Ձեր վստահելի աղբյուրը

«ԱՎԾ-ի ամփոփումը ցույց է տալիս, որ 2015 թվականի առաջին 6 ամիսների համար տնտեսական ակտիվության ցուցանիշը կազմել է 4,2 տոկոս, այսինքն՝ մենք ունենք տնտեսական աճ, թեև սա տնտեսական աճի ցուցանիշը չէ, այն կլինի ավելի ուշ՝ սեպտեմբերին»,-կառավարության նիստում այս մասին հայտարարել է փոխվարչապետ Վաչե Գաբրիելյանը:

Նշենք, որ Ազգային վիճակագրական ծառայությունը հրապարակել է երկրի տնտեսության աշխատանքի վեց ամսվա արդյունքները: Գործադիրի անդամներին դրանք ներկայացնելու համար նիստը վարող վարչապետ Հովիկ Աբրահամյանը խոսքը տվել է Վ. Գաբրիելյանին:

«Տնտեսական ակտիվության ցուցանիշը ցույց է տալիս այն ուղղությունը, որով գնում ենք, և կարող ենք վստահաբար ասել, որ տնտեսության գրեթե բոլոր հատվածներում կա դրական առաջընթաց: Մասնավորապես, արդյունաբերական արտադրանքի ծավալն աճել է 5,1 տոկոսով: Այս տարվա սկզբից մենք ունեինք էներգետիկայի արտադրության որոշակի խնդիր, որը դեռևս 100 տոկոսի չէր հասել, սակայն արդեն էներգետիկայի ոլորտում ևս ունենք 100 տոկոսից ավելի արտադրանք: Բնականաբար, ամենամեծ աճը, ինչպես բոլորը տեսել են, առկա է գյուղատնտեսության ոլորտում, և այս տեսակետից կարելի է նշել, որ հատկապես բուսաբուծության ոլորտում ունենք բավականաչափ մեծ զարգացումներ»,-ասել է փոխվարչապետը:

Նրա խոսքով, երեկ անցկացված խորհրդակցության ժամանակ ՋՕԸ-երի ներկայացուցիչները նշում էին, որ կա լրացուցիչ ջրարբիացման մեծ պահանջարկ:

«Դա նաև նշանակում է, որ լրացուցիչ հողատարածքներ են մտել շրջանառության մեջ և գյուղատնտեսության ոլորտում մենք ունենք ոչ միայն բարձր բերքատվություն, որը կապված է եղանակային պայմանների հետ, այլև հողօգտագործողների կողմից ավելի մեծ օգտագործման պահանջ»,-ասել է կառավարության ղեկավարի տեղակալը:

Շարունակելով ներկայացնել ԱՎԾ հրապարակած տվյալները, Վ. Գաբրիելյանը նշել է, որ շինարարության ծավալը ևս 0.6 տոկոս աճ է արձանագրել:

«Սակայն շինարարության ծավալում կուզեի նշել մի ուրախալի փաստ. վերջին տարիների մեր շինարարության ծավալի անկման հիմնական գործոններից մեկը բնակչության հաշվին կատարվող շինարարության նվազումն էր, իսկ այս տարի մենք առաջին 6 ամիսների ընթացքում ունենք բնակչության հաշվին կատարվող շինարարության աճ, ինչը ևս ցանկալի դրսևորում է»,-ասել է նա:

Վ. Գաբրիելյանի խոսքով, միևնույն ժամանակ, միջին ամսական անվանական աշխատավարձը ևս աճել է 10,8 տոկոսով. «Ցանկանում եմ նշել, որ եթե համեմատենք գնաճի հետ, որը կազմել է 5,1 տոկոս, դա նշանակում է, որ աշխատավարձերի աճը թե մասնավոր, թե պետական հատվածներում գերազանցում է գնաճի աճին 12-ամսյա կտրվածքով: Եթե նայենք անգամ վերջին ցուցանիշները, որոնք վերաբերում են 2015 թվականի հունիսին, որտեղ մասնավոր հատվածի աշխատավարձերի ամենափոքր տարբերությունն ունենք անցյալ տարվա հունիսի հետ, անգամ այդ պարագայում աճը 5,6 տոկոս է, ինչն ավելի է, քան 5,1 տոկոս»:

«Բնականաբար, շատ հարցեր են հնչում, որ եթե կա տնտեսական աճ, ապա ինչու դա չի երևում առօրյա կյանքում: Ցանկանում եմ վստահեցնել, որ դա առօրյա կյանքում երևում է, ուղղակի դրա երևալը կապված է մի բանի՝ մասնավոր տրանսֆերտների նվազման հետ: Բնակչության որոշ հատվածի գնողունակությունը նվազում է, և դա առաջին հերթին անդրադառնում է մանրածախ առևտրի վրա, ինչի ազդեցությունն ամենաակնհայտն է, որ քաղաքացիները տեսնում են: Սակայն այն աճը, որ հիմնականում կա արդյունաբերության մեջ, մասնավորապես, հանքարդյունաբերությունում ունենք շուրջ 34 տոկոսանոց աճ՝ միջազգային շուկայում պղնձի գների նվազման պայմաններում»,-ասել է փոխվարչապետը:

Շարունակելով խոսքը, Գաբրիլյանը նկատել է, ունենք գյուղատնտեսության աճ, ինչը նույնպես նշանակում է ֆիզիկական ծավալների մեծացում:

«Այդ պարագայում, երևույթները, որոնք երևում են առաջին հայացքից և անմիջապես սպառողին տեսանելի չեն, ունեն տարբեր զարգացումներ: Երբ այս զարգացումները համադրում ենք, տեսնում ենք, որ այնուամենայնիվ կա տնտեսական աճ և այդ պայմաններում որոշակիորեն պահպանվում է նաև աշխատավարձերի դրական դինամիկա: Մի փոքր նվազում կա զբաղվածության մեջ՝ 1 կամ 2 տոկոսային կետով, սակայն դա ևս ունի սեզոնային բնույթ, որովհետև երբ դիտարկում ենք տարեկան թվերը և նախորդ տարվա առաջին եռամսյակի դինամիկան, ապա գալիս է 1,-1,5 տոկոսի տարբերություն:
Ամփոփելով, կարելի է բավական լավատեսորեն և հավատով նայել, քանի որ այդ պարագայում, երբ անգամ դրսից եկող տրանսֆերտների և գնողունակության կրճատման պայմաններում շինարարության մեջ ունենք բնակչության հաշվին տեղի ունեցող շինարարության աճ, վկայում է տնտեսական աճի և ապագա կարգավորվող եկամուտների որոշակի վստահության մասին: Այս առումով, խիստ կարևոր է այս դրական ազդակները փոխանցել հասարակությանը, քանի որ արդեն առկա են առողջ զարգացման միտումներ և հուսով ենք, որ դրանք ավելի մեծ արձագանք և արդյունքներ կտան արդեն տարվա երկրորդ կեսին»,-ասել է նա:

Կառավարության տեղեկատվության և հասարակայնության հետ կապերի վարչության փոխանցմամբ, վարչապետ Հովիկ Աբրահամյանը նախարարությունների և գերատեսչությունների ղեկավարներին հանձնարարել է կիսամյակի ցուցանիշների դրական ազդակը մամուլի միջոցով փոխանցել հանրությանը:

Նախորդող հրապարակումներ՝
Հայաստանը կարո՞ղ է խուսափել տնտեսական անկումից
Տնտեսական ակտիվության ցուցանիշը աճել է 3,8 տոկոսով