Թայվանցի ուսանողները ներխուժել են կրթության նախարարության տարածք

Հասարակություն 11:11 31/07/2015

Թայվանցի ուսանողները ներխուժել են կրթության նախարարության տարածք

Հարյուրավոր թայվանցի ուսանողներ, ովքեր բողոքում են կառավարության «պրո-պեկինյան» քաղաքականության դեմ և կարծում են, որ նոր դասագրքերում պատմությունը ներկայացված է խեղաթյուրված, գրոհել են կրթության նախարարությունը: Այս մասին գրում է Լենտա.ռու կայքը՝ հղում անելով Channel News Asia-ին:

Ուսանողական բողոքի ակցիաները նոր թափով են սկսվել ակտիվիստներից մեկի ինքնասպանությունից հետո, ում ավելի վաղ ձերբակալել էին նմանատիպ ակցիաներից մեկում ելույթի ժամանակ:

Նախարարության շենքի հարևանությամբ հավաքված մոտ 700 ուսանողներ բարիկադներ են կառուցել, այսօր առավոտյան շուրջ 200 բողոքողներ ներխուժել են շենք՝ պահանջելով հանդիպում նախարարի հետ: Ոստիկանությունն իր հերթին հայտարարել էր, որ հրաման է ստացել չցրել ուսանողներին:

Թայվանի կառավարության «Պրո-պեկինյան» քաղաքականության դեմ ուղղված ցույցերը կազմակերպվում են այսպես կոչված «Արևածաղկի շարժման» կողմից, շարունակվում են արդեն մի քանի ամիս: Ինչպես նշվում է՝ հիմնական մասնակիցները երիտասարդներն են, ովքեր իրենց համարում են թայվանցիներ, այլ ոչ թե չինացի:

Ուսանողները պնդում են, որ բուհերի նոր դասագրքերում պատմությունը ներկայացված է խեղաթյուրված, վերափոխվել է ի օգուտ Չինաստանի: Նրանց կարծիքով, դա արվում է այն բանի համար, որպեսզի երիտասարդների «ուղեղները լվանան» և ստիպեն նրանց ընդունել «Մեկ Չինաստան» քաղաքականությունը:

Պեկինը համարում է Թայվանը ապստամբ նահանգ և չի բացառում ուժի կիրառում, որպեսզի վերադարձնի կղզին իր հսկողության տակ:

Ներկայիս նախագահ Մա Ինցզյուն ընկալվում է որպես Չինաստանի համախոհ: Նա տնտեսական և առևտրական մի շարք պայմանագրեր է կնքել Պեկինի հետ: Թայվանցիները նոր նախագահ են ընտրելու 2016-ի նոյեմբերին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: