Ձեր վստահելի աղբյուրը

Հայաստանի ամբողջ տարածքի 53,2 տոկոսն անապատացման վտանգի առաջ է կանգնած, որից 28-29 տոկոսի դեպքում վտանգը շատ մեծ է: Լրագրողների հետ հանդիպման ժամանակ ասաց «Հանուն կայուն մարդկային զարգացման» ասոցիացիայի նախագահ, բնապահպան Կարինե Դանիելյանը:

Ըստ նրա, անապատացման մեծ վտանգ է սպառնում Արարատյան դաշտին: Հունիսի 18-ը Անապատացման դեմ պայքարի համաշխարհային օրն է:

Կ. Դանիելյանի խոսքով, կոնվենցիայի համաձայն, անապատացումն այն է, որ հողային տարածքները սկսում են կորցնել իրենց բերրիությունը. «Մեզ մոտ, ըստ գնահատականների, 0,15 տոկոսը համարվում է շատ բարենպաստ տարածք, 45 տոկոսը լանջերն են, բավական դժվար է գյուղատնտեսության համար, հատուկ միջոցներ են օգտագործվում, որպեսզի չվնասվի բերրի շերտը: Էրոզիայի վտանգ կա՝ գերարածացման, անտառների վերացման պատճառով, նաև հանքարդյունաբերության պարագայում արվող պայթեցումները մեծ վտանգ են սպառնում շրջակա միջավայրի հողային ռեսուրսներին»:

Բապահպանը նաև ասաց, որ միջազգային գրականության մեջ քաղաքների անապատացման գործընթացն է գնահատվում. «Ամբողջ աշխարհում անապատացման ռիսկերը շատ բարձր են, չեն հասցնում դրա հետևից: Սակայն Հայաստանում գոնե կանխարգելման քայլեր իրականացնենք, ռիսկերն ենք մեծացնում»:

Կ. Դանիելյանի խոսքով, պետական համապատասխան մարմիններն ու հասարակական կազմակերպությունները, անհատ մասնագետները վերջին տարվա ընթացքում շատ են քննարկել տարբեր բնապահպանական խնդիրներ, տրվել են օբյեկտիվ գնահատականներ:

«Մենք արել ենք մեր առաջարկությունները, նախարարությունն էլ անում է գործողություններ, սակայն բավական չէ»,- ասաց նա: