Ձեր վստահելի աղբյուրը

«Մեր երկրում կարևոր իրադարձություններ են կատարվում, որոնք կարող են անշրջելի փոփոխությունների հիմք լինել: Այս պահին կարևորն այն է, որ որևէ վրիպում թույլ չտրվի, չկրկնվեն այն սխալները, որոնք եղել են մինչ օրս հրապարակներում»,- լրագրողների հետ հանդիպման ժամանակ նման կարծիք հայտնեց փաստաբան Նորայր Նորիկյանը՝ խոսելով էլեկտրաէներգիայի սակագնի թանկացման որոշման դեմ պայքարող քաղաքացիների կողմից օրեր շարունակ տեղի ունեցող բողոքի հավաքի մասին:

Միաժամանակ փաստաբանը նշեց, որ Երևանի Բաղրամյան պողոտան հավերժ չի կարող փակ լինել, պետք է ստեղծված իրավիճակից ելքեր գնել: Ն. Նորիկյանն առաջարեց մի քանի տարբերակ. «Իշխանությունը որևէ կերպ չի նահանջում, աստիճանաբար սկսում է ջլատել, մասնատել ու լիկվիդացել հավաքված երիտասարդությունը: Բայց սա կարող է իշխանության համար կարճաժամկետ առումով արդյունք տա: Իշխանության վրա այդ քայլը կարող է բացասաբար անդրադառնալ: Խելամիտ իշխանությունը իր դեմ չի հանի հասարակությանը՝ հաշվի առնելով, որ նախաձեռնել է սահմանադրական բարեփոխումներ:

Երկրորդ տարբերակ եմ համարում. իշխանությունը քաղաքական կամք է դրսևորում ու կոմպրոմիսային մոտեցում է ցուցաբերում. եթե հնարավոր չէ հայտարարել, որ որոշումը չեղյալ է հայտարարվում, Հանրային ծառայությունները կարգավորող հանձնաժողովը որոշում է ընդունում անորոշ ժամկետով կասեցնել էլեկտրաէներգիայի սակագնի թանկացման որոշումը, այդ ընթացքում աուդիտ է սկսվում էլեկտրական ցանցերում, արդյունքը հասանելի է դառնում հասարակությանը: Այս դեպքում իշխանությունը պետք է հետամուտ լինի, որ թալանի թիկունքում կանգնած բոլոր պատասխանատուները ենթարկվեն պատասխանատվության: Եթե ցանկանում ենք կառուցել նորմալ պետություն, իշխանությունը պետք է գնա այս գործողություններին»:

Ն. Նորիկյանի խոսքով, եթե երկրի ղեկավարը երկու օր անընդմեջ պատրաստակամություն էր հայտնել հանդիպել երիտասարդներին, կարելի է ենթադրել, որ տեսակետ ունի ստեղծված իրավիճակից դուրս գալու վերաբերյալ: «Քանի որ երիտասարդները մերժեցին նախագահի հետ հանդիպման առաջարկությունը, կարծում եմ՝ Սերժ Սարգսյանը ինքը պետք է հասու դարձնի իր տեսակետը հանրությանը և հայտնի ստեղծված իրավիճակից դուրս գալու ելքերը»,- ասաց նա:

Ինչ վերաբերում է ՀԾԿՀ-ի ընդունած որոշման կասեցման, ըստ փաստաբանի, երկու ճանապարհով կարելի է հասնել դրան. «Կարգավորող մարմինը ինքն է նախաձեռնում և իր ընդունած որոշումը չեղյալ հայտարարում, անորոշ ժամկետով կասեցնում կամ որոշումն ունի մեջ մտնելուց հետո՝ օգոստոսի 1-ից, յոթօրյա ժամկետում բողոքարկվում է: Եթե դատարանը գտնում է, որ օրենքների խախտմամբ է հանձնաժողովը կայացրել որոշումը, առաջարկում է նույն հանձնաժողովին ընդունել նոր որոշում»:

Հիշեցնենք, որ Բաղրամյան պողոտայի սկզբնամասում շարունակվում է հունիսի 22-ից սկսված էլեկտրաէներգիայի սակագնի թանկացման դեմ քաղաքացիների բողոքի հավաքը: Քաղաքացիների միակ պահանջն է՝ կասեցնել էլեկտրաէներգիայի սակագնի թանկացման որոշումը:

Հանրային ծառայությունները կարգավորող հանձնաժողովը հունիսի 17-ին տեղի ունեցած նիստում մասնակի բավարարել է «Հայաստանի էլեկտրական ցանցեր» ընկերության հայտը. օգոստոսի 1-ից Հայաստանում էլեկտրաէներգիայի սակագինը կբարձրանա ոչ թե 17 դրամով, այլ 6,93 դրամով: