Ձեր վստահելի աղբյուրը

Արարատի մարզի Փոքր Վեդի համայնքում տեղի է ունեցել գյուղատնտեսական սպասարկման կենտրոնի բացման պաշտոնական արարողությանը:

Կենտրոնը հիմնադրվել է ՀՀ գյուղատնտեսության նախարարության աջակցությամբ Ագրոբիզնեսի և գյուղի զարգացման կենտրոն (CARD) հիմնադրամի կողմից ԱՄՆ ՄԶԳ (USAID) ֆինանսավորմամբ իրականացվող «Գործընկերություն՝ հանուն գյուղական համայնքների բարգավաճման» ծրագրի շրջանակում:

«Այս տարվա ընթացքում մենք արդեն երկրորդ այգեգործական ուղղվածություն ունեցող գյուղատնտեսական սպասարկման կենտրոնն ենք բացում մեր հանրապետությունում, որը հագեցած է ժամանակակից տեխնոլոգիաներով, ինչպես նաև գյուղացիական տնտեսություններին կապահովի բարձրակարգ խորհրդատվական ծառայություններով: Մայիս ամսին նմանատիպ կենտրոն հիմնեցինք նաև Արմավիրի մարզի Նորապատ համայնքում և նպատակ ունենք հետագայում ընդլայնել աշխարհագրությունը՝ ընդգրկելով բոլոր մարզերը»,- իր խոսքում նշել է գյուղատնտեսության նախարար  Սերգո Կարապետյանը:

ԳՆ տեղեկատվության և հասարակայնության հետ կապերի բաժնի փոխանցմամբ, մասնագիտացված կենտրոնը տեղի գյուղատնտեսներին տրամադրելու է ծառայությունների ամբողջական փաթեթներ, կապեր է ստեղծելու գյուղատնտեսների և միջազգային կազմակերպությունների միջև, որոնք տրամադրում են պարագաներ, սարքավորումներ, ինչպես նաև տեղեկատվություն այգեգործության կառավարման զարգացման նոր տեխնոլոգիաների մասին:

Կենտրոնը հագեցած է լինելու հողի, ջրի և բույսերի հետազոտության ժամանակակից լաբորատոր սարքավորումներով, ինչպես նաև նպաստելու է շուկայական կապերի հաստատմանը և հասանելի է դարձնելու ֆինանսական ռեսուրսները Հայաստանի ֆերմերների ու գյուղական ՓՄՁ-ների համար:

Բացի այդ, կենտրոնում տեղի և օտարերկրյա մասնագետների կողմից կազմակերպվելու են սեմինարներ և դասընթացներ՝ Արարատի մարզի շուրջ 25 համայնքների մոտ 2 500 գյուղատնտեսների համար: Կենտրոնը ծառայելու է նաև որպես գործնական սեմինարների անցկացման վայր Հայաստանի ազգային ագրարային համալսարանի ուսանողների համար: 

Միջոցառմանը ներկա էին ԱՄՆ Միջազգային զարգացման գործակալության հայաստանյան առաքելության ղեկավար Քարեն Հիլիարդը, Արարատի մարզպետ Ռուբիկ Աբրահամյանը, «Ագրոբիզնեսի և գյուղի զարգացման կենտրոն» հիմնադրամի տնօրեն Գագիկ Սարդարյանը, Հայաստանի ՓՄՁ ԶԱԿ/ԱՄՆ ՄԶԳ «Գործընկերություն` հանուն գյուղական համայնքների բարգավաճման» ծրագրի ղեկավար Անուշ Ասլանյանը, այլ պաշտոնատար անձինք և հյուրեր: