Ձեր վստահելի աղբյուրը

«Իրանի մայրաքաղաք Թեհրանում նախատեսվում է անցկացնել հայ-իրանական համատեղ բիզնես ֆորում»,- այդ մասին իրանական «Դոնյայե Էղթեսադ» պարբերականին տված հարցազրույցում նշել է Իրանում ՀՀ դեսպան Արտաշես Թումանյանը:

Հայաստանի դեսպանը, անդրադառնալով երկկողմ առևտրատնտեսական հարաբերություններին, մասնավորապես ասել է. «Հայ-իրանական տնտեսական հարաբերություններն օբյեկտիվ և սուբյեկտիվ պատճառներից ելնելով համեմատելի չեն քաղաքական հարաբերությունների հետ: Վերջին տարիներին երկկողմ առևտրաշրջանառության ծավալները կազմել են շուրջ 400 միլիոն դոլար: Հայաստանի մաքսային սահմանը բաց է իրանական ապրանքների համար: Հայաստանը՝ որպես Ատևտրի համաշխարհային կազմակերպության անդամ սահմանում է մաքսային ցածր տոկոսադրույք (0-ից մինչև 10 տոկոս), իսկ ինչ վերաբերում է Եվրասիական տնտեսական միությանը Հայաստանի անդամակցությանը՝ ապա այդ դեպքում ևս տոկոսադրույքները բարձր չեն լինի: Հակառակ վերոնշյալին՝ հայկական ապրանքները հեշտությամբ չեն կարողանում մուտք գործել իրանական շուկա: Բարձր մաքսային սակագներն այնպիսի իրավիճակ են ստեղծել, որ գրեթե անհնար է արտերկրից ապրանք ներմուծել Իրան, այդ իսկ պատճառով, փաստացի Իրանի սահմանը փակ է հայկական ապրանքների համար»:

«Ես՝ որպես դեսպան, իրանցի պետական պաշտոնյաների հետ հանդիպումների ընթացքում ջանքեր եմ գործադրելու, որպեսզի Հայաստանի հետ կնքնվեն տնտեսական արտոնյալ պայմանագրեր, որպեսզի Հայաստանն էլ կարողանա Թուրքիայի պես ապրանքներ արտահանել Իրան»,-նշել է ՀՀ դեսպանը:

Դեսպան Թումանյանը, անդրադառնալով առաջիկայում նախատեսվող ծրագրերին, նշել է, որ Իրանում ՀՀ դեսպանությունն իրանական կողմի հետ համատեղ նախատեսում է ս.թ. հոկտեմբեր ամսին Թեհրանում կազմակերպել բիզնես ֆորում, որտեղ հայաստանցի պաշտոնյաներն ու մասնագետները իրանցիներին կներկայացնեն Հայաստանի օրենսդրությունն ու տնտեսական գործունեություն ծավալելու պայմանները:

Անդրադառնալով զբոսաշրջության ոլորտում առկա համագործակցությանը՝ Արտաշես Թումանյանը նշել է. «Այդ ոլորտում զարգացումը միակողմանի է, այսինքն՝ հակառակ իրանցի զբոսաշրջիկների՝ հայ զբոսաշրջիկները չեն կարող իրենց անձնական մեքենաներով մուտք գործել Իրանի տարածք: Ինչ վերաբերում է Հայաստանին, ապա այն իրանցի զբոսաշրջիկների համար բավականին գրավիչ երկիր է, նրանց համար հարմարավետ պայմաններ են ստեղծվել, ինչի համար ես շատ ուրախ եմ»:

Թեմային առնչվող մեկնաբանություն՝
2014թ. Իրան-Հայաստան առևտրաշրջանառության ծավալներն աճել են