Ձեր վստահելի աղբյուրը

ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) տնօրեն Մայքլ Գեորգ Լինքն այսօր կոչ է արել ՀՀ իշխանություններին հարգել Երևանի կենտրոնական հատվածում խաղաղ ցույցին մասնակցողների խաղաղ հավաքների ազատության իրավունքը: Հայտարարությւոնը տարածել է ԵԱՀԿ երևանյան գրասենյակը:

«Հայաստանը, ինչպես ԵԱՀԿ բոլոր մասնակից պետությունները, պարտավորվել է պաշտպանել և խթանել խաղաղ հավաքների հիմնարար ազատությունը և պետք լիովին հարգի Երևանում ցուցարարների իրավունքները՝ այդ ազատությունն իրականացնելու համար»,-ըստ աղբյուրի, ասել է ԺՀՄԻԳ տնօրենը:

«Երեկ առավոտյան իրավապահ մարմինների գործողությունների, այդ թվում՝ հարյուրավոր խաղաղ ցուցարարների դեմ ջրցան մեքենաների կիրառումը և նրանց կալանավորումը լուրջ մտահոգություն են առաջացնում: Հավաքների ազատության մասին ԵԱՀԿ պարտավորությունները ոչ միայն երաշխավորում են խաղաղ հավաքների և ցույցի իրավունքը, այլ նաև պնդում են, որ այս իրավունքի ցանկացած սահմանափակում պետք է օրենքով սահմանված լինի և համահունչ լինի միջազգային չափանիշներին: Իրավապահ մարմինների պարտականությունն է օժանդակել խաղաղ հավաքների անցկացմանը և ոստիկանության ցանկացած միջոցառում պետք է լինի օրինական, անհրաժեշտ և համաչափ: Ուժի ավելորդ կիրառումը կամ չհիմնավորված կամ կամայական ձերբակալությունները պետք է անաչառ, բազմակողմանի և անհապաղ կերպով հետաքննել, որպեսզի պատասխանատուները ենթարկվեն պատասխանատվության»,-ասել է տնօրեն Լինքը:

Աղբյուրը նաև ավելացնում է. Էլեկտրաէներգիայի արժեքի մոտ 17 տոկոսի թանկացման դեմ ցույցերը սկսվել են անցյալ ուրբաթ, և երեքշաբթի առավոտյան հազարավոր մարդիկ Երևանում դուրս են եկել փողոց: Ոստիկանությունը գրոհել է ցուցարարների վրա և ջրցան մեքենա կիրառել այն բանից հետո, երբ նրանք արգելափակել են մայրաքաղաքի հիմնական փողոցը: Ըստ հաղորդումների ավելի քան 200 ցուցարարներ ձերբակալվել էին, իսկ 14 ցուցարար և 11 ոստիկան՝ վիրավորվել: Երեքշաբթի օրը ձերբակալվածները ազատ են արձակվել: Հարյուրավոր ցուցարարներ վերադարձել են այսօր՝ շարունակելու ցույցը: