Ձեր վստահելի աղբյուրը

Հունիսի 23-ին Բաղրամյան պողոտայում էլեկտրաէներգիայի սակագնի բարձրացման դեմ բողոքի ակցիայի ժամանակ ոստիկանության ծառայողների կողմից բռնության հետևանքով տեխնիկական վնասներ կրած որոշ լրատվամիջոցների ոստիկանությունը փոխհատուցում է տվել, ոմանց` ոչ, իսկ որոշներին էլ գույքը վերադարձվել է, բայց ոչ լիարժեք:

Խոսքի ազատության պաշտպանության կոմիտեի ներկայացրած տվյալներով, հիշեցնենք, հունիսի 23-ին Բաղրամյան պողոտայի դեպքերի ժամանակ 13 լրագրող և օպերատոր բռնության են ենթարկվել, ԶԼՄ-ների 15 ներկայացուցիչների լրագրողական մասնագիտական աշխատանքը խոչընդոտվել է: Կատարվածից ժամեր անց ՀՀ ոստիկանապետ Վլադիմիր Գասպարյանը հայտարարեց, որ լրագրողներին պատճառված նյութական վնասը ոստիկանությունը կվերականգնի:

Տեխնիկական մեծ վնաս էր կրել «Առաջին լրատվական»-ը: Լրատվամիջոցից Panorama.am-ին տեղեկացրին, որ իրենց փոխհատուցել են թվային տեսախցիկը և ուղիղ եթերն ապահովող համապատասխան սարքավորումը: Այդ օրը «Առաջին լրատվական»-ը տեղեկացրեց, որ իրենց օպերատոր Գոռ Հովհաննիսյանի աշխատանքը խոչընդոտել է անձամբ փոխոստիկանապետ Լևոն Երանոսյանը, ինչը ֆիքսել է iLur կայքէջի լրագրող Հակոբ Կարապետյանի ֆոտոխցիկը, որի հիշողության կրիչը ոստիկանները վերցրել են ու չեն վերադարձրել:

«Ինձնից ֆոտոխցիկի հիշողության քարտն են վերցրել և չեն վերադարձրել և կրիչի միջի ինֆորմացիան, ամենայն հավանականությամբ, կորել է: Կրիչը ինքնին մեծ արժեք չի ներկայացնում, բայց որոշակի արժեք ներկայացնում էր մեջի ինֆորմացիան` այնտեղ կային շատ կարևոր կադրեր, մասնավորապես այն, թե ինչպես է Լյովա Երանոսյանը խլում օպերատորներից մեկի տեսախցիկը և գետնով տալիս ու ջարդում»,-մեզ հետ զրույցում ներկայացրեց Հակոբ Կարապետյանը:

Լրագրողի խոսքով, փոխհատուցման փաստը իր համար երկրորդական է և կարևոր է քրեական գործ հարուցելը ու մեղավորներին պատասխանատվության ենթարկելը: Իր մասնագիտական գործունեությունը խոչընդոտելու և իր նկատմամբ «ապօրինի հարկադրանք» գործադրելու մասին Հակոբը հունիսի 26-ին հաղորդում է ներկայացրել ոստիկանություն և միայն երկու օր առաջ Ոստիկանության ներքին անվտանգության վարչությունից իրեն կանչել են ու փոխհատուցում առաջարկել:

«Փոխհատուցում առաջարկեցին, պայմանով, որ ես բողոքս հետ կվերցնեմ, բայց ես այդ պայմանին չեմ համաձայնել ու պնդել եմ, որ քրեական գործ հարուցվի: Ես հասկացա, որ իմ հաղորդումը ՀՔԾ ուղարկելու փոխարեն, ուղարկել են Ներքին անվտանգության վարչություն` ծառայողական քննություն անցկացնելու համար»,-հավելեց լրագրողը:

Նա ասաց նաև, որ այդ կապակցությամբ պատրաստվում է լրացուցիչ դիմում գրել ՀՔԾ-ին ու Գլխավոր դատախազությանը:

Հատուկ քննչական ծառայությունում բռնություն գործադրելով զուգորդված պաշտոնեական լիազորություններն անցնելու, պաշտոնատար անձանց կողմից պաշտոնեական դիրքն օգտագործելով` լրագրողի մասնագիտական օրինական գործունեությանը խոչընդոտելու, ուրիշի գույքը դիտավորությամբ ոչնչացնելու կամ վնասելու դեպքերի առթիվ հարուցված քրեական գործի շրջանակներում Հակոբ Կարապետյանին դեռ չեն կանչել հարցաքննության:

«Ես ճիշտն ասած, չգիտեմ` իմ դրվագը այդ քրեական գործում կա՞, թե՞ ոչ»,-նկատեց Կարապետյանը:

Հարցաքննության չի կանչվել նաև «Ֆոտոլուր» գործակալության լուսանկարիչ Հայկ Բադալյանը: Գործակալության տնօրեն Մելիք Բաղդասարյանը Panorama.am-ին ասաց, որ հունիսի 23-ին տուժածների թվում է եղել Հայկ Բադալյանը. նրա ֆոտոխցիկի հիշողության կրիչը վերցրել են, «թևերը ոլորել էին, նստեցրել մեքենան ու տարել էին քաղմաս»: Ոստիկանությունը Հայկի հիշողության կրիչը վերադարձրել է, բայց առանց այնտեղ եղած ինֆորմացիայի:

«Մեր հիշողության քարտում եղած լուսանկարները բոլորը ջնջել են, ինֆորմացիան մաքրել են, չիպը հետ են տվել: Ես հաշվում եմ, որ մենք վնասներ կրել ենք, որովհետև չիպի վրայի ինֆորմացիան հսկայական վնաս ա, որը ոչ մի ձևով չի կարա փոխհատուցվի»,-մեզ հետ զրույցում ասաց Մելիք Բաղդասարյանը:

Վերջինը, սակայն, Հայկի հայեցողությանն է թողել մեղավորներին պատասխանատվության կանչելու մասին հարցը, իսկ Հայկն էլ նրա խոսքով, արձակուրդում է ու տրամադրություն էլ չունի զբաղվել այդ հարցով:

Փոխարենը, ՀՔԾ կանչվել են «Հետք»-ի երկու լրագրողները՝ Անի Հովհաննիսյանը և Հրանտ Գալստյանը, ովքեր նույնպես հունիսի 23-ին տուժել էին ոստիկանների գործողություններից: Հրանտի փաստաբան Գրիշա Բալասանյանը Panorama.am-ին ասաց, որ լրագրողները կգնան հարցաքննության, թեև որևէ ակնկալիք չունեն, որ քրեական գործը դրական լուծում կստանա, իսկ մեղավորներն էլ կպատժվեն:

«Հարուցված քրեական գործով մինչ օրս չկան ոչ կասկածյալներ և ոչ էլ մեղադրյալներ, թեև մամուլը հեղեղված է բռնություն կիրառելու հրաման տված և այն իրականացրած բարձրաստիճան ոստիկանների մասին նյութերով: Իսկ ինչ վերաբերում է ոստիկանապետի հայտարարությանը, թե բոլոր տուժած լրագրողները կփոխհատուցվեն, այդ թվում՝ վնասված տեխնիկայի մասով, արվել է լարված իրավիճակը հանդարտեցնելու նպատակով: Մասնավորապես՝ այդ օրը վնասվել է նաև «Հետքի» ֆոտոլրագրողի ֆոտոապարատը, սակայն ոչ մի փոխհատուցում չի եղել: Պատկան մարմինները շատ լավ գիտեն, թե ովքեր են բռնություն կիրառողները, կան այդ մասին վկայող լուսանկարներ, տեսանյութեր, սակայն սայլը տեղիչ չի շարժվում, որովհետև հանցագործությունը բացահայտելու ցանկություն չունեն: Եթե լիներ այդ ցանկությունը, ապա հաշված ժամերի ընթացքում մեղադրյալի կարգավիճակում պետք է հայտնվեին մի շարք բարձրաստիճան պաշտոնյաներ, ինչը դժվար տեղի ունենա», -ասաց Բալասանյանը:

ՀՔԾ լրատվական ծառայությունից Panorama.am-ին փոխանցեցին, որ այս պահին չեն կարող ասել, թե քանի լրագրող է անցնում այս գործով, արդյոք կա՞ն տուժածներ ու կասկածյալներ: