Ձեր վստահելի աղբյուրը

«Այս համագումարը մեկ անգամ ևս թույլ տվեց ամփոփել մեր անցած ուղին, մեր առջև ծառացած խնդիրները, ինչպես նաև վերլուծել այն հաջողությունները, որոնք արձանագրվել են Հայաստանի առողջապահության համակարգում»,- այս մասին այսօր Հայաստանի 4-րդ միջազգային բժշկական համագումարի փակմանն ասաց ՀՀ առողջապահության նախարար Արմեն Մուրադյանը՝ անփոփելով համաժողովի արդյունքները:

«Մեր նպատակն է նաև հասկանալ, թե այն ճանապարհը, որ ընտրել է Հայաստանի առողջապահական համակարգը, որքանով է համահունչ միջազգային մարտահրավերներին»,- ասաց նախարարը:

Ա.Մուրադյանը ներկայացնելով Հայաստանի առողջապահական հիմնախնդիրները՝ նշեց, որ թեև տարեցտարի նվազում է մանկական և մայրական մահացությունը, իրականացվում են բազմաթիվ ծրագրեր, այդուհանդերձ մի շարք խնդիրներ դեռևս մտահոգիչ են: «Արդյոք Հայաստանը պատրաստ է միայն հիվանդանոցաշինությամբ, բժշկական ծառայությունների բարելավմամբ հաղթահարել այն մարտահրավերները, որոնք այսօր կան: Արդյոք այդ հնարավորությունները մենք ունենք, որ օրեցօր ավելի մատչելի ծրագրեր մշակենք կարևորագույն խնդիրները լուծելու համար»,- նշեց Արմեն Մուրադյանը՝ հավելելով, որ, բնականաբար, չեն կարող միայն հիվանդանոցաշիությամբ զբաղվել, քանի որ ամբողջ աշխարհը գնում է դեպի կանխարգելում, վաղ ախտորոշում:

Ըստ նախարարի՝ Հայաստանում ևս հստակ քայլեր են արվում վաղ ախտորոշման և կանարգելման ուղղությամբ: Նախարարը մատնանշեց իմունականխարգելման, սրտի անհետաձգելի վիրահատությունների, սկրինինգային, վարակիչ և ոչ վարակիչ հիվանդությունների դեմ պայքարին ուղղված ծրագրերը: Սակայն Ա.Մուրադյանը նշեց, որ այդ ծրագրերն իրականացնելու համար ի հայտ են գալիս լրջագույն խնդիրներ՝ կապված կրթական մակարդակի հետ: «Կրթության որակի բարձրացումը և նաև հանրային կարծիքի ձևավորումը մեզ համար կարևոր տարրեր են, որոնց միջոցով միայն կկարողանանք իրականացնել կարևորագույն ծրագրեր»,- ասաց Ա.Մուրադյանը՝ հավելելով, որ խոսքը վերաբերում է հանրային առողջապահությանն ուղղված ծրագրերի իրականացմանը:

Նախարարը շեշտեց, որ կրթության որակի բարձրացման արդյունքում կկարողանան ապահովել որակյալ բուժծառայություն: «Մեզ համար կարևորը որակն է, որակ, որը հուզական դաշտից պետք է դուրս գա: Այն հուզական դաշտում է հայտնվել այն պատճառով, որ մենք ժամանակին չենք կարողացել հստակ չափագրել, հաշվառելի դարձրել բժշկական օգնության խնդիրները: Առանց որակի հնարավոր չէ այսօր լուրջ ծրագրեր իրականացնել»,- ընդգծեց Ա.Մուրադյանը:

Նախարարը կարևորեց Ազգային ժողովում առաջին ընթերցմամբ ընդունված «Բնակչության բժշկական օգնության եւ սպասարկման մասին ՀՀ օրենքում փոփոխություններ և լրացումներ կատարելու մասին» ՀՀ օրենքի նախագիծը, որով առաջարկվում է ներդնել բժշկական շարունակական մասնագիտական զարգացման (ՇՄԶ) համակարգ, ինչը պայմանավորված է բժշկական կադրերի մասնագիտական ունակությունների ու գիտելիքների բարձրացման և բնակչությանը տրամադրվող բժշկական ծառայությունների որակի անընդհատ բարելավման անհրաժեշտությամբ:

«Օրինագծով փորձ է արվում աշխատանքները բարելավել, չափագրել և թույլ տալ չափորոշիչով աշխատող, կրեդիտներ հավաքող բժշկին ավելի վստահ և ամուր զգալ իրեն իր երկրում»,- ասաց Արմեն Մուրադյանը:

Նշենք, որ հուլիսի 2-ից 4-ը Հայաստանում անցկացվել է 4-րդ միջազգային բժշկական համագումարը, որին մասնակցել են միջազգային ճանաչում ունեցող փորձագետներ, առողջապահության ոլորտի մասնագետներ, Սփյուռքից ժամանած հայ բժիշկներ և բուժքույրեր:
2001 թվականից սկսած Հայաստանի Հանրապետության առողջապահության նախարարության և Հայ բժիշկների միջազգային կոմիտեի (AMIC) միջև պայմանավորվածություն է ձեռք բերվել Հայ բժիշկների միջազգային համագումարն անցկացնել Հայաստանում և Սփյուռքում համապատասխանաբար երկու տարին մեկ: Ընդ որում, մայր հայրենիքում Հայաստանի միջազգային բժշկական համագումար և սփյուռքում՝ Հայ բժիշկների համաշխարհային կոնգրես ձևաչափերով:

4-րդ համագումարի շրջանակներում բանախոսները և մասնակիցներն անդրադարձել են առողջապահությանն առնչվող կարևոր հիմնախնդիրներին: Մասնավորապես՝ ներկայացվել են ընդհանուր բժշկության, վիրաբուժության, ատամնաբուժության, բուժքույրական գործի, առողջապահական կրթության, էթիկայի, այլընտրանքային բժշկության ոլորտներում տեղի ունեցող զարգացումները, ինչպես նաև քննարկվել ենն հարակից բազմաթիվ ոլորտներին առնչվող այլ խնդիրներ: