Ձեր վստահելի աղբյուրը

Բաքվում կայացած եվրոպական խաղերի ավարտից հետո ղարաբաղա-ադրբեջանական շփման գծում հրադադարի ռեժիմի ինտենսիվ խախտումները հակառակորդի կողմից սպասելի էին: Այդ մասին Panorama.am-ին կարծիք հայտնեց Հայաստանի պաշտպանության նախարարի խորհրդական Դավիթ Ջամալյանը:

«Սպասելի էր, ադրբեջանական կողմը կրկին ապակայունացնելու է իրավիճակը պետական սահմանին: Բայց բնականաբար, Հայաստանի Զինված ուժերը պատրաստ են նման զարգացումների»,-հավելեց Ջամալյանը:

Հարցին, թե ինչով է պայմանավորված հակառակորդի կողմից տարբեր չափի ականանետերի կիրառումը, Ջամալյանն ի պատասխան նկատեց, որ դա սահմանային լարվածության նոր որակի մասին է վկայում:

«Հայկական կողմը հրադադարի հաստատումից ի վեր սկզբունքորեն ձեռնպահ է մնացել խոշոր տրամաչափի զինատեսակներ կիրառելուց: Բայց եթե թշնամին գնացել է այդ քայլին, ապա բնականաբար մեր դիրքապահ ստորաբաժանումները չեն կարող պասիվ դիտորդի դերում մնալ: Նշեմ, որ վերջին մեկ տարվա ընթացքում հայկական բանակի ստորաբաժանումների դիպուկ կրակով հակառակորդի մի քանի ականանետային դիրք է ոչնչացվել: Եթե մեր այդ հակընդդեմ գործողությունները չլինեն, ապա պետական սահմանին իրավիճակը շատ ավելի կլարվի, քանզի թշնամին իրեն անպատժելի կզգա, և է՛լ ավելի սանձարձակ կդառնա»,- հավելեց ՊՆախարարի խորհրդականը:

Նրա պնդմամբ, և Հայաստանի հասարակությունը, և առավել ևս հայկական բանակը պետք է պատրաստ լինի սահմանում լարվածության աճին:

«Եղել և մնում եմ այն տեսակետին, որ չի կարելի հանիրավի հանգստացնել մարդկանց: Այդ առումով ոչ միայն բանակն, այլև մեր հանրությունը պետք է պատրաստ լինի պետական սահմանին լարվածության նոր փուլին: Պետք է ի նկատի ունենալ, որ թշնամու ծավալուն ագրեսիան հնարավոր է միայն այն դեպքում, եթե մենք թուլանանք, ընկալվենք որպես մատչելի թիրախ: Իսկ սահմանին իրավիճակի ապակայունացմանն ու ըստ այդմ՝ թշնամու ագրեսիային դիմակայելու պատրաստակամությունն ադրբեջանական կողմի ագրեսիվ նկրտումները զսպող կարևորագույն գործոն է: Տվյալ դեպքում շատ կարևոր է անհրաժեշտության դեպքում արագ համախմբվելու ունակությունը: Վստահ եմ, որ անցյալ օգոստոսին մեր հասարակության համախմբման փաստը, կամավորականների այցը մարտական հենակետեր աննկատ չի մնացել Բաքվում, և իր սթափեցնող ազդեցությունն ունեցել է: Հետայսու նույնպես թշնամուն հարկավոր է պարբերաբար սթափեցնել՝ արժանապատիվ և հուսալի խաղաղություն ապահովելու համար», -հավելեց պաշտոնյան:

Ավելի վաղ Panorama.am-ը, վկայակոչելով ԼՂՀ ՊՆ հաղորդագրությունը, տեղեկացրել էր, որ հանգստյան օրերին ադրբեջանական բանակի ստորաբաժանումները շարունակել են ինտենսիվորեն խախտել հրադադարի պահպանման ռեժիմը ղարաբաղա-ադրբեջանական հակամարտ զորքերի շփման գծի ողջ երկայնքով: ՊԲ օպերատիվ տվյալների համաձայն, նշված ժամանակահատվածում հակառակորդի կողմից հրադադարի պահպանման ռեժիմը խախտվել է շուրջ 320 անգամ, որի ընթացքում, տարբեր տրամաչափի հրաձգային և հրետանային զինատեսակներից, հայ դիրքապահների ուղղությամբ արձակվել է ավելի քան 5000 կրակոց, այդ թվում` 60 միլիմետրանոց ականանետերից 49 արկ, ՌՊԳ-7 և ՀԱՆ-17 տիպի նռնականետերից` համապատասխանաբար 9 և 20 արկ և խոշոր տրամաչափի գնդացրային միջոցներից ավելի քան 200 կրակոց: