Ձեր վստահելի աղբյուրը

Ռուսական կողմը վերջերս հայտարարել է, թե տնտեսական իմաստով Հայաստան-Իրան երկաթգիծն իր իմաստը կորցրել է, արդյոք դա կապված է Հյուսիս-Հարավ ճանապարհի կառուցման հե՞տ, թե՞ այլ խնդիր կա: Այս մասին այսօր Ազգային ժողովում ՀՀ տրանսպորտի և կապի փոխնախարար Արթուր Առաքելյանից հետաքրքրվեց «Ժառանգություն» խմբակցության քարտուղար Թևան Պողոսյանը:

Նշենք, որ խորհրդարանում քննարկվում է Հայաստանի Հանրապետության և Եվրասիական զարգացման բանկի միջև 2015 թվականի ապրիլի 14-ին ստորագրված «Հյուսիս-հարավ» ավտոճանապարհային միջանցքի շինարարության (4-րդ հերթ) նախագծի ֆինանսավորման համար Եվրասիական տնտեսական ընկերակցության հակաճգնաժամային հիմնադրամի միջոցներից ներդրումային վարկի տրամադրման մասին» համաձայնագիրը:

Ա.Առաքելյանը վստահեցրեց, որ մի ծրագրի իրականացումը չի վնասի մյուս ծրագրի իրականացմանը, քանի որ երկաթուղու կառուցումը միտված է այլ բեռների տեղափոխման: «Ավտոմոբիլային տրանսպորտով այլ բեռներ են տեղափոխում, իսկ երկաթուղին մի այլ նպատակի է ծառայում»,- ասաց նա:

Ինչ վերաբերում է ռուսական կողմի հայտարարությանը, ապա Ա.Առաքելյանը հիշեցրեց, որ ռուսական կողմը անմիջապես մեկ այլ հայտարարությամբ էլ հանդես եկավ, թե ընդամենը ռուսական խոշորագույն ընկերության ղեկավարն էր իր կարծիքը հայտնել, սակայն հետագայում նաև հայտարարություններ հնչեցին, որ որևէ մեկը Ռուսաստանից կասկածի տակ չի դնում երկաթուղային այս ծրագրի իրականացումը:

«Վստահաբար կասեմ, որ մեկը մյուսին միանշանակ չի խանգարելու և մենք ձեռնամուխ ենք լինելու նաև երկաթգծի կառուցման ծրագրի իրագործմանը: Հնարավոր է շուտով հանդես գանք որոշակի հայտարարություններով կոնկրետ իրագործման վերաբերյալ պլանավորված միջոցառումների մասով»,- նշեց Ա.Առաքելյանը: ընդգծեց նա:

Թևան Պողոսյանն էլ արձագանքեց, թե շատ լավ է, որ մի քանի ճանապարհ կունենանք և որևէ մեկը չի ժխտի, որ երկաթուղային փոխադրումը ավելի նպատակային է, քան ավտոմոբիլայինը: «Միգուցե առաջնային էր երկաթուղային ծրագիրն իրականացնելը, այլապես ստացվում է, որ խնդիր ունենք ռազմավարական առաջնահերթությունների մասով: Գուցե ճիշտ էր երկաթգծից սկսել, հետո նոր անցնել ճանապարհին»,- նկատեց Թ.Պողոսյանը:

Ա.Առաքելյանն էլ ասաց, որ երկաթգծի կառուցման նախապայմաններից կարևորագույններից մեկը նաև հարևան երկրի նկատմամբ գործող պատժամիջոցներն են ու դրանց թուլացման խնդիրները: «Քանի որ երկաթգիծը նախատեսվում է կառուցել մասնավոր ներդրմամբ, կարևորագույն նախապայմաններից մեկը մեր հարևանի նկատմամբ կիրառվող պատժամիջոցների վերացումն է, որպեսզի ծրագիրը դառնա շահավետ: Թանկ ծրագիր է, լեռնային գոտիով է անցնում: Այնտեղ անհրաժեշտ են բարդ ինժեներական լուծումներ: Մասնավորապես, 300 կմ հատվածից, մինչ ենթակառուցվածքներին միանալը, նախատեսվում է կառուցել շուրջ 100 կմ թունել, որը ենթադրում է խոշոր ծախս: Եվ երբ ասում եք ռազմավարություն, ապա շատ կարևոր է, որ մեր հարևան երկրի նկատմամբ, և առհասարակ՝ տարածաշրջանում ակտիվանան այդ բիզնես գործընթացները»,- նշեց նա:

Նախորդող հրապարակում՝
150 մլն դոլարի վարկ` «Հյուսիս-հարավ» ավտոճանապարհային միջանցքի համար