Ձեր վստահելի աղբյուրը

Հույն պատմաբան Թեոֆանիս Մալկիդիսն իր «Հայաստան, հայեր, արդարացում» նոր աշխատությունում անդրադարձել է Օսմանյան կայսրությունում 100 տարի առաջ հայերի, հույների և ասորիների ցեղասպանությանն ու շեշտել, որ այսօր էլ Թուրքիան չի փոխում իր ոճն ու սկզբունքները և շարունակում է ցեղասպանություն իրականացնել իր երկրում ապրող ազգային փոքրամասնությունների նկատմամբ: Այս մասին հաղորդում է «Aarmeniangenocide100.org» կայքը: 

Գիրքը, որը լույս է տեսել Հայոց ցեղասպանության 100-րդ տարելիցի միջոցառումները համակարգող Հունաստանի հանձնախմբի աջակցությամբ, ներկայացնում է դրվագներ, փաստաթղթղեր, վկայություններ և լուսանկարներ, որոնք լույս են սփռում Օսմանյան կայսրության տարածքում հիշյալ ժողովուրդների ոչնչացման իրողության վրա:

«Ժամանակի ընթացքում ես հասկացա, թե որքան շնորհակալ և երախտապարտ եմ հայ ժողովրդին: Նրանց շնորհիվ է, որ այսօր աշխարհում ավելի շատ է խոսվում ցեղասպանությունների կանխարգելման մասին: Մեծ է նրանց ներդրումը համաշխարհային առաջնորդների գիտակցության մեջ փոփոխություններ մտցնելու և ցեղասպանությունների դեմ ազնիվ պայքար մղելու հարցում»,- հայտարարել է գրքի հեղինակը` հավելելով, որ 100 տարի անց էլ Թուրքիան իր սկզբունքներն ու գործելաոճը չի փոխում:

«Թուրքիան ոչ միայն չի ճանաչում մեկ դար առաջ կատարած հանցագործություններն ընդդեմ մարդկության, այլև շարունակում է նույն ցեղասպան քաղաքականությունը: Դրա հետևանքը Հրանտ Դինքի մահն է, քրդերի հետ կատարվածն ու Սիրիայում զանգվածային սպանությունները»,- հավելել է Թեոֆանիս Մալկիդիսը: