Ձեր վստահելի աղբյուրը

«Հայաստանում ցորենի ինքնաբավության մակարդակը հնարավոր է հասցնել 65-70 տոկոսի: Սրանից ավելի բարձր նշաձող չի կարող լինել, քանի որ մեր հողային ռեսուրսների պայմաններում այդքանի հնարավորություն ունենք»,- լրագրողների հետ հանդիպման ժամանակ ասաց Հայաստանի գյուղատնտեսության փոխնախարար Սամվել Գալստյանը:

«Հայաստանի կառավարությունը պետական աջակցության ծրագրերի իրականացումն առաջինը սկսեց 2010-14 թվականներին ցորենի սերմնարտադրության զարգացման ծրագրով: 2010 թվականին ունեցել ենք 73 հազար հեկտար ցորեն, այս տարի այն կազմում է 111 հազար հեկտար: Գյուղացիների կողմից չէր ցանվում ցորեն, քանի որ բերքը ցածր էր, եկամուտ չկար»,- ասաց նա՝ հավելելով, որ 2014 թվականին արտադրվել է 338 հազար տոննա ցորեն, 2010-ի՝ 173 հազար տոննայի համեմատությամբ:

Փոխնախարարի ներկայացմամբ, միայն այս տարի 5200 հեկտարով ավելացել է ցորենի ցանքատարածությունը:

«2010 թվականին ինքնաբավ էինք 32 տոկոսով, այսօրվա դրությամբ արդեն մոտեցել ենք 50 տոկոս ինքնաբավության շեմին: Պետք է առաջիկա տարիների ընթացքում ծրագրի շարունակական իրականացման արդյունքում ինքնաբավության մակարդակը հասցնենք 65-70 տոկոսի»,- նշեց Ս. Գալստյանը:

Փոխնարարարի տեղեկացմամբ, տարեկան Հայաստան ներկրվում է 300-400 հազար տոննա պարենային ցորեն: Մեկ օրվա ընթացքում Հայաստանում պարենային նպատակների համար անհրաժեշտ է լինում 1000 տոննա ցորեն, այսինքն մեկ տարվա ընթացքում՝ 365 հազար տոննա:

«Մենք այս տարվա համար կանխատեսում ենք 360-365 հազար տոննայի սահմաններում ցորենի արտադրություն»,- ասաց փոխնախարար Ս. Գալստյանը: