Ձեր վստահելի աղբյուրը

Մարդու իրավունքների եվրոպական դատարանի (ՄԻԵԴ) հրապարակած «Չիրագովը և մյուսներն ընդդեմ Հայաստանի» և «Սարգսյանը ընդդեմ Ադրբեջանի» գործերով վճիռներով նոր փուլ է մտնում ադրբեջանահայ փախստականների հարցը: Լրագրողների հետ հանդիպման ժամանակ ասաց «Ընդդեմ իրավական կամայականությունների» ՀԿ գործադիր տնօրեն, ՀՀ մարդու իրավունքների նախկին պաշտպան Լարիսա Ալավերդյանը:

«Այս փուլում պետք է ցույց տրվի, որ կան այնպիսի հանգամանքներ, որոնք հաշվի չեն առնվել, թե ինչ պարագայում են տեղի ունեցել դեպքերը: Դիտարկվում է շատ ավելի մասնավոր, սեղմ ժամանակահատվածում տեղի ունեցածը»,- նշեց նա՝ միաժամանակ հավելելով, որ այդ վճիռները մանրակրկիտ ուսումնասիրության կարիք ունեն, նաև նախադեպային բնույթ ունեն:

Լ. Ալավերդյանի խոսքով, Ադրբեջանն օգտվելու է այս վճիռներից ու բարձրացնելու է հակահայկական նոր ալիք՝ զուտ հակահայկական քարոզչությունն ավելի ակտիվացնելով, կասկածի տալ դնելով ԵԱՀԿ Մինսկի խմբի աշխատանքը:

«Այս հարցում կարելի է կիսել որոշ փորաձագետների կարծիքը, որ Ադրբեջանը փորձելու է օգտվել նման վճիռներից՝ անարդար պտուղներ քաղելու համար: Այնքան էլ հեշտ չէ հայկական կողմի վիճակը: Պետք է ամեն ինչ հստակեցվի: Պետք է անմիջապես աշխատանքի անցնեն բոլոր իրավասու մարմինները»,- նշեց նա:

Մարդու իրավունքների եվրոպական դատարանը (ՄԻԵԴ) հունիսի 16-ին հրապարակել էր «Չիրագովը և մյուսներն ընդդեմ Հայաստանի» և «Սարգսյանը ընդդեմ Ադրբեջանի» երկու գործերով վճիռները: Առաջինը վերաբերում էր Լեռնային Ղարաբաղի Բերձորի (Լաչին) շրջանից ազգությամբ քուրդ Չիրագովների ընտանիքին, իսկ երկրորդը` Ադրբեջանի վերահսկողության տակ գտնվող Շահումյանի շրջանի Գյուլիստան գյուղից Սարգսյանների ընտանիքին՝ իրենց տները վերադառնալու և ունեցվածքի նկատմամբ իրավունքները վերականգնելու կամ արդար փոխհատուցում ստանալու վերաբերյալ:

Նախորդող հրապարակում՝
ՄԻԵԴ-ում Չիրագովի և Սարգսյանի գործերը համարվում են առաջնորդող գործեր. Ալվինա Գյուլումյան
Գևորգ Կոստանյան․ ՄԻԵԴ-ը զերծ մնաց ԼՂ կարգավիճակի հարցին անդրադառնալուց