Ձեր վստահելի աղբյուրը

Ցանկացած նախաձեռնության հանդեպ սպասելիքները գալիս են նրանից, թե ինչքան ճիշտ են ծրագրավորված գործողությունները և ինչքան համառությամբ ես կարողանում դրանք կյանքի կոչել: Այս մասին այսօր լրագրողների հետ հանդիպման ժամանակ ասաց ԱԺ «Ժառանգություն» խմբակցության պատգամավոր Թևան Պողոսյանը՝ անդրադառնալով էլեկտրաէներգիայի թանկացման դեմ ակցիային:

«Ամբողջ գիշեր Բաղրամյան պողոտայում եմ եղել, պետք է ասեմ, որ իսկապես փայլուն երիտասարդություն ունենք»,- ասաց պատգամավորը:

Դրա հետ մասին, ըստ Թ.Պողոսյանի, կարծես թե աշխատեց նաև այն գաղափարը, որ պատգամավորները, մշակութային գործիչները, շոու բիզնեսի ներկայացուցիչները որոշեցին իրենցով կենդանի պատնեշ սարքել ոստիկանների և ցուցարարների միջև, որպեսզի կանխեն ոստիկանների կողմից ցուցարարների հանդեպ հնարավոր բռնության նոր ալիքը:

«Թեև սկզբնական շրջանում փոքր-ինչ լարվածություն կար, սակայն ամբողջ գիշերը եղել է հանդարտ, հնարավորություն է ընձեռվել, որ պահանջատեր երկտասարդությունը և ոստիկանները տարբեր հարցերում բանակցեն: Մենք պայմանավորվել էինք, որ չենք միջամտելու, քանի որ մեր խնդիրն էր թույլ չտալ, որ բռնություններ տեղի ունենան»,- նշեց Թ.Պողոսյանը:

Այդուհանդերձ, նա նկատեց, որ անհնար է ամբողջ օրն այնտեղ կանգնել, ուստի լավ կլինի, որ հերթափոխով պահեն այդ պատնեշը: Իսկ թե բանակցություններն ինչ արդյունքներ կտան, դա կախված է նրանից, թե երկու կողմը ինչքանով են պատրաստ իրար լսել. «Թեև երիտասարդների պահանջները շատ պարզ են և հստակ, բայց մյուս կողմը, եթե ցանկանում է, որ խնդիրը լուծում գտնի, ապա նույնպես պետք է կարողանա հստակ և նորմալ իր տեսակետները ներկայացնի, այլ ոչ թե միայն ասի, թե եկեք 4 կամ 5 հոգով բանակցենք: Նոր մոտեցումներ են պետք»:

Թ.Պողոսյանը հույս հայտնեց, որ բոլորի ջանքերը արդյունք կտան, բռնություններ տեղի չեն ունենա, կօգտագործեն քաղաքակիրթ մեխանիզմներ և խնդրին լուծում կտրվի:

Հարցին՝ եթե Հանրային ծառայությունները կարգավորող հանձնաժողովն արդեն որոշում է կայացրել բարձրացնել էլեկտրաէներգիայի սակագինը, արդյոք այդ դեպքում ակցիան դրական արդյունք կտա, պատգամավորը պատասխանեց, որ անհնարին որևէ բան չկա:

«ՀԾԿՀ-ի որոշումը կարող է կասեցվել, մինչև օգոստոսի 1-ը ժամանակ ունենք քննարկել, վերանայել, բացատրել: Վստահ եմ, որ որևէ մեկը Հայաստանի թշնամին չէ: Ինչպես ես, այնպես էլ շատ պատգամավորներ այն կարծիքին են, որ այսօրվա դրությամբ էլեկտրաէնեգիայի սակագնի բարձրացման խնդիր չունենք: Եթե ճիշտ մոտեցումներ լինեն, մասնավորապես մենեջմենթի խնդիրը լուծվի, ինչպես նաև ուսումնասիրվի, թե ՀԷՑ-ում վարկային ռեսուրսները երբ և ում կողմից են կուտակվել, ապա այս բոլորն ուսումնասիրելուց հետո վստահ եմ, որ շատ հարցերի պատասխաններ կունենանք և մեղավորներն իրենց արժանի պատիժը կստանան»,- ասաց Թ.Պողոսյանը: