Փաստաբանի՝ Տիգրան Խաչատրյանի «ապօրինի կալանավորման» տարբերակը
«Սդղի գյոլի» գործով կալանավորված, Սյունիքի մարզպետ Սուրիկ Խաչատրյանի որդու` Տիգրան Խաչատրյանի առողջական վիճակը լավ չէ և գտնվում է բժիշկների հսկողության տակ: Այդ մասին Panorama.am-ին տեղեկացրեց Տիգրանի փաստաբան Արմեն Մելքոնյանը:
«Չեմ կարող նեղ մասնագիտական հարցերին պատասխանել», -հավելեց փաստաբանը` անդրադառնալով հարցին, թե մասնավորապես, առողջական ինչ խնդիրներ ունի Խաչատրյանը:
Պաշտպանական կողմը բողոքարկել է կալանավորելու վերաբերյալ ընդհանուր իրավասության դատարանի որոշումը և առայժմ հայտնի չէ` Վերաքննիչ դատարանը ընդունե՞լ է վարույթ վերաքննիչ բողոքը, թե՞ ոչ: Փաստաբանը տեղեկացրեց, որ վերաքննիչ բողոքում իրենք ապօրինի են համարել կալանավորելու մասին որոշումը և միայն այն պարագայում, եթե Վերաքննիչ դատարանը, այնուամենայնիվ, որոշեց, որ պետք է կիրառել կալանք, ապա այդ դեպքում պաշտպանական կողմը խնդրել է օրենքի թույլտվությամբ կիրառել այլընտրանքային խափանման միջոց` գրավ: Փաստաբանն ասաց, որ գրավի ինչքան չափ որոշի դատարանը, այդքանն էլ պատրաստ են վճարել:
«Ստի ոտքը կարճ է. եթե Տիգրանը մարդուն չի խփել ու նրան սովորեցնում են, ասում են` արի ասա, որ Տիգրանն է խփել...էդքանն է ուղղակի ստի ոտը: Պարզ եմ ասում` երեք ամսից ավել է, ոչ մեկ չկար, հիմի կարող է գտնեն ավելի սուտ խոսացող ևս մի քանի հոգու, ովքեր կերդվեն իրենց թանկագին մայրիկների անունով, որ իրենք են տեսել, որ Տիգրանն է հարվածել: Ամբողջ լրատվությունն ասում է, որ երկու եղբայրներ են եղել, բայց հիմա իրենք էլ են հասկանում, որ իրենց ապացույցը շատ թույլ է, մանավանդ փսիխապատ անձնավորության տված ցուցմունքի հիման վրա 20 տարեկան տղա են ապօրինի կալանավորում»,- կարծիք հայտնեց փաստաբան Մելքոնյանը:
Մեր հարցին, թե իր մատնանշած «փսիխապատ անձնավորությունը» նկատի ունի գործով տուժող Հարություն Զաքարյանի՞ն, Մելքոնյանի պատասխան վկայակոչեց բժշկական մասնագիտական եզրակացությունը, որի համաձայն, Հարություն Զաքարյանը ճանաչվել է «փսիխապատ»:
«Այդ բժշկական փաստաթղթում հենց բժշկական տերմինոլոգիայով նշված էր հենց փսիխապատ: Ես բնավ որևէ մեկին վիրավորելու ոչ ցանկություն ունեմ, ոչ միտում ունեմ, բայց եթե էս պահին կա նման պաշտոնական եզրակացություն, որ անձը փսիխոպատ է, որի հիման վրա վերջնականապես ազատված է զինվորական ծառայությունից` հաշվառումից հանվելով, ես ի՞նչ պետք է ասեմ», -նկատեց Մելքոնյանը:
Մեր դիտարկմանը, թե իր պաշտպանյալ Տիգրան Խաչատրյանը ևս զինվորական ծառայություն չի անցել, Մելքոնյանը արձագանքեց, որ Տիգրան Խաչատրյանը չի ազատվել զինվորական ծառայությունից և գտնվում է տարկետման մեջ:
«Դրանք տարբեր բաներ են: Իմ պաշտպանյալը պատրաստ է ծառայել բանակում: Եթե պարզվի այս ամենը և ապացուցվի, որ Տիգրանը կապ չունի այդ ամենի հետ, եթե բժշկական հանձնաժողովը պարզի, որ Տիգրանն ապաքինվել է, ապա նա առաջին իսկ հնարավորության դեպքում կգնա ծառայելու` այնտեղ, որտեղ կտանեն ծառայելու: Տիգրանը Գորիսի Երկրապահ կամավորական միության երիտասարդ խմբի ղեկավարն է և Տիգրանը բանակից չի խուսափի: Դա վստահ եմ ասում», -հավելեց փաստաբանը:
Գորիսի «Սդղի գյո» կոչվող տարածում մայիսի 2-ին տեղի ունեցած վիճաբանության, այնուհետև ծեծկռտուքի հետևանքով վնասվածքներ էին ստացել Հարություն և Մուշեղ Զաքարյան եղբայրները: Ստացած վնասվածքներից Հարություն Զաքարյանի մեկ աչքը այժմ չի տեսնում, նա, ըստ որոշ տեղեկությունների, հինգ անգամ վիրահատվել է: Զաքարյան եղբայրները ճանաչվել էին տուժող: Գործով բացի Տիգրան Խաչատրյանից մեղադրյալներ են նաև 6 անձինք, որոնցից մեկը մարզպետ Սուրիկ Խաչատրյանի եղբայրն է` Աղալարը, իսկ մյուսը նրա որդին` Մայիս Խաչատրյանը: Վերջինը, ի դեպ, հետախուզման մեջ է: Տիգրան Խաչատրյանին մեղադրանք է առաջադրվել ՀՀ Քրեական օրենսգքրի 112 հոդվածի հատկանիշներով` մարմնական ծանր վնաս հասցնելը:
Հարակից հրապարակումներ`
Տիգրան Խաչատրյանը իրականության զոհն է. Փաստաբանը մանրամասներ է ներկայացրել
Սուրիկ Խաչատրյանի որդուն կալանավորելու միջնորդություն է ներկայացվել դատարան
Զաքարյանները պնդում են, որ Սուրիկ Խաչատրյանի եղբոր մեղադրանքը պետք է խստացվի
Սուրիկ Խաչատրյանի որդին ձերբակալվել է (լրացված)
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
