Ձեր վստահելի աղբյուրը

Իտալական Hacking Team տեղեկատվական տեխնոլոգիաների ընկերության վերջերս գաղտնազերցված նամակները ցույց են տալիս, որ Ադրբեջանի Ազգային անվտանգության նախարարությունը եղել է ընկերության հաճախորդների ցուցակում:

«The Armenian Weekly» պարբերականի փոխանցմամբ` ընկերությունը համակարգիչները և սմարթֆոնները գաղտանլսող ծրագրեր է վաճառում, իսկ գնորդների թվում են Ռուսաստանը, Թուրքիան, ԱՄՆ-ն և այդ երկրների կառավարությունների հետ կապված ընկերությունները:

Ինչպես նշում է պարբերականը, Հայաստանը երբեք կազմակերպության գնորդների ցանկում չի եղել: Պարբերականի փոխանցմամբ` Ադրբեջանի Ազգային անվտանգության նախարարությունը ընկերության գնորդն է եղել 2013-ից 2015 թվականներն ընկած ժամանակամիջոցում:

«Արդեն իսկ հայտնի էր դարձել, որ Ադրբեջանը խնդիրներ է ունեցել գնված ծրագիրը օգտագործելու հետ կապված: Սակայն կա մի բան, որի մասին դեռ հայտնի ոչինչ չկա: Խոսքն այն խորհրդավոր միջնորդի մասին է, ով ադրբեջանական կառավարության միջոցով ներգրավվել է գործարքի մեջ` կատարելով շուրջ 384.000 դոլարի փոխանցում: Փոխանցումը կատարվել է the Horizon Global Group ընկերության և նրա ղեկավար Աբիկ Չարուխչևի միջոցով»,- գրում է պարբերականը:

Չարուխչևը Բաքվի տեխնիկական համալսարանի աշխատակից է: Սակայն, ըստ պարբերականի, ամենահետաքրքիրն այն է, որ նրա ընկերությունը գրանցված է ԱՄՆ-ում, իսկ փոխանցումներն էլ կատարվել են հայաշատ Գլենդել քաղաքում բացված հաշիվներից:

«Ինչու պետք է Ադրբեջանի Ազգային անվտանգության նախարարության ֆինանսական գործարքներում առաջամարտիկի դեր ստանձնած մարդը գնա և հաշիվներ բացի մի քաղաքում, որն հայտնի է իր մեծ հայկական համայնքով: Տրամաբանական բացատրությունը թերևս այն է, որ այդ հաշիվներն օգտագործվում են Իլհամ Ալիևի համար մեկ թշնամի երկրի`հայկական սփյուռքի դեմ»,- գրում է պարբերականը:

Այս համատեքստում աղբյուրը հիշեցնում է, թե ինչպես 2006 թվականից սկսած, երբ Լոս Անջելեսում բացվել է Ադրբեջանի հյուպատոսություն, այդ կառույցը մեծ գումարներ է օգտագործում քաղաքական վերնախավում հակահայկական լոբբինգ անելու համար: