Ձեր վստահելի աղբյուրը

Ճարտարապետները դեմ են «Զվարթնոց» օդանավակայանի Կոնցեսիոների կողմից ներկայացված նախագծին, ըստ որի «Զվարթնոց» օդանավակայանի Կլոր մասնաշենքի քանդվելու է: Հանրային խորհրդում ֆինանսատնտեսական և բյուջետային հարցերի հանձնաժողովի, քաղաքաշինության, մշակույթի, պատմական-ազգային արժեքների, հուշարձանների պահպանության, պատկանելիության և օգտագործման հարցերի ենթահանձնաժողովների կողմից հրավիրված քննարկման ժամանակ ասաց ճարտարապետ Սաշուր Քալաշյանը:

«Կոնցեսիոները ներկայացրել է նախագիծ, որը քննարկումների արդյունքում մենք մերժել ենք: Ըստ կոնցեսիոների, շենքն անհույս վիճակում է, իրենից վտանգ է ներկայացնում»,- նշեց նա:

Ս. Քալաշյանն ասաց, որ ճարտարապետները դեմ են այդ նախագծին, քանի որ չի ապահովում իրենց պահանջները հուշարձանի պահպանման հարցում: Նա նաև հայտնեց, որ դեռևս մեկ տարի առաջ Ճարտարապետների միությունը դիմել էր մշակույթի նախարարություն՝ Զվարթնոցի կլոր շենքն ընդգրկել պետության կողմից պահպանվող հուշարձանների ցանկում, սակայն մինչ այժմ արձագանք չկա:

Քննարկմանը ներկա Ճարտարապետների միության նախագահ Մկրտիչ Մինասյանն ասաց, որ առաջիկայում կլինի քննարկում:
Ս. Քալաշյանն առաջարկում է կոնցեսիոներին ներկայացված նախագիծը չեղյալ համարել, հաջորդ նախագիծը մշակել՝ համագործակցելով հեղինակների հետ:

Հանրային խորհրդի քաղաքաշինության ենթահանձնաժողովի նախագահ Գրիգոր Ազիզյանն ասաց, որ ճարտարապետները ներկայացրել են իրենց նախագիծը, որով առաջարկվում է կլոր շենքը բարեկարգել, ուժեղացնել, համապատասխանեցնել ժամանակակից նորմերին:

«Դրա հնարավորությունը կա: Կոնցեսիոները պնդում է, որ մեծ ծախսերի հետ է կապված, անհնարին է, բայց մեր առաջարկով բավականին մատչելի հնարավոր է հասնել հուշարձանի պահպանությանը»:

Ճարտարապետ Հրաչյա Պողոսյանն ասաց, որ Զվարթնոցի կլոր շենքը Հայաստանի համար մշակութային, պատմական, քաղաքաշինական բարձր արժեք է ներկայացնում. «Մենք չենք ուզում այն կորցնել: Կոնցեսիոները չի կարողանում ճիշտ լուծումներ գտնել: Հանրային խորհուրդը պետք է վճռական լինի: Արդեն մի քանի անգամ է այս հարցը քննարկվել է, անհրաժեշտ է մեկընդմիշտ փակվի այս հարցը, լուծում գտնել»:

ՀԽ մշակույթի ենթահանձնաժողովի նախագահ Գագիկ Մանասյանն ասաց, որ Հանրային խորհուրդն ընդամենը խորհրդատվական մարմին է, չի կարող որևէ մեկին պարտադրել որևէ քայլ անել: Քննարկման ներկաներից մեկը տեղից արձագանքեց. «Այդ դեպքում պետք է ցրել այս մարմինը»:

ՀԽ ֆինանսատնտեսական և բյուջետային հարցերի հանձնաժողովի նախագահ Վազգեն Սաֆարյանի խոսքով էլ, այն, որ ՀՀ քաղավիացիայի վարչությունը կրկին անգամ դիմել է Հանրային խորհրդին, որպեսզի հարցը քննարկվի, արդյունքները ներկայացվի կոնսեցիոներին, արդեն նշանակում է, որ ՀԽ կարծիքը հաշվի են առնում:

Քննարկմանը ներկա «Արմենիա» օդանավակայններ ՓԲԸ ենթակառուցվածքների մենեջեր, ճարտարապետ Լուկաս Պերես Մոնսալն ասաց, որ ՀՀ քաղավիացիայի վարչության կողմից ընկերությանն առաջարկություն է եղել, թե ինչպես կարելի է ընդլայնել օդանավակայանը:

«Այնպես չէ, որ մենք չենք արժեվորում հուշարձանը, լավ հասկանում ենք արժեքը, բայց օդանավակայանի փորձագետների կարծիքով կլոր շենքը չենք կարող կիրառել որպես ժամանակակից պայմաններին համահունչ շենք, քանի որ հենց սկզբից որոշվել է, որ պետք է այլ համալիր կառուցվի՝ ընդլայնելով օդանավակայանը»:

Ներկա ճարտարապետներից մեկն իր խոսքն ուղղելով կոնցեսիոների ներկայացուցչին, ասաց, որ ժամանակին հայ ճարտարապետները կառուցել է շատ լավ շենք՝ և իր ճարտարապետական տեսքով, և որակով, իսկ եթե այն չեն կարողանում վերանորոգել, արդեն իրենց մասնագետների խնդիրն է:

«Չկա սև ձեռք, որ ուզում է քանդել շենքը: Քաղավիացիայի կողմից առաջարկություն է եղել ընդլայնել օդանավակայանի տարածքը, ինչն էլ մենք տեսնում ենք նոր համալիրի կառուցմամբ»,- ասաց Լուկաս Պերեսը:

Երևանի «Զվարթնոց» միջազգային օդանավակայանը հիմնադրվել է 1961թ., նոր շենքը (կլոր) նախագծվել է 1974թ., շահագործման է հանձնվել 1982 թվականին, ճարտարապետներն են` Ա. Թարխանյանը, Ս. Խաչիկյանը, Ժ. Շեխլյանը, Լ. Չերքեզյանը: Օդանավակայանի նոր մասնաշենքը շահագործման է հանձնվել 2011-ի աշնանը:

Նախորդիվ`

Գրիգոր Ազիզյան. «Զվարթնոցի»-ի Կլոր մասնաշենքը պահպանելու գործընթացով ենք գնում
Քննարկվել է «Զվարթնոց» օդանավակայանի հին ուղևորային համալիրի պահպանման հարցը
«Կործանելով գնալու ենք». Մտավորականներն անհանգիստ են
«Զվարթնոցի» Կլոր շենքի քանդման դեմ էլէկտրոնային ստորագրահավաք է սկսվել
Ճարտարապետ. «Զվարթնոց»-ի հին շենքն ուղղակի խնամքի կարիք ունի
«Զվարթնոցի կլոր շենք»-ի հետ կապված ՀԽ-ն իր հերթին քննարկելու է Կոնցեսիոների առաջարկները
Մինասյան. Զվարթնոցի հին մասնաշենքը քանդելու կառավարության որոշում չկա
ՀԽ-ն չի ստացել «Զվարթնոց»-ի կլոր շենքի հետ կապված մի շարք հարցերի պատասխաններ
Կարծիքներ Զվարթնոցի Կլոր շենքը քանդելու որոշման շուրջ
«Զվարթնոց» օդանավակայանի հին մասնաշենքը հաստատ կքանդվի. Արտյոմ Մովսեսյան
101,1 մլն դոլարի ներդրում՝ Զվարթնոցում, վարչապետը կողմ է հին մասնաշենքի ճարտարապետական ժառանգությունը պահպանելուն
Ուղերձ. Ծածկած շուկայի դառը փորձից ելնելով՝ հսկողության ռեժիմ սահմանել «Զվարթնոցի» հին մասնաշենքի մոտ
Քաղավիացիայի վարչությունը դրական եզրակացություն է տվել «Զվարթնոցի» հին շենքը քանդելու հարցը ներառող մաստեր-պլանին
«Զվարթնոցի» հին շենքի մասին ևս մեկ անձնական կարծիք. Արտյոմ Մովսեսյան
Հանրային խորհուրդը դեմ է «Զվարթնոցի» հին շենքի քանդմանը. «Հիմնավոր փաստարկներ չկան»
Գրիգոր Ազիզյան. «Զվարթնոց»-ի հին շենքը հնարավոր է ամրացնել, ժամանակին առաջարկվել է շենքի ամրացման վեց տարբերակ
Անահիտ Թարխանյան. «Զվարթնոցի» հին շենքի երեսպատումը բարբարոսաբար քանդվել է, բայց շենքը սեյսմակայուն է