Ձեր վստահելի աղբյուրը

«Անցած տարվա հետ համեմատած` հիվանդությունների ավելացում է գրանցվել շոգի հետ կապված»,- լրագրողների հետ հանդիպմանը հայտնեց ՀՀ առողջապահության նախարարի տեղակալ Սերգեյ Խաչատրյանն՝ ընդգծելով որ իրավիճակը վերահսկվում է:

ՀՀ ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանն էլ նշեց, որ շոգ եղանակին մարդու օրգանիզմի վրա հիմնական երկու կարևորագույն գործոն են ազդեցություն ունենում՝ ուլտրամանուշակագույն ճառագայթները և ջերմաստիճանի բարձրացումը:

«Դիմում ենք բնակչությանը ժամը 12-17-ը հնարավորինս խուսափել արևի ուղիղ ճառագայթներից, ստվերում լինել: Ջերմաստիճանի բարձրացման նկատմամբ հատկապես ռիսկային են համարվում երեխաները, հղիները, ծերերը, քրոնիկ հիվանդություններով տառապողները»,-ասաց Ա. Վանյանը:

Մասնագետը հորդորեց օրվա ընթացքում մինչև 3 լիտր հեղուկ օգտագործել. «Օգտագործել մեր ավանդական թանը, մածունը, սովորական ջուր շատ խմել, որի հետ շատ ավելի լավ է օգտագործել մեկ կտոր կիտրոն, ինչպես նաև թեյ ըմպել: Պետք չէ չարաշահել շաքար և կոֆեին պարունակող հեղուկները: Արևի ուղիղ ճառագայթների տակ գտնվելու դեպքում պետք անպայման կիրառել գլխարկ, հովանոց, արևային ակնոցներ»:

Վանյանը նաև անդրադարձավ այս շրջանում ի հայտ եկող մրսածության հիվանդություններին, որոնք հիմնականում սառը և տաք միջավայրը փոխելու գործոններից են առաջանում:

Ինչ վերաբերում է վարակիչ, հատկապես աղիքային վարակիչ հիվանդություններին այս շրջանում, նա նշեց, որ շոգ եղանակը նպաստավոր պայմաններ է ստեղծում դրանց տարածման համար` այս շրջանում` օրինակ`  տարածվում են հիմնականում ճանճերի միջոցով:

«Պետք է զերծ մնալ արագ փչացման ենթակա սննդամթերքները, բակերում և փողոցներում վաճառոմերից  գնելուց: Զերծ մնալ կրեմային հրուշակեղենից, անգամ եթե դրանք ձեռք են բերվում սառնարաններից»,-ասաց ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրենը:

ՀՀ գյուղատնտեսության նախարարության Սննդամթերքի անվտանգության պետական ծառայության սննդամթերքի արտադրության վերահսկողության բաժնի պետ Վահե Դանիելյանն էլ առաջնային համարեց անձնական հիգիենայի կանոնները պահպանելը:

«Ավելի քան քսան օր է ՍԱՊԾ-ն ուսումնասիրություններ է կատարում ճամբարներում, հյուրանոցներում և այլ հանրային վայրերում գտնվող սննդի կետերում»,-հայտնեց Դանիելյանը:

Լրագրողների հարցին, թե ինչու է ուսումնասիրություն կատարվում գրանցված դեպքերից հետո, նա պատասխանեց. «Կա թյուր կարծիք, որ մենք մեր ուսումնասիրությունները կատարում ենք միայն գրանցված դեպքերից հետո: Մինչև դա էլ ենք պլանային ստուգումներ անում: Սակայն լինում են դեպքեր, երբ սնունդը նորմալ վիճակում տեխափոխվում է սննդի կետ, սակայն այս եղանակին հասցնում է դառնալ ոչ պիտանի»:

Նախորդիվ`
Ինչից խուսափել, որտեղից գնել, ինչպես պատրաստել, որ սնունդը չվնասի