Ձեր վստահելի աղբյուրը

«Երեկ արտասովոր ոչինչ տեղի չի ունեցել: Տեղի է ունեցել այն, ինչ բեմից հայտարարվեց. արդյո՞ք մարդիկ ուզում են մնալ, թե չեն ուզում մնալ Բաղրամյան պողոտայում: Ով ցանկացավ մնալ, մնաց, ով ոչ՝ եկավ Ազատության հրապարակ: Նրանց նախաձեռնության մի մասը ուղեկցեց այստեղ, քանի որ մենք միշտ հայտարարել ենք, որ լինելու ենք ժողովրդի մեջ»,- Ազատության հրապարակում լրագրողների հետ զրույցում ասաց «Ոչ թալանին» նախաձեռնության անդամ Վաղինակ Շուշանյանը:

Հիշեցնենք, հունիսի 22-ից Բաղրամյան պողոտայի սկզբնամասում շարունակվում է էլեկտրաէներգիայի սակագնի թանկացման որոշման դեմ բողոքի հավաքը: Նախօրեին բողոքող քաղաքացիների մի մասը որոշեց իր պայքարը շարունակել Ազատության հրապարակում, մի մասն էլ շարունակում է մնալ Բաղրամյան պողոտայում:

Վ. Շուշանյանը նշեց, որ իրենք և Բաղրամյան պողոտայում մարդիկ ունեն, և Ազատության հրապարակում. «Հիմա բախտս բերեց, թե չբերեց, ես էլ էի այստեղ ուղեկցողների մեջ: Ես չեմ կարծում, որ արտասովոր բան է տեղի ունեցել, ուղղակի նախաձեռնությունը Բաղրամյան պողոտայում այս պահին այլևս նախաձեռնող չէ»:

Պատասխանելով հարցին, թե ինչու որոշեցին գալ Ազատության հրապարակ՝ արդյո՞ք ոստիկանության հայտարարության պատճառով, որ ուժ է կիրառելու, թե նախագահի հայտարարության, նա ասաց. «Ոչ, ուղղակի հանրությունը բաժանվեց երկու մասին: Մենք նախաձեռնության մի քանի անդամի հետ եկանք այստեղ: Այնտեղ հնարավոր չէր լինի կառավարումը մեր կողմից, քանի որ հայտնվել էին անհատներ, ովքեր հարցը տեղափոխում էին քաղաքական հարթակ: Իրավիճակը մեր վերահսկողությունից կարող էր դուրս գար, այդ պատճառով մենք այս պահին Բաղրամյան պողոտայում որպես նախաձեռնողներ հանդես չենք գալիս:
Որպես անհատ կարող եմ վերադառնալ Բաղրամյան պողոտա: Այնտեղ արդեն եղել եմ այսօր»,- ասաց նա:

Շարունակելով իր խոսքը, Վ. Շուշանյանը նշեց, որ նախաձեռնության ներսում տարաձայնություններ չկան, ուղղակի վերջին չորս օրում խմորումներ էին գնում, աշխատանք էր տարվում նախաձեռնության վրա. «Մենք թույլ չտվեցինք մինչև վերջ հասնել իրենց ուզածին: Հարցը տեղափոխում էին քաղաքական հարթակ»:

Պատասխանելով հարցին, թե ովքե՞ր, նա ասաց, որ չի ցանկանում ասել, թե ովքեր են նրանք: Ըստ նրա, երեկ մեծամասնությունը մնաց Բաղրամյան պողոտայում էմոցիոնալ ֆոնի վրա. «Ռադիկալ գործողությունների դրդողների էմոցիաների տակ մնացին այնտեղ»:

Իսկ թե ովքե՞ր են այսօր Բաղրամյան պողոտայում պայքարի առաջնորդները, նա ասաց, որ չգիտի:

Հետագա անելիքների մասին «Ոչ թալանին» նախաձեռնությունը, ըստ նրա, կտեղեկացնի, քննարկման փուլում է: Պատասխանելով հարցին, թե արդյո՞ք հնարավոր է վերադառնան Բաղրամյան պողոտա, Վ. Շուշանյանն ասաց. «Ամեն ինչ հնարավոր է: Նախաձեռնության անդամները և այստեղ են, և այնտեղ: Ես էլ համ այստեղ եմ լինելու, համ այնտեղ»:

Վ. Շուշանյանը նաև ասաց, որ նորմալ է վերաբերում իրեն դավաճանության մեջ մեղադրողներին. «Նորմալ է, հայի խասյաթ է: Անգամ կարող են լոլիկով խփել: Սովորական երևույթ է: Ամեն մեկը յուրովի է մտածում»: Ինչ վերաբերում է «իշխանության հետ գործարքի» գնալուն, նա նշեց. «Մենք հայտարարել ենք, որ երբևէ դուրս չենք գալու իրենց հետ կոնտակտի»:

Վ. Շուշանյանի խոսքով, հանության ճնշման տակ և իրավաբանական հարթության վրա պետք է փորձեն հասնել իրենց պահանջի ռացիոնալ և արագ լուծման, այն է՝ էլեկտրաէներգիայի սակագնի թանկացման որոշման վերջնական չեղարկում:
Նա նաև հայտնեց, որ իրենք դեռևս չեն որոշել, արդյոք կմասնակցեն աուդիտին, թե ոչ:

Հիշեցնենք, որ նախօրեին կառավարության աշխատակազմի ղեկավար նախարար Դավիթ Հարությունյանը ՀԷՑ-ում սպասվող աուդիտի վերաբերյալ ասել էր. «Ամենակարևորը աուդիտ և խորհրդատվություն անցկացնող ընկերության ընտրության հարցն է: Իմ նախնական պատկերացումներով՝ պիտի ընտրենք աշխարհի լավագույն 10 ընկերություններից մեկին, խորհրդակցենք հասարակական ակտիվիստների, խորհրդարանական ընդդիմության հետ, որ նրանք այդ ցանկից հնարավորություն ունենան ընտրել, ենթադրենք, 3-4-5 ընկերություն, որից հետո կանենք մրցույթ, կտեսնենք, թե որ ընկերությունը կառաջարկի լավագույն գինը»:

Նախորդող հրապարակում՝

Բաղրամյան պողոտա. «Լիդերի հարց լինելու խնդիր չկա»