Պիպոյան. «Երևան Ջուր»-ը սակագինը չբարձրացնելով՝ կանխարգելեց լուրջ ստուգումների իրականացումը
«Երևան Ջուր» ընկերության կողմից սակագնի բարձրացման առաջարկից հրաժարվելն ու Հանրային ծառայությունները կարգավորող հանձնաժողովի կողմից հրավիրած նիստում ջրի սակագինը նույնը թողելը «Իրազեկ և պաշտպանված սպառող» ՀԿ նախագահ Բաբկեն Պիպոյանը որակում է որպես սատիրիկ պատմություն, որտեղ ծաղրի առարկան հանձնաժողովն է:
««Երևան Ջուր» ընկերությունը հերթական անգամ անկախ գործունեություն է ծավալում, անում է այն, ինչ ցանկանում է՝ հաշվի չառնելով, որ կա վերահսկող մարմին»,-Panorama.am-ին նման տեսակետ հայտնեց ՀԿ նախագահ Բաբկեն Պիպոյանը:
Նրա խոսքով, եթե հանձնաժողովն ըստ էության վրահսկողություն իրականացներ, ապա խմելու ջուր մատկարարող ընկերությունը ոչ միայն իրեն այդքան ազատ չէր զգա, այլև շատ ավելի մեծ ներդրումներ իրականացրած կլիներ, քան մինչ օրս իրականացրել է:
Պիպոյանը նկատում է, որ ջրի չթանկանալը քաղաքացիների համար լավ լուր է, բայց հիմնավորումը լիարժեք չէ, թե ինչի հաշվին է դա լինելու. «Հիմա հարց է առաջանում ՀԾԿՀ-ն ունի՞ արդյոք մոնիտորինգ, արդյոք 2016 թ. ավարտը ընկերությունը կկարողանա իր ստանձնած պարտավորությունները իրականացնել, ի՞նչ ներդրումներ է անելու: Սպառողին շատ հաճելի է, որ նրա գրպանին չկպնեն, սակայն չլինի այնպես, որ դա վաղը մեզ ծանր հետևանքների առաջ կանգնեցի: Հիմա մենք տնտեսվարողի գործունեությունն ենք քննարկում այն դեպքում, երբ որ պետությունը պետական բյուջեից, իմ և ձեր վճարած հարկերից աշխատավարձ է վճարում, չինովնիկներ պահում, որ մարդկանց հարցերի պատասխանները տան»:
ՀԿ նախագահը հոկտեմբերի 27-ի դեպքերից հետո Սուրեն Աբրահամյանի հրաժարականից հետո չի հիշում մի չինովնիկի, ով հայտարարի չի կարողանում աշխատել ու հրաժարական տա, չի հիշում, որ կառավարությունում մի չինովնիկի աշխատանքից ազատեն լավ աշխատել չկարողանալու պատճառով. «Եթե Նազարյան Ռոբերտն աշխատանքից ազատված լիներ լավ չաշխատելու պատճառով, դա սիգնալ կլիներ նաև մյուսների համար: Հաստատ ինքը քավության նոխազ չէ այս պարագայում»:
Հարցին, արդյոք Բաղրամյանի դեպքերը նպաստեցին, որ «Երևան Ջուր» ընկերությունը հրաժարվի սակագնի բարձրացնելու վերաբներյալ առաջարկից, Պիպոյանը պատասխանեց. «Իհարկե, դա ևս նպաստեց, քանի որ կար սոցիալական ընդվզում, շատ հանգիստ սոցիալական ընվզման մեջ կարող էին լինել շղթայական կետեր, ուստի պահանջը կարող էր լինել ոչ միայն չթանկացնելը, այլ աուդիտի և ուսումնասիրության անցկացումը, որոնք կարող էին լուրջ խնդիրներ վեր հանել: «Երևան Ջուր»-ի այս քայլը կանխարգելիչ է՝ լուրջ ստուգումների իրականացման համար»:
Հիշեցնենք, որ «Երևան Ջուր» ընկերությունը դիմել էր Հանրային ծառայությունները կարգավորող հանձնաժողովին անփոփոխ թողնել ջրի սակագինը՝ հիմնավորելով այսպես.
«Երևանի ջրամատակարարման և ջրահեռացման համակարգերի «Վարձակալության պայմանագրի» իրականացման 9 տարիների (2006-2015 թթ.) ընթացքում «Երևան ջուր» ՓԲԸ-ն համակարգի շահագործման արդյունավետության բարձրացմանն ուղղված իր հետևողական աշխատանքի և անընդհատ իրականացվող նախաձեռնությունների շնորհիվ կարողացել է համակարգում էլեկտրաէներգիայի ծախսը նվազեցնել ավելի քան 81 տոկոսով, որը սպառողներին խմելու ջրի մատակարարաման, ջրահեռացման և կեղտաջրերի մաքրման ծառայությունների մատուցման սակագների ճշգրտման հաշվարկում էական գործոն է: Հաշվի առնելով այս հանգամանքը և ելնելով ներկա փուլում հանրային ծառայությունների գների ավելացումների պայմաններում հաճախորդների բեռը թեթևացնելու անհրաժեշտությունից, «Վեոլիա» ընկերությունը որոշում է կայացրել չպնդել սակագնի ավելացումը և այն թողնել անփոփոխ»:
Լրահոս
Տեսանյութեր
ԱՄՆ-ում հրդեհների հետևանքով մոխրացել է Սահակ-Մեսրոպ հայ քրիստոնյա վարժարանը
