Ձեր վստահելի աղբյուրը

Տասը քանդակագործ՝ չորսն արտասահմանից, վեցը Հայաստանից, Գյումրու Քանդակագործության միջազգային երկրորդ սիմպոզիումի շրջանակում ստեղծելու են Հայոց ցեղասպանության թեմայով տասը քանդակ, որոնք տեղադրվելու են քաղաքի տարբեր հատվածներում: Սիմպոզիումն անցկացվում է «Մաքառող ընտանիքներ» խորագրի ներքո:

Panorama.am-ի հետ զրույցում «Մշակութային էքսպերիմենտալ կենտրոն» կրթամշակութային վերլուծությունների և զարգացման ՀԿ-ի նախագահ Արթուր Գևորգյանն ասաց. «Առաջին անգամ սիմպոզիումի ընթացքում մասնագիտական առումով խնդիր էր դրվել՝ ստեղծել սև մետաղի և քարի համադրմամբ աշխատանքներ՝ Հայոց ցեղասպանության թեմայով: Ամիսներ առաջ մեր տարածած հայտարարությանն ու առաջարկած պայմաններին արձագանքեց տասը քանդակագործ՝ վեցը Հայաստանից, չորսն արտասահմանից՝ Ֆրանսիա, Բելգիա, Իտալիա, Բելառուս»:

Նրա խոսքով, օտարազգի քանդակագործները տեղյակ են հայ ժողովրդի պատմության ողբերգական էջին՝ Հայոց ցեղասպանությանը, ծանոթ են իրենց պետությունների դիրքորոշումներին այդ հարցի վերաբերյալ. «Մեծ հարգանք ունեն հայերի հանդեպ»:

Ա. Գևորգյանն ասաց, որ նրանց մեծապես հետաքրքրում է տուֆի մշակման տեխնոլոգիան, որը նորություն է իրենց համար:

Այժմ քանդակագործներն աշխատում են Տեքստիլ կոչվող թաղամասի Ավետիք Իսահակյանի պուրակում: Ստեղծված քանդակների մի մասը մնալու են հենց այդտեղ, մի քանիսը տեղափոխվելու են Հաղթանակի զբոսայգի՝ քանդակների պուրակ, մեկն էլ նվիրաբերվելու է ծերերի տուն-ինտերնատին:

Նա նշեց, որ այս օրերին քաղաքում ակտիվություն է նկատվում, շատ քաղաքացիներ են գնում Իսահակյան պուրակ, հետևում քանդակների ստեղծմանը:

Սիմպոզիումը շարունակվելու է մինչև օգոստոսի 13-ը, ամփոփվելու է երեք մրցանակակիրների ընտրությամբ:

Սիմպոզիումի իրականացման ծախսերի հիմնական մասը՝ 5 միլիոն դրամ, ֆինանսավորել է Գյումրու քաղաքապետարանը: Ֆինանսավորմանը մասնակցությունն են ունեցել նաև մշակույթի նախարարությունը, միջազգային, տեղական ընկերություններ և անհատներ:

«Շատ աջակիցներ ունենք, իրենք են իրենց օգնությունն առաջարկում»,- ասաց Ա. Գևորգյանը: