«The Daily Beast»-ը Լեռնային Ղարաբաղի մասին. Երջանիկ, ինքնահռչակ պետություն, որի պատերազմը դեռ շարունակվում է
Մայրամուտի վարդագույն շողերն իջնում են Ստեփանակերտի կենտրոնական հրապարակի վրա, քաղաք, որը ժամանակին ռմբակոծվել ու ավերվել է հայ-ադրբեջանական հետխորհրդային պատերազմի ընթացքում։ Պատերազմի ավարտից 21 տարի է անցել ու թեև սահմանագծում կրակոցները դեռևս հնչում են, այդուհանդերձ ինքնահռչակ հանրապետության մայրաքաղաքը շատ խաղաղ է: Այս մասին «The Daily Beast» պարբերականում Լեռնային Ղարաբաղին նվիրված իր հոդվածում գրում է Աննա Նեմցովան:
Լրագրողը նկատում է, որ ի տարբերություն այլ չճանաչված պետությունների, ինչպես օրինակ Աբախզիան, Օսեթիան են, և որոնց հետևում կանգնած է Ռուսաստանը, Լեռնային Ղարաբաղին աջակցում են բացառապես սփյուռքահայերը: Ըստ հոդվածագրի, ամառային օրերին Լեռնային Ղարաբաղի հիմնական հրապարակի անկյուններում կարելի է նկատել դրսից ժամանած այդ բարերարներին, ինչպես նաև լսել հայերեն, անգլերեն, ֆրանսերեն և ռուսերեն լեզվով խոսակցություններ:
«Կովկասի կանաչապատ լեռներում ծվարած Ղարաբաղը, որը գերադասում է հեռու մնալ գլոբալ աշխարհաքաղաքական փոթորիներից, զարգանում է Արևմուտքում բնակվող հայկական սփյուռքի ջանքերով: Արցախի Հանրապետությունը, ինչպես տեղացիներն անվանում են իրենց լեռնային հայրենիքը, տեղյակ է, որ մնացյալ աշխարհը չի ճանաչում իր գոյությունը: Սակայն այնտեղ մարդիկ գիտակցում են, որ քաղաքական որևէ անկայունություն կարող է արթնացնել Ադրբեջանի հետ դեռևս չսառեցված հակամարտությունը»,- գրում է հոդվածագիրը:
Այս համատեքստում վերջինս նկատում է, որ ցավալի հեղափոխություններից խուսափելու համար, պաշտոնական Ստեփանակերտի կողմից կազմակերպվում են արդար և թափանցիկ ընտրություններ: Ըստ հոդվածագրի` Արցախն այնքան փոքր է, որ այստեղ բոլորը ճանաչում են բոլորին և որ տեղացի պաշտոնատար անձիք չեն կարող խաբել ընտրողներին:
Ինչպես գրում է հոդվածագիրը, այս տեսակետը կիսում է նաև Արցախի վարչապետ Արայիկ Հարությունյանը, ով պարբերականի հետ զրույցում նշել է, որ Լեռնային Ղարաբաղը ցույց է տվել` թափանցիկ և ժողովրդավարական նախագահական ընտրություններով կարելի է հաջողությամբ պայքարել կոռուպցիայի և կազմակերպված հանցավորության դեմ:
Այնուհետև հոդվածագիրը հավելում է, որ նույնիսկ կարելի է այգու նստարանին դրամապանակ թողնել և հաջորդ օրն իսկ այն գտնել նույն տեղում:
«Միայն ժողովրդավարությունը չէ Ղարաբաղի նպատակը: Շուտով, ինչպես Հարությունյանն է խոստանում, Ղարաբաղը կվերածվի սև խավիարի դրախտի, որպեսզի Ադրբեջանին ցույց տա, որ այստեղ ոչ միայն ատում են բռնապետությունը, այլև իրենք էլ կարող են հարստանալ»,- գրում է հոդվածագիրը:
Վերջինս հիշեցնում է, որ Արցախը բարեկամության և ընկերության հուշագրեր ունի կնքած տարբեր երկրների քաղաքների և նահանգների հետ: Հոդվածագիրը նաև նկատում է, որ Արցախում ոչ մի խոսակցություն վերջին հաշվով չի շրջանցում արցախցիների հուշերը պատերազմի և այդ դժվարին տարիների մասին:
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
