Ձեր վստահելի աղբյուրը

«Հայաստանի նպատակն է Պարսից ծոցը կապել Վրաստանին և սևծովյան տարածաշրջանին»,-այդ մասին իրանական «Դոնյայե Էղթեսադ» պարբերականին տված հարցազրույցում նշել է Իրանում ՀՀ դեսպան Արտաշես Թումանյանը:

Այն հարցին, թե տնտեսական հարաբերությունների աշխուժացման համար ինչպիսի ենթակառուցվածքային ծրագրեր են իրականացվում, դեսպան Թումանյանը մասնավորապես նշել է. «Ենթակառուցվածքների ստեղծման գործում Հայաստանն Իրանի հետ համատեղ ծրագրեր է իրականացնում: Արդեն իսկ էլեկտրահաղորդման երկու գիծ է կառուցված, իսկ երրորդը կառուցման փուլում է:

Մի քանի տարի առաջ կառուցվել և ներկայում գործում է Իրան-Հայաստան գազատարը: Իրանը Հայաստանին կապելու նպատակով լավ և որակյալ ճանապարհ է կառուցված: Մեր համատեղ իրականացվելիք ենթակառուցվածքային ծրագրերից մեկն էլ Արաքս գետի վրա երկու հիդրոէլեկտրակայանի կառուցումն է, մեկը Հայաստանի տարածքում, իսկ մյուսը՝ Իրանի, որը նախագծային փուլում է գտնվում»:

Դեսպան Թումանյանը, կարևորելով կոմունիկացիոն ենթակառուցվածքների ստեղծման անհրաժեշտությունը, նշել է, որ Հայաստանի նպատակն է՝ որպես միջանցք, Պարսից ծոցը Վրաստանին և սևծովյան տարածաշրջանին կապելն է: Մենք ցանկանում ենք Իրանում առկա երկաթուղային ենթակառուցվածքից օգտվել և Պարսից ծոցի տարածաշրջանը կապել Հայաստանին: Այդ նպատակով արդեն իսկ կառուցման փուլում է գտնվում Հյուսիս-Հարավ ավտոմայրուղին, որն Իրան-Հայաստան սահմանը կապում է Հայաստան-Վրաստան սահմանին. Այդ կերպ մենք հետագայում հնարավորություն կունենանք դուրս գալ նաև սևծովյան տարածաշրջան. Սակայն այդ նախագիծը լիարժեք դարձնելու համար անհրաժեշտ է, որպեսզի Իրանի տարածքում կառուցվի շուրջ 60 կմ. երկարությամբ երկաթգիծ, որը կհասնի մինչև Հայաստանի սահման»:

Լրագրողի այն հարցին, թե խոսակցություններ կան, որ Հայաստանը ցանկություն ունի միանալ ՆԱՏՕ-ին, այդ պարագայում Երևանն ինչպե՞ս է կարողանալու հավասարակշռությունը պահել մի կողմից Արևմուտքի, իսկ մյուս կողմից Իրանի և Ռուսաստանի միջև, դեսպան Թումանյանը պատասխանել է. «Նախ հասկանալի չէ, թե ինչ խոսակցությունների մասին է խոսքը. Հայաստանի և Իրանի միջև առկա է բարձր մակարդակի քաղաքական հարաբերություններ: Բացի Իրան-Հայաստան գազատարից՝ մի շարք այլ համատեղ ենթակառուցվածքներ են գործում, իսկ Ռուսասատնի հետ Հայաստանը համագործակցում է ԵԱՏՄ շրջանակներում, Հայաստանում է գտնվում ռուսական ռազմաբազան: Ինչ վերաբերում է ՆԱՏՕ-ին՝ ապա այդ կառույցի հետ Հայաստանի համագործակցությունը սահմանափակվում է խաղաղապահ զորքերում ընդգրկված լինելու շրջանակներում»: