Ձեր վստահելի աղբյուրը

«Սևանի իշխանի պաշարների վերականգնման և ձկնաբուծության զարգացման համալիր ծրագրի» շրջանակներում «Սևանի իշխանի պաշարների վերականգնման և ձկնաբուծության զարգացման» հիմնադրամի կողմից լիճ է բաց թողնվել շուրջ 200 000 հատ իշխան՝ 40 000 մինչև 30 գրամ և 160 000` մինչև 5 գրամ կշռող մանրաձկներ:





Հիմնադրամի մամուլի ծառայությունից հիշեցնում են,  որ սա Հիմնադրամի կողմից իրականացրած երկրորդ խոշոր միջոցառումն է՝ առաջին մանրաձկան բացթողումը կայացել էր 2015 թ. հունիսի 23-ին (43 000 հատ 30 գրամանոց ձկներ):


Հիմնադրամի կարևորագույն նպատակներից մեկն է՝ Սևանա լճի էնդեմիկ ձկնատեսակների` գեղարքունի և ամառային իշխանի պաշարների վերականգնման կայուն ընթացքի ապահովումը: Գաղտնիք չէ, որ դեռ 1940-ականների սկզբից Սևանի իշխանի թվաքանակը սկսել էր նվազել, իսկ 1978 թվականին այն արդեն ընդգրկվել էր ԽՍՀՄ Կարմիր գրքի մեջ: Չնայած լճից ձկնորսության արգելքներին և պլանավորված մանրաձկան պաշարների տարեկան ավելացման ծրագրին` ներկայումս իշխանը զուրկ է բնական ինքնավերարտադրության հնարավորությունից:



Հայտնի է, որ Սևանի իշխանը կարող է բազմանալ միայն մաքուր ջրում, սակայն գետերը և վտակները, որտեղ ձուկը կարող է բնականոն ձևով ձվադրել և վերարտադրվել, այսօր գտնվում են անհուսալի վիճակում: «Սևանի իշխանի պաշարների վերականգնման և ձկնաբուծության զարգացման» հիմնադրամը իրականացնելու է անհրաժեշտ բնապահպանական միջոցառումներ՝ Սևանի իշխանի բնական վերարտադրության պայմանների ապահովման համար:

Սևանա լճի բնապահպանական խնդիրների լուծման համար անհրաժեշտ ֆինանսական միջոցները կգոյանան հիմնադրամի կողմից ստեղծված ընկերությունների շահույթից, ինչպես նաև ցանցավանդակային տնտեսությունների կողմից յուրաքանչյուր մեկ կիլոգրամ ձկան վաճառքից 200 դրամ հիմնադրամին փոխանցվող վճարներից: Արդյունքում՝ պարբերաբար իրականացվող բնապահպանական միջոցառումները կնպաստեն լճի ջրի որակի աստիճանական լավացմանը և էկոհամակարգի հավասարակշռության վերականգնմանը:


Այսպիսով, իրականացվող բնապահպանական միջոցառումների շնորհիվ լճում կվերականգնվեն էնդեմիկ ձկնատեսակների՝ գեղարքունի և ամառային ենթատեսակների իշխանի պաշարները, կբարելավվեն իշխանի համար ձվադրավայր հանդիսացող գետերի էկոլոգիական վիճակը, որը կնպաստի իշխանի բնական վերարտադրությանը և պոպուլյացիաների ձևավորմանը, իսկ հետագայում` արդյունագործական ձկնորսության վերականգնմանը: