Ձեր վստահելի աղբյուրը

Շիրակի մարզում Գյումրի-Կրաշեն երթուղին սպասարկող «ՊԱԶ» մակնիշի ավտոբուսում օրերս տեղի ունեցած դժբախտ դեպքը մի շարք հարցեր է առաջացնում. ինչո՞ւ է արգելակների հետ խնդիրներ ունեցող ավտոբուսը դուրս եկել երթուղի, արդյոք ստուգվե՞լ է ավտոբուսը երթուղի դուրս գալուց առաջ և վերջապես ինչո՞ւ են Հայաստանում շարունակում իրենց դարն ապրած «ՊԱԶ»-իկներ օգտագործել:

Հիշեցնենք, Քննչական կոմիտեն տեղեկացրել էր, որ հուլիսի 5-ին Գյումրի-Կրաշեն երթուղին սպասարկող ընկերությանը պատկանող «ՊԱԶ 762» մակնիշի ավտոբուսը Կրաշեն գյուղից ընթացել է դեպի Գյումրի։ Գյուղում ավտոբուսի արգելակները խափանվել են և Կրաշեն գյուղի 3-րդ և 6-րդ փողոցների խաչմերուկին նշված ավտոբուսի ուղևորուհի Ջուլիետա Իսկանդարյանն ընթացքի ժամանակ ավտոբուսի առջևի բաց դռնից ցատկել ու ընկել է ասֆալտապատ գետնին: Ստացած մարմնական վնասվածքներից կինը հիվանդանոց տեղափոխվելու ճանապարհին մահացել է: Հարուցված քրեական գործի շրջանակներում նախաքննությունը կպարզի դեպքի հանգամանքները, բայց մինչ այդ փորձեցինք հասկանալ` ի՞նչ են մտածում «ՊԱԶ»-իկների շահագործումը թույլ տվող պատկան մարմինները:

Գյումրի-Կրաշեն երթուղին սպասարկում է «Միգ Թամ» ՍՊ ընկերությունը, որը նաև սպասարկում է Գյումրի և այլ գյուղական համայնքներ` Հացիկ, Կամո և այլ երթուղիները: Շիրակի մարզպետարանի Տրանսպորտի և ճանապարհաշինության բաժնի պետ Խաչատուր Խանվերցյանը Panorama.am-ին տեղեկացրեց, որ կառավարության թիվ 762 որոշմամբ, ավտոբուսների շահագործման տարիքային սահմանափակում գոյություն չունի:

«Այդ որոշմամբ, կան գնահատման չափանիշներ: Եթե մրցույթի ժամանակ տվյալ ընկերության ներկայացրած հայտը ստացել է 70-ից բարձր բալ, ապա մրցութային հանձնաժողովը թույլատրում է շահագործել: Եթե Կրաշենի երթուղին սպասարկող տրանսպորտային միջոցը ստացել է 70 և ավելի միավոր, ապա նրան թույլատրել են շահագործել երթուղին: Այսինքն, ավտոբուսների նկատմամբ տարիքային սահմանափակում չկա: Իսկ միկրոավտոբուսների համար, օրինակ կա սահմանափակում` 15 տարեկանից ավելի միկրոավտոբուսները արգելվում է օգտագործել», -ասաց Խանվերցյանը:

Մարզպետարանի պաշտոնյայի խոսքով, ավտոբուսի տեխնիկական վիճակը ստուգելու իրավասությունը պատկանում է տրանսպորտի տեսչությանը, այս դեպքում` Շիրակի մարզային տեսչությանը:

«Տեսչությունը վերահսկում է յուրաքանչյուր օր տրանսպորտային միջոցների շահագործումը` առավոտ երթուղի դուրս գալուց առաջ և հետո: Ճանապարհային վերահսկողության չափանիշները դրված են Տեսչության վրա», -ասաց նա:

Շիրակի մարզային տեսչության պետ Արտյոմ Անտիկյանը, սակայն, հավանաբար, կամ չի տիրապետում իր ղեկավարած կառույցի իրավասություններին կամ էլ դեպքի մասին լսելուց հետո, փորձեց «ջրից չոր դուրս գալ»:

«Էդ ավտոբուսի մոտ կարող է տեխնիկայի ատկազ եղած լինի, բայց ինքը մրցութային հանձնաժողովով անցած է»,- տվյալ «ՊԱԶ»-ի մասին մեր հարցին ի պատասխան ասաց պաշտոնյան:

Նա, ի տարբերություն մարզպետարանի պաշտոնյայի, ասաց, որ իր ղեկավարած տեսչությունը ստուգում է միայն երթուղին սպասարկող ավտոբուսների չվացուցակը ու հավելեց. «Մենք չենք հետևում` ինչ վիճակում է ավտոբուսը»:

Այլ հարցերի պաշտոնյան կտրուկ հրաժարվեց պատասխանել` անջատելով հեռախոսը:

Տրանսպորտի և կապի փոխնախարար Արամ Արսենյանը վստահեցրեց, որ Տրանսպորտի տեսչությունը ընթացիկ ստուգումներ իրականացնում է, բայց մինչ այդ, երթուղիներ սպասարկող ընկերությունները մասնակցում են մրցույթին և եթե բավարարում են պահանջները, ապա նրանց հայտը ընդունվում է:

«Այլ խնդիր է, որ երթուղին սպասարկելու ընթացքում այդ մեքենաների մի մասի մոտ ի հայտ են գալիս նոր թերություններ, որոնց ամեն օր չէ, որ հնարավոր է հետևել: Այդ մեքենաների ամենօրյա տեխնիկական վերահսկողությունը շատ դժվար է իրականացնել, մանավանդ եթե դրանք ներմարզային երթուղիներ են, ինչը մեր նախարարության իրավասությունից դուրս է»,-Panorama.am-ի թղթակցի հետ զրույցում նկատեց փոխնախարարը:

Մեր հարցին, թե ի՞նչ է անհրաժեշտ, որպեսզի Հայաստանը հրաժարվի «ՊԱԶ»-իկներ շահագործելուց, Արսենյանը պատասխանեց. «Պետք է, որ օրեցօր ավելի առաջ գնանք, օրեցօր ավելի լավ մեքենաներ ձեռք բերենք: Միայն ցանկությունը չէ: Տնտեսվարողները պետք է ունենան ֆինանսական հնարավորություններ»:

Դիտարկմանը, թե գուցե տնտեսվարող սուբյեկտների առջև դրվող պահանջները խստացվեն, փոխնախարարը արձագանքեց, որ դա ճիշտ կլիներ, բայց հետագա սոցիալական խնդիրներից խուսափելու համար, զգուշորեն պետք է այդ քայլին գնալ, քանի որ, նրա խոսքով, ոչ բոլոր տնտեսվարողներն ունեն ներդրումներ անելու հնարավորություն:

«Մենք նոր նախաձեռնությամբ ենք հանդես գալու, որ ավտոբուսների համար տարիքային սահմանափակումը նվազեցվի և շուտով կառավարությունում կքննարկվեն այդ մասին օրինագծերը ու կունենանք նոր օրինագիծ, որպեսզի ավելի երիտասարդ, ավելի թարմ ու ավելի նոր մեքենաներ մտնեն երթուղիներ», -հավելեց պաշտոնյան: