«Ծանր մթերքներով տեռորի չենթարկել ստամոքսը»

Առողջություն 15:08 23/06/2015

«Մենք ունենք Արմավիրում արձանագրված աղիքային վարակների դեպքեր, բայց չունենք համաճարակային խնդիր»,- այսօր լրագրողների հետ հանդիպմանն ասաց ՀՀ ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Նունե Բակունցը:

Խոսելով Արմավիրում ներկա իրավիճակից, նա նշեց, որ Արմավիրում համաճարակ չկա, բոլորը տարբեր հարուցիչներով դեպքեր են, միմյանց հետ կապ չունեցող, տարբեր աղբյուրներից. «Մինչ այսօր որևէ կապ չենք հայտանբերել: Աղիքային վարակիչ հիվանդությունները, ինչպես շատ այլ հիվանդություններ, սեզոնային են»:

Ն. Բակունցի խոսքերով անցած տարվա և այս տարվա գրանցված դեպքերի թվերը գրեթե նույնն են:

«Գարնան և ամռան սեզոնին պետք է առավել ուշադիր լինել, քանի որ այդ ժամանակ ավելի ակտիվ են լինում աղիքային վարակները: Արմավիրի վրա առավել շատ ուշադրություն հրավիրվեց, քանի որ այնտեղ գրանցվեց մահացության դեպք, սակայն աղիքային վարակների դեպքեր այս շրջանում գրանցվում են նաև այլ մարզերում»:

Բանախոսն ընդգծեց, որ աղիքային դեպքերի տարածման պատճառները շատ տարբեր են, դրանք տարածվում են սննդով, ձեռքից ձեռք փոխանցումից, ընտանի կենդանիներից. «Ամռան և գարնան ամիսներին պետք է առավել զգոն լինել: Մրգերն անպայման լվանալ նոր ուտել, կապ չունի դա սեփական այգում է աճեցրած, թե այլ տեղ»:

ՀՀ ԱՆ գլխավոր ինֆեկցիոնիստ Արա Ասոյանն էլ բոլոր ծնողներին խորդուրդ տվեց ավելի ուշադիր լինել և սնվելու մշակույթին ուշադրություն դարձնել. «Ամռանը հատկապես պետք չի ծանրաբեռնել ստամոքսը: Այս եղանակին որևէ տեղ հանգստի գնալու համար խորհուրդ կտամ ուտել հաց, պանիր պոմիդոր և մածուն: Ծանր մթերքներով տեռորի չենթարկել ստամոքսը»:

Անդրադառնալով Արմավիրի մարզում արձանագրված երեխայի մահվան դեպքին՝ հանրապետության գլխավոր ինֆեկցիոնիստը նշեց, որ երեխային շատ ուշ էին բերել հիվանդանոց, երբ ոչինչ անել այլևս հնարավոր չէր: Իսկ ինչ վերաբերում է նրան, որ ծնողները մեղադրում են բժշկին, նա շեշտեց. «Այն մեղադրանքը, որը ներկայացնում են բժշկին, տեխնիկապես հնարավոր չէ»:

Նա նաև ավելացրեց, որ մահացած երեխայի գործը դատաբժշկական փորձաքննության տակ է և կհրապարակվի, իսկ կոմայի մեջ գտնվող երեխան ունեցել է այլ առողջական լուրջ խնդիրներ:

Նունե Բակունցը հավելեց, որ առողջապահության նախարարությունը սերտորեն համագործակցում է ՍԱՊԾ և տեղեղական ինքնակառավարման մարմինների հետ:

Հիշեցնենք, որ հուլիսի 16-ից Արմավիրի մարզում արձանագրվել էին աղիքային վարակների դեպքեր: Համաճարակաբանական հետազոտությունների արդյունքում պարզվել էր, որ այդ օրը աղիքային գանգատներով, Ջրաշեն համայնքից Արմավիրի բժշկական կենտրոնի ինֆեկցիոն բաժանմունք տեղափոխված 4-ամյա աղջիկը մահացել է, իսկ նույն օրը Նորապատ համայնքի 5-ամյա մի տղա , աղիքային գանգատներով և ծայրահեղ ծանր վիճակում, տեղափոխվել էր «Սուրբ Աստվածամայր» բժշկական կենտրոնի վերակենդանացման բաժանմունք:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: