Կնոջը գնդակահարել է ամուսինը, հիվանդասենյակում. Բժիշկ (տեսանյութ)

Իրավունք 14:00 30/06/2015

Կնոջը գնդակահարել է ամուսինը, հիվանդասենյակում. Բժիշկ (տեսանյութ)

Պերինատոլոգիայի, մանկաբարձության և գինեկոլոգիայի կենտրոնում (Հանրապետական հիվանդանոցի ծննդատանը) հրազենային կրակոցներից տուժած կնոջ վիճակը ծայրահեղ ծանր է, գտնվում է վիրասրահում, նրա հետ կատարվում են վիրաբուժական առաջնային վերամշակումներ: Այդ մասին քիչ առաջ «Արմենիա» հանրապետական բժշկական կենտրոնում հայտարարեց կենտրոնի վիրաբուժության գծով բժշկական տնօրեն Արսեն Գրիգորյանը:

Ավելի վաղ Panorama.am-ը տեղեկացրել էր, որ ծննդատան հիվանդասենյակներից մեկում նախնական տվյալներով, ամուսինը հրազենով կրակել էր կնոջ ուղղությամբ, այնուհետև ինքնասպան եղել:

Կենտրոնի տնօրենի փոխանցմամբ, տուժած կինը` Արարատի մարզից է: Երեխան ծնվել է կեսարյան հատմամբ:

«Դեպքը տեղի է ունեցել անհատական հիվանդասենյակում, ամուսնու կողմից գնդակահարվել է հրազենային զենքով և վիրավոր վիճակում կնոջն անմիջապես տեղափոխել են մեր վերակենդանացման բաժանմունք, կատարվել են լաբորատոր-գործիքային անհրաժեշտ միջոցառումներ: Հայտնաբերվել են բազմաթիվ գնդակային, բերկորային վիրավորումներ: Նախնական տվյալներով, երեք գնդակային վիրավորման հետ գործ ունենք` պարանոցի, ուսի և ծոծրակային շրջաններում», -տեղեկացրեց Արսեն Գրիգորյանը` ընդգծելով, որ երեխան այդ պահին հիվանդասենյակում չի եղել:

Նրա ներկայացմամբ, հրազենի փամփուշտներից մեկը դուրս է եկել մարմնից, իսկ մյուս երկուսը դեռ մարմնի մեջ են:

«Նեյրովիրաբույժներն աշխատում են և առաջին բուժօգնությունը ցուցաբերում են», -փոխանցեց բժիշկը:

Քննչական կոմիտեից Panorama.am-ին տեղեկացրին, որ հարուցվել է քրեական գործ` սպանության հատկանիշներով:

Առայժմ դեպքի հանգամանքների վերաբերյալ տեղեկություններ չեն հաղորդվում, դեպքի վայրում կատարվում են քննչական գործողություններ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: