Ձեր վստահելի աղբյուրը

Երևան-Գյումրի ավտոճանապարհի Հոռոմ գյուղի խաչմերուկում դեռ նախորդ տարի «Գազելի» և «Կամազի» բախման հետևանքով տեղի ունեցած վթարի գործով «Կամազի» վարորդ Մանվել Վարդանյանի փաստաբան Լիանա Բալյանը սենսացիոն բացահայտումներ է արել: Նա Panorama.am-ին տեղեկացրեց, որ դեպքի օրը Հոռոմ գյուղի խաչմերուկում սխալ տեղում տեղադրված «Կանգ առ» ճանապարհային նշանի վայրը տեղափոխվել է առաջ և այժմ դրվել ճիշտ տեղում:

Հիշեցնենք` նախորդ տարի նոյեմբերի 10-ին մարդատար «Գազելը» բախվել էր «Կամազ» մակնիշի բեռնատարին, ինչի հետևանքով «Գազելը» պայթել էր, այրվել։ «Գազելի» մեջ եղած 14 ուղևորներից 7-ը տեղում մահացել էին, իսկ 7-ը՝ տեղափոխվել բժշկական կենտրոն։ Փաստի առթիվ Շիրակի մարզային քննչական վարչությունում հարուցվել էր քրեական գործ՝ ՀՀ քրեական օրենսգրքի՝ 242-րդ հոդվածի 3-րդ մասի հատկանիշներով։ «Գազելին» բախված «Կամազ» մակնիշի բեռնատարի վարորդը՝ Մանվել Վարդանյանը կալանավորվել էր: Մարդատար «Գազելը» պատկանում է ԱԺ պատգամավոր Մարտուն Գրիգորյանի «Տրանս-Ակնթարթ» ընկերությանը: Մանվել Վարդանյանին մեղադրանք է առաջադրվել՝ ՀՀ քրեական օրենսգրքի 242-րդ հոդվածի 3-րդ մասի հատկանիշներով` Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ։

Վթարի օրը, վթարի վայրում` Հոռոմ գյուղի խաչմերուկում «Կանգ առ» (STOP) ճանապարհային նշանը տեղադրված է եղել խաչմերուկից մի քանի մետր ներքև: Նշանի մոտ կանգնելիս վարորդների տեսադաշտը փակում է տարածքում գործող գազալցակայանը, նրանք չեն կարողանում հստակ կողմնորոշվել ու ստիպված են առաջ գալ` տեսնելու երթևեկության շարժը խաչմերուկից դուրս: Սակայն 7 մահվան ելքով ողբերգական վթարից հետո, միայն վերջերս պատկան մարմինները զգացել են սխալը ու «Կանգ առ» ճանապարհային նշանը տեղափոխել 10 մ վերև:

«Նախաքննության փուլում ու մինչ այժմ ես և իմ պաշտպանյալ Մանվել Վարդանյանը բարձրաձայնում ենք, որ Հոռոմ գյուղի խաչմերուկին, բոլոր վարորդներն էլ, ովքեր անցել են այդտեղով, կհամաձայնեն, ձախից կա գազալցակայան, որը փակում է տեսադաշտը և ճանապարհն ընդհանրապես չի երևում, և վարորդները պետք է մի քիչ առաջ անցնեն, որ երևա: Մանվել Վարդանյանն էլ, որպես հմուտ վարորդ, առաջ է անցել խաչմերուկի մոտ, տեսել է մեքենա չկա, շրջադարձ է կատարել»,-Panorama.am-ի թղթակցի հետ զրույցում ներկայացրեց Վարդանյանի փաստաբան Լիանա Բալյանը:

Նրա խոսքով, դեռ նախաքննության փուլում պաշտպանական կողմը միջնորդել է փորձաքննություն կատարել` պարզելու արդյոք վարորդի համար այդ խաչմերուկում տեսադաշտ կա՞, թե՞ ոչ: Բայց մինչ այժմ որևէ փորձաքննություն չի կատարվել: Մինչդեռ նրա պնդմամբ, այդ խաչմերուկում գազալցակայանը փակում է վարորդների տեսադաշտը:

«Նախաքննությունն այնքան թերի է տարվել, որ «Կանգ առ» նշանի տեղադրման վայրը ընդհանրապես չի ուսումնասիրվել: Եթե ուսումնասիրվեր, ապա պետք է քրեական գործ հարուցվեր պետական մարմնի անգործության կամ սխալ գործունեության համար, ինչի հետևանքով 7 մարդ է զոհվել: Այդ սխալի պատճառով հենց նույն տեղում շարունակական վթարներ են տեղի ունեցել»,- նկատեց փաստաբանը:

Նրա պնդմամբ, եթե վթարի օրը ճանապարհային նշանը տեղադրված լիներ մի փոքր առաջ, ապա վթարը տեղի չէր ունենա:
Փաստաբանն ասաց, որ հուլիսի 24-ին կայանալիք հերթական դատական նիստում պատրաստվում է լուսանկարները ներկայացնել դատարանին և միջնորդել փորձաքննություն անցկացնել` ճանապարհային նշանի տեղի վերաբերյալ:

Ճանապարհային նշանը` վթարի օրը


Ճանապարհային նշանը` վթարից հետո







Լուսանկարները Panorama.am-ին տրամադրել է փաստաբան Լիանա Բալյանը

Հարակից հրապարակումներ`
Դատարանում հարձակվել են փաստաբանի վրա
Շիրակի վթարի գործով փաստաբան. Ինչո՞ւ «Գազելի» վարորդին էլ մեղադրանք չառաջադրվեց
Շիրակի վթար. «Գազելի վարորդի մեղքը հաստատ առկա է»
Շիրակում տեղի ունեցած ավտովթարի գործով տարվում է միակողմանի նախաքննություն` արջի ծառայություն մատուցելով պատգամավորին. փաստաբան
Շիրակում տեղի ունեցած ավտովթարի գործով մեղադրյալին տեղափոխելու են «Նուբարաշեն» հոգեբուժական հիվանդանոց
Շիրակում տեղի ունեցած ավտովթարի գործով մեղադրյալին հնարավոր է տեղափոխեն «Դատապարտյալների հիվանդանոց»
Շիրակում տեղի ունեցած ավտովթարի գործով մեղադրյալի կալանքի որոշումը չի բողոքարկվելու
Շիրակում տեղի ունեցած ողբերգական ավտովթարի գործով մեղադրյալ վարորդը հոգեբանական, բժշկական օգնության կարիք ունի
Շիրակում ավտովթարի հետևանքով տուծաժ 14-ամյա ուղևորի վիրահատությունը բարահաջող է անցել