ՅՈՒՆԵՍԿՕ-ի ներկայացուցիչը չպատասխանեց հայկական հուշարձանների ոչնչացման վերաբերյալ հարցին

Հասարակություն 15:40 11/07/2015

ՅՈՒՆԵՍԿՕ-ի ներկայացուցիչը չպատասխանեց հայկական հուշարձանների ոչնչացման վերաբերյալ հարցին

«Հայաստանը շատ կարևոր դեր է խաղում այսօրվա մշակութային ոլորտում, հատկապես միջմշակութային երկխոսություններում: Իրականում Հայաստանը մասնակցություն ունենալով միջմշակութային երկխոսության մեջ, ձեռք է բերել սեփական ինքնությունը հենց այս մշակութային պատմության մեջ»: Լրագրողների հետ զրույցում ասաց ՅՈՒՆԵՍԿՕ-ի գլխավոր տնօրենի մշակութային հարցերով օգնական Ալֆրեդո Պերես դ‘Արմենիանը:

Նա մասնակցում է Երևանում ընթացող «Մշակութային քաղաքականություն, քաղաքականություն մշակույթի համար. մշակույթի դերը «Ետ-2015» զարգացման օրակարգում» խորագրով միջազգային կոնֆերանսին, որը նվիրված է ՅՈՒՆԵՍԿՕ-ի հիմնադրման 70-ամյակին:

Հարցին, թե բազմիցս ահազանգ է հնչել, որ տարածաշրջանում, Մերձավոր Արևելքում հայկական մշակութային հուշարձանները ոչնչացվում են, պղծվում են, ի՞նչ գործուն քայլեր է ձեռնարկել կամ ձեռնարկում ՅՈՒՆԵՍԿՕ-ն, Ալֆրեդո Պերես դ‘Արմենիանն ասաց, որ չի կարող պատասխանել այս հարցին:

Ինչո՞ւ:
«Չեմ ուզում պատասախանել երկրների միջև բազմակողմանի հարաբերությունների մասին հարցին»,- ասաց նա՝ հավելելով, որ ՅՈւՆԵՍԿՕ-ն ունի մշակութային ժառանգության պահպանությանն ուղղված մի քանի կոնվենցիաներ, որոնք կիրառվում են:

Բացի այդ, ըստ ՅՈՒՆԵՍԿՕ-ի ներկայացուցչի, կառավարությունները նույնպես մեծ դեր ունեն մշակութային ժառանգության պահպանության հարցում. «Կախված է տարբեր երկրներում գործող կոմիտեներից: Երբեմն նրանք հավաքական որոշում չեն կարողանում կայացնել, քանի որ կան որոշ խնդիրներ, որոնք պետք է քննարկել, այնուհետև որոշում կայացնել»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: