով բոլոր մարզադաշտերում, մարզասրահներում շտապ բժշկական օգնության ծառայություններ կապահովվեն։ Հաշվի առնելով սպորտային վնասվածքների առաջացման հավանականությունը` կհերթապահեն նաև օրթոպեդ-վնասվածքաբաններ։

«Համապետական նշանակության միջոցառումների ժամանակ, հատկապես մեծաթիվ հյուրերի առկայության պայմաններում, մեր համակարգն արդեն բարձր պատրաստվածություն ապահովելու փորձ ունի»,-ասաց Արմեն Մուրադյանը։

Նա հավելել է, որ այդ օրերին կուժեղացվի հիվանդանոցների ընդունարանների, վիրահատական ու վերակենդանացման բաժանմունքների պատրաստվածությունը։ Ուժեղացված ռեժիմով կաշխատեն նաև պոլիկլինիկաները, որոնք անհրաժեշտության դեպքում ծառայություններ կմատուցեն նաև հյուրանոցների բնակիչներին։