Ձեր վստահելի աղբյուրը

Հյուսիս-հարավ ավտոճանապարհային միջանցքի շինարարությունը Հայաստանի համար ռազմավարական նշանակություն ունեցող ծրագիր է: Այս մասին  այսօր Ազգային ժողովում արտահերթ ելույթում ասաց ԱԺ փոխնախագահ Էդուարդ Շարմազանովը:

«Հյուսիս-հարավը կենսական նշանակություն ունի Հայաստանի համար: Երկրորդ կարծիք լինել չի կարող»,- նշեց նա՝ հավելելով, որ ռազմավարական նշանակություն ունի նաև Իրան-Հայաստան երկաթուղին. «Այն, որ սրանք մեր ռազմավարության երկու հիմնասյուներն են, սա փաստ է, և անկախ կուսակցական պատկանելությունից, այս դահլիճում բոլոր սթափ մտածող մարդիկ պետք է ունենան այդ կարծիքը, քանի որ այս ծրագրերի իրականացումը բխում է մեր պետության շահերից»:

Ըստ Է.Շարմազանովի՝ այն, որ կլինեն տեխնիկական թերություններ, սա պարզ է. «Թերություններ չկան այնտեղ, որտեղ չկա աշխատանք»:

Այնուհետև ԱԺ փոխխոսնակն անդրադարձավ ՀԱԿ խմբակցության պատգամավոր Արամ Մանուկյանի ելույթին: Վերջինս խոսել էր Մետաքսի ճանապարհից և մասնավորապես նշել. «Դա ճանապարհ չի, դա տնտեսական գոտի է, լուրջ ծրագիր է: Ամբողջ Սևծովյան տնտեսական համագործակցությունը ոգևորվել և սևեռվել է այս ծրագրի վրա՝ Չինաստանից մինչև Եվրոպա լուրջ ներդրումներ, լուրջ քաղաքական նախագիծ է սա: Եվ այս պահին Վրաստանը, Թուրքիան, Ադրբեջանը համատեղ ծրագրեր են իրականացնում, պլաններ են գծում, նախագծային աշխատանքներ են անում այդ աշխատանքների համար: Դուք ասում եք՝ մենք առաջինն ենք դիմել: Շատը լավ, առաջինը դիմել եք, բայց այս պահին չունենք որեւէ գործնական գոնե նախնական պրոյեկտ, որ մենք միանալու ենք այդ ծրագրին: Ցավալիորեն դուք նշեցիք, որ մենք 3 հարևանների հետ չենք կարող իրականացնել այդպիսի պրոյեկտ: Սա մեր ողբերգությունն է: Ճանապարհը նաև քաղաքականությունն է, այստեղ միայն ասֆալտ ու բետոն փռելու խնդիրը չի: Իրականությունն այն է, որ մեր երեք հարևանները համատեղ ռեգիոնալ լուրջ ծրագրեր են իրականացնում, և այդ բոլոր ծրագրերը շրջանցում են Հայաստանը, մինչդեռ եթե Հայաստանով անցնեին, ավելի էժան կլիներ: Մենք վստահելի չենք, քանի որ 500 կմ-ից 30 կմ-ն էլ չեք ավարտել, ձեզ էլ ո՞վ փող կտա: Ձեր ծրագիրը լռված է, հոգնած, հանգստանում է, մինչև որ թիվը՝ չգիտեմ»:

«Այդ երեք պետություններից երկուսը մեր հակառակորդներն են՝ Ադրբեջանը և Թուրքիան: Ժողովուրդ ջան, այնպես եք արտահայտվում այստեղ, ոնց որ ՀՀ ներկայացուցիչ չլինեք: Խնդիրը մեր մեջ չէ, անկախ նրանից՝ ՀՀԿ-ն է իշխանության, ՀԱԿ-ը, ՀՀՇ-ն, ԲՀԿ-ն, թե ՕԵԿ-ը, պրոբլեմը մեջ մեր չէ, պետք չէ բոլոր սլաքները մեր դեմ ուղղել: Այդքան լավ անող էիք, 90-ականներին անեիք այդ ծրագրերը, չթողնեիք, որ 93թ-ին Թուրքիան շրջափակեր Հայաստանը: Եթե այդքան ազդեցիկ էիք, չթողնեիք, որ մինչև 97-98-ը այդ շրջափակումը լիներ: Չեմ կարծում, որ ամեն ինչը բարդել իշխանության վրա ճիշտ է»,- ասաց Է.Շարմազանովը:

Ըստ նրա՝ այն, որ տարածաշրջանում կա տրանսպորտային խնդիր՝ նորություն չէ, բայց դրա մեղավորը Հայաստանը չի, դրա մեղավորը Թուրքիան է և Ադրբեջանը:

«Մենք պատրաստ չենք միակողմանի զիջումների, եթե ոմանք պատրաստ են միակողմանի զիջումների Ղարաբաղի հարցում, այսօրվա իշխանությունները պատրաստ չեն, որովհետև Ղարաբաղում միակողմանի զիջումների գնալը նույնն է, որ մենք կորցնում ենք մեր ինքնիշխանության լուրջ հատվածը»,-ասաց ԱԺ փոնախագահը՝ ակնարկելով առաջին նախագահ Լևոն Տեր-Պետրոսյանին:

«Իսկ եթե այդքան իմաստուն էիք, այսօր մեզ խորհուրդներ մի տվեք, ժամանակին եղել եք և գոնե հինգ տարի ժամանակ եք ունեցել, որպեսզի շրջափակումը դադարեցնեիք, ինչպես նաև հարցերը լուծեիք: Մենք չենք պատրաստվում ԼՂՀ հարցի միակողմանի լուծման ճանապարհով ախպերանանք Թուրքիայի կամ Ադրբեջանի հետ: Պատրաստ ենք առանց նախապայմանների հարաբերությունների և ԼՂՀ հարցում բացառապես պատրաստ ենք այն փաթեթին, որը կա հիմնավոր 3 սկզբունքների վրա: ԼՂՀ ինքնորոշման իրավունքը այլընտրանք ունենալ չի կարող: ՀՀ իշխանությունները այնքան հարցերում թերություններ ունեն, կարող եք լիքը հարցերում մեզ քննադատել: Բայց խնդրում եմ, որ գոնե այս հարցում դուք շատ լավ գիտեք, հարգելի պարոն, որ մեղավորը և պատասխանատուն Թուրքիան և Ադրբեջանն են»,- նշեց Է.Շարմազանովը: