Մշակույթի նախարարը ՅՈՒՆԵՍԿՕ-ի ներկայացուցչի հետ քննարկել է Սիրիայում ոչնչացվող հուշարձանների խնդիրը
Հայաստանը մեծ կարևորություն է տալիս ՅՈՒՆԵՍԿՕ-ի գործունեությանը մշակութային արժեքների պահպանության հարցում։ Այս այցով դուք հնարավորություն կունենաք ճանաչելու մեր երկիրը: Ասել է ՀՀ մշակույթի նախարար Հասմիկ Պողոսյանը այսօր ՅՈՒՆԵՍԿՕ-ի գլխավոր տնօրենի մշակույթի հարցերով օգնական Ալֆրեդո Պերես դ՚ Արմինիանի հետ հանդիպման ժամանակ:
Նախարարը շնորհակալություն է հայտնել ՅՈՒՆԵՍԿՕ-ի 70-ամյակի շրջանակներում «Մշակութային քաղաքականություն, քաղաքականություն մշակույթի համար. Մշակույթի դերը «Ետ-2015 թ. զարգացման օրակարգում» 3-րդ միջազգային խորհրդաժողովին մասնակցելու հրավերն ընդունելու համար։ Այս մասին հայտնում են Armeniangenocide100.org-ից:
Կարևորելով համագործակցությունը ՅՈՒՆԵՍԿՕ-ի հետ՝ Հասմիկ Պողոսյանն ընդգծել է, որ ՅՈՒՆԵՍԿՕ-ն կազմակերպություն է, որն այս արագ փոփոխվող աշխարհում կարևորագույն առաքելություն է իրականացնում՝ մշակույթի և կրթության, ազատ արտահայտման իրավունքի պահպանման գործում:
«Մեր մշակույթը, և հետագայում մեր համագործակցությունն ավելի ակտիվ կլինի»,- նշել է Հասմիկ Պողոսյանը՝ ընդգծելով, որ մերօրյա աշխարհում անգերագնահատելի է մշակույթի դերն ու նշանակությունը։
«Ներկայում Սիրիայում ոչնչացվում են հուշարձաններ, այդ թվում՝ նաև հայկական։ Եվ մենք հավասարապես մտահոգվում ենք բոլոր հուշարձանների ճակատագրով։ Վստահ եղեք, որ Հայաստանը ձեռնարկում է բոլոր անհրաժեշտ միջոցները` զինված ընդհարումների դեպքում մշակութային արժեքների ապօրինի ներմուծման, արտահանման և սեփականության իրավունքի փոխանցման արգելումն ու կանխումն ապահովելու նպատակով»,- նշել է Հասմիկ Պողոսյանը՝ հավելելով, որ ամեն դեպքում ինքը լավատես է, քանի որ ոչ մեկին դեռևս չի հաջողվել ավիրել մշակութային աշխարհը։
Ալֆրեդո Պերես դ՚ Արմինիանի խոսքով՝ ՅՈՒՆԵՍԿՕ-ն 2 գաղափարի կողմնակից է՝ միացյալ համերաշխ աշխարհի և միևնույն ժամանակ մշակութային բազմազանության և բազմաքանակության.
«Մշակույթը բազմաբովանդակ երևույթ է և ինչպես «Ետ-2015 թ. զարգացման օրակարգում» է նշվում, մշակույթի պահպանման և բազմազանության համար կարևոր է մշակութային ինքնության գիտակցումը: Ցավալի է, որ հազարամյակի նպատակների ցանկում (Millenium Development Goals) մշակույթին պատշաճ ուշադրություն չեն դարձրել և շեշտը դրել են հիմնականում տնտեսական զարգացման վրա»,- նշել է Ալֆրեդո Պերես դ՚ Արմինիանը:
«Շատ կարևոր է մշակույթի զարգացումը. հասարակության մտավոր զարգացումը մեր ապագան է, աշխարհի վաղվա քաղաքացին է, ինտելեկտուալ մարդը, ով չի կործանելու աշխարհը»,- ասել է Հասմիկ Պողոսյանը և հավելել, որ հարյուրամյակներ ի վեր Հայաստանը չի ունեցել պետականություն, սակայն զարգացել է այն հայ անհատների շնորհիվ, ովքեր ինտեգրվելով եվրոպական մշակույթի մեջ՝ զարգացրել են այն։
«Մենք բազմաթիվ մշակույթներից մեկն ենք և այդ իրավահավասարության սկզբունքները շատ կարևոր են մեզ համար: Դրա ապացույցները շատ են մեր երկրում՝ հրեական գերեզմանը, Կապույտ մզկիթը, թուրքմենական դամբարանը և այլն»,- նշել է Հասմիկ Պողոսյանը:
ՀՀ մշակույթի նախարարի խոսքով` մենք ամեն ինչ անում ենք ՅՈՒՆԵՍԿՕ-ի մարդկության ոչ նյութական և համաշխարհային ժառանգության ցանկերը հայկական ավանդական մշակույթի տարրերով համալրելու ուղղությամբ։
«Մեր երկիրը գեղեցիկ է, հիանալի, ջերմ, արևոտ։ Ով մեկ անգամ այցելում է, հետո մշտապես ցանկություն է ունենում վերադառնալու»,- եզրափակել է Հասմիկ Պողոսյանը։
Հանդիպման ավարտին Հասմիկ Պողոսյանը Ալֆրեդո Պերես դ՚ Արմինիանին նվիրել է հայկական դուդուկ և Թորոս Ռոսլինին նվիրված հուշադրամ։
Ալֆրեդո Պերես դ՚ Արմինիանը շնորհակալություն է հայտնել հրավերի, համագործակցության և ցուցաբերած մեծ պատրաստակամության համար և խոստացել կրկին վերադառնալ։
Լրահոս
Տեսանյութեր
Մենք Թումանյանին այնքան էլ լավ չգիտենք. Թանգարանի տնօրեն
