Ձեր վստահելի աղբյուրը

Քաջարանի բժշկական կենտրոնում հիվանդների հեպատիտ C-ով վարակման պատճառը վիրաբուժական գործիքներն էին: Այս մասին այսօր լրագրողների հետ հանդիպման ժամանակ ասաց «Նորք ինֆեկցիոն հիվանդանոցի» լյարդաբանական բաժանմունքի ղեկավար, Հայկական լյարդաբանական ասոցիացիայի նախագահ Հասմիկ Ղազինյանը:

Նրա խոսքերով՝ Քաջարանում ԲԿ-ում 15 հիվանդի մոտ ախտորոշվել է հեպատիտ C, որից 8-ի մոտ սուր հեպատիտ C:

«Այն արտահայտվել է դեղնուկային ձևով, հեպատիտ C-ի դեպքում հազվադեպ է հանդիպում»,- ասաց նա:

Ըստ Հ.Ղազինյանի՝ առաջին անգամ պետությունն իր վրա է վերցրել այս հիվանդների բուժումը: Բոլոր հիվանդները անվճար ստանում են հակավիրուսային բուժում և այժմ գտնվում են բուժման ընթացքում:

«Այն հիվանդները, որոնք ստանում են հակավիրուսային բուժում, մեծ հավանակություն կա, որ կբուժվեն, քանի որ այսօր հեպատիտ C-ն համարվում է բուժվող հիվանդություն: Հակավիրուսային բուժումը նշանակում է առողջացում»,- նշեց նա:

Հ.Ղազինյանը խոստովանեց, որ հեպատիտով վարակման դեպքերը միայն Քաջարանի ԲԿ-ով չեն սահմանափակվում, պարբերաբար տարբեր հիվանդանոցներից ստանում են սուր վիրուսային հեպատիտ C-ի դեպքեր:

«Պատճառը հիմնականում վիրաբուժական մանիպուլյացիաներն են»,- ասաց նա:

Ըստ նրա, եթե մինչև 1992 թ-ին հեպատիտի փոխանցման գործոն էր հանդիսանում արյան փոխներարկումը, ապա արյան սկրինինգից հետո արյունը որպես փոխանցման գործոն իր տեղը զիջել է այլ գործոնների, այդ թվում՝ ատամնաբուժական, գինեկոլոգիական, կոսմետոլոգիական գործիքների:

Հիշեցնենք, որ «Քաջարանի բժշկական կենտրոն» ՓԲ ընկերությունում սանիտարահակահամաճարակային կանոնները խախտելու, անվտանգության կանոններին չհամապատասխանող` 2 և ավելի անձանց առողջությանը վնաս պատճառած ծառայություններ մատուցելու դեպքի առթիվ հարուցվել էր քրեական գործ: