ԵԽԽՎ նախագահ․ «Զրո հանդուրժողականություն ԵԽԽՎ-ում ցանկացած ձևի կոռուպցիայի նկատմամբ»
Այսօր Ստրասբուրգում Եվրոպայի խորհրդի խորհրդարանական վեհաժողովի ամառային նստաշրջանի մեկնարկից առաջ ԵԽԽՎ նախագահ Անն Բրասյորը մամլո ասուլիսի ժամանակ ներկայացրեց ԵԽԽՎ օրակարգը` առանձնացնելով հատկապես օրակարգում ընդգրկված «Ժողովրդավարական հաստատությունների գործունեությունն Ադրբեջանում» զեկույցի նախագծի քննարկումը, և պատասխանեց հարցերի։
Ստրասբուրգում Panorama.am-ի թղթակիցը հարց է ուղղել ԵԽԽՎ նախագահին այն մասին, որ վերջերս ՖԻՖԱ-ում տեղի ունեցած կոռուպցիոն սկանդալը հայտնվեց աշխարհի ուշադրության կենտրոնում, ինչի վերաբերյալ իր մտահոգությունն էր հայտնել նաև Անն Բրասյորը:
-Մինչդեռ, գնալով աճում են այն մտահոգությունները, որ քաղաքական կոռուպցիան կարող է խաթարել խորհրդարանական վեհաժողովի ժողովրդավարական կերպարն ու նրա նկատմամբ վստահությունը։ Այս իրավիճակի վերջին օրինակը կարող է լինել հենց «Ժողովրդավարական հաստատությունների գործունեությունն Ադրբեջանում» զեկույցի նախագիծը։ Ինչպիսի՞ միջոցներ եք ձեռնարկում՝ ԵԽԽՎ-ում կոռուպցիան կանխելու և արմատախիլ անելու համար։
-Սկսեցիք ՖԻՖԱ-ից, վերջացրեցիք` խորհրդարանականներով։ Շնորհակալություն եմ ուզում հայտնել ամերիկացիներին՝ այս գործերը բացելու համար, որին օգնեցին նաև շվեյցարացիները։ Սպորտը ևս հանրային ուշադրության կենտրոնում է։ Գործում է օլիմպիական կանոնադրություն, որը խաթարվել է սպորտային կազմակերպության առաջնորդների կողմից, որտեղ առկա է կոռուպցիա։ Հույս ունեմ, որ սա կլինի նոր սկիզբ, քանի որ ֆուտբոլում շատ կամավորներ են աշխատում, որոնց չեն վճարում և նրանք արժանի են ավելի լավ կազմակերպության։
Ինչ վերաբերում է Եվրոպայի խորհրդում խորհրդարանականների կոռուպցիային, ապա կա «Խորհրդարանականներն ընդդեմ կոռուպցիայի» միությունը։ Անն Բրասյորն ասաց, որ վերջերս Հռոմում մասնակցել է սեմինարի, որը քննարկում էր խորհրդարանականների վարքագծի կանոնները։
«Այստեղ մենք, իհարկե, պետք է աշխատենք միասին, որպեսզի խորհրդարանականը չանի այն, ինչն արգելված է։ Խորհրդարանականը պետք է լինի օրինակ։ Ես ասում եմ՝ զրո հանդուրժողականություն ցանկացած ձևի կոռուպցիայի նկատմամբ, ցանկացած քայլի, երբ մարդը փորձում է խաբել՝ անձնական կամ մյուսների շահերի համար։ Սա անընդունելի է։ Եվ սա է այն բառը, որ պետք է օգտագործենք այստեղ՝ Եվրոպայի խորհրդում, քանի որ, ինչպես ճիշտ նշեցիք, կոռուպցիան խաթարում է մեր ժողովրդավարական համակարգը։ Հույս ունեմ, որ լրատվամիջոցները ևս կմիանան, կօգնեն՝ վերջ տալ կոռուպցիային։ Եվ ամեն անգամ, եթե կա կոռուպցիա, իհարկե, պետք է խոսել, որպեսզի արմատախիլ անենք այն։ Չնայած, ես այնքան միամիտ չեմ, որ մտածեմ՝ այն արմատախիլ կլինի, քանի որ քաղաքական գործիչները ևս մարդկային էակներ են, ովքեր կարծում են կարող են խաբել, սակայն այդ մարդիկ քաղաքականության մեջ անելու ոչինչ չունեն»,- Panorama-ի հարցին ի պատասխան ասաց ԵԽԽՎ նախագահ Անն Բրասյորը։
Նշենք, որ վաղը ԵԽԽՎ-ում կքննարկվի «Ժողովրդավարական հաստատությունների գործունեությունն Ադրբեջանում» զեկույցի նախագծը։ Զեկույցը պատրաստել են Ադրբեջանի հարցով զեկուցողներ, Մոնիթորինգի հանձնաժողովի անդամներ, ԵԽԽՎ-ում հայտնի խավիարասերներ, իսպանացի պատգամավոր Պեդրո Ագրամունտն ու Լեհաստանի պատգամավոր Թադեուշ Իվինսկին, որոնց անուններն ընդգրկված է «Եվրոպական կայունության նախաձեռնության» հրապարակած «Խավիարային դիվանագիտություն․ինչպես է Ադրբեջանը լռեցնում Եվրոպայի խորհրդին» զեկույցում։
Զեկույցում, համազեկուցողները, փոխարենը նշելու Ադրբեջանում տիրող մարդու իրավունքների և ազատությունների սաստկալի իրավիճակը, ներառել են «Լեռնային Ղարաբաղում և Ադրբեջանի մյուս գրավյալ տարածքներում բռնության աճ» վերնագրված դեռևս չգրված զեկույցը՝ նշելով, որ այս խնդրին մանրամասն չեն անդրադառնա, քանի որ այս հարցով զբաղվում է բրիտանացի պատգամավոր Ռոբերտ Ուոլտերը․ևս մեկ ադրբեջանական խավիարակեր, ով վերջերս ստացավ Թուրքիայի քաղաքացիություն։
Աննա Մկրտչյան
Նախորդող
Արցախի խմբակցությունները հայտարարություն են տարածել ԵԽԽՎ մոնիտորինգի հանձնաժողովի բանաձևի վերաբերյալ
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
