Ձեր վստահելի աղբյուրը

Թուրքական «ASİMDER» (այսպես կոչված` Հայկական անհիմն պնդումների դեմ կազմակերպություն) հակահայկական կազմակերպության ներկայացուցիչ Իրֆան Էրմիշը հայտարարել է, որ իրենք պատրաստվում են խոչընդոտել հայերի կողմից Վանի Աղթամար կղզու Սբ. Խաչ եկեղեցում ամենամյա պատարագի անցկացումը: Այս մասին գրում է ermenihaber.am կայքը: 

Ըստ թուրքական «Milliyet» թերթի կայքի` Էրմիշը նշել է, որ հայկական պատարագի անցկացմանը խոչընդոտելու պատճառն այն է, որ իբրև Հայաստանի իշխանություններն իրենց թույլ չեն տվել նամազ անել Երևանի կենտրոնում գտնվող Կապույտ մզկիթում: Նա ասել է, որ այդ հարցում համագործակցելու են տեղի հասարակական կազմակերպությունների հետ, ինչպես նաև աշխատանք են տանելու Վանի բնակչության հետ: Հակահայ գործիչը պնդել է նաև, որ Սբ. Խաչ եկեղեցին «կառուցել են քրիստոնյա պեչենեկ թյուրքերը»:

Աղբյուրը նշում է, որ Երևանում գտնվող Կապույտ մզկիթում նամազ անելու համար մուտքի արտոնագիր և անվտանգության երաշխիքներ ստանալու նպատակով «ASİMDER»-ը 2014-ի սեպտեմբերին պաշտոնապես դիմել էր Իրանում և Վրաստանում Հայաստանի դեսպանատներին:

Այս թեմայով արած հայտարարության մեջ Կազմակերպության նախագահ Գյոքսել Գյուլբեյը, նշել է, որ իրենք դիմել են Իրանում և Վրաստանում Հայաստանի դեսպանատներին այն բանից հետո, երբ Թուրքիայի արտաքին գործերի նախարարությունը ընթացք չէր տվել, մուտքի արտոնագրի և անվտանգության երաշխիքի համար ներկայացրած իրենց պաշտոնական դիմումին:

Աղբյուրը նաև հիշեցնում է, որ Վանա լճի Աղթամար կղզու Սուրբ Խաչ հայկական եկեղեցին թուրքական կառավարության ֆինանսավորմամբ վերականգնվելուց հետո 2010 թվականից բացվել է թանգարանի կարգավիճակով: Այդ երկրի կառավարությունը տարին մեկ անգամ թույլատրում է անցկացնել կրոնական արարողություն: