Ձեր վստահելի աղբյուրը

«Շրջանառության հարկի մասին» օրենքի կիրառումից հետո փոքր և միջին ձեռնարկությունները կհայտնվեն կոլապսի մեջ: Այս մասին այսօր լրագրողների հետ հանդիպման ժամանակ ասաց ՓՄՁ ներկայացուցիչ Արսեն Արզանյանը:

Իրականում, ըստ նրա, տեղի է ունենալու ոչ թե հարկային բեռի նվազեցում, այլ՝ ավելացում:

Հիշեցնենք, որ հուլիսի 1-ից ուժի մեջ է մտել «Շրջանառության հարկի մասին» օրենքը: Ըստ այդմ՝ շրջանառության հարկի շեմը հուլիսի 1-ից կլինի 115 մլն. իսկ անվանական դրույքաչափը առևտրական գործունեություն իրականացնողների համար կդառնա 5%, սակայն հարկ վճարողները հնարավորություն են ստանում նվազեցնել` հաշվանցել տվյալ հաշվետու ժամանակաշրջանի համար հաշվարկված շրջանառության 5% հարկի գումարը: Հարկի գումարը նվազեցվում է տվյալ հաշվետու ժամանակաշրջանում վաճառքի նպատակով ձեռք բերված` երկկողմանի հաստատված հաշվարկային փաստաթղթերի հանրագումարի (ներառյալ անուղղակի հարկերը) 4%-ը կազմող գումարի չափով: Նշված եղանակով հաշվարկված գումարի այն մասը, որը չի նվազեցվել տվյալ հաշվետու ժամանակաշրջանի հարկի գումարից, կարելի է նվազեցնել հետագա հաշվետու ժամանակաշրջանների համար հաշվարկվող հարկի գումարներից:

Ա.Արզանյանը նշեց, որ արդեն 1,5 ամիս է աշխատում են այդ դրույքաչափով և արդեն տեսնում են, թե օրենքի կիրառումը ինչ խնդիրներ է առաջացնում:

«Կարծում եմ, որ առաջիկայում մեծ թվով ՓՄՁ-ներ կփակվեն, քանի որ 5 տոկոս հարկը ՓՄՁ-ների համար մեծ գումար է: Երբ երեք ամիս հետո սկսվեն վճարումները, այդ ժամանակ արդեն կհասկականք, թե ինչ վիճակում ենք հայտնվել»,- ասաց նա:

Նա գտնում է, որ առևտրի ոլորտում գործունեություն իրականացնող տնտեսվարող սուբյեկտների համար շրջանառության հարկի դրույքաչափը 3,5 տոկոսից բարձրացվեր 5 տոկոսի, ապա նման խնդիր չէր առաջանա, բայց երբ 1-ից է բարձրացվում 5 տոկոսի, ապա ակնհայտ է, որ ՓՄՁ-ները լուրջ խնդրի առաջ են կանգնելու:

«Մենք առաջարկում ենք լինի շրջանառության հարկի մասին օրենքը՝ 1 տոկոսով, եթե մարդը հնարավորություն ունի փաստաթղթավորվելու, և մնա հին օրենքը՝ 3,5 տոկոս շրջանառությամբ։ Ձեռնարկատերը ինքը որոշի` ինչպես աշխատել»,- նշեց Ա.Արզանյանը:

Նա նաև նշեց, որ օգոստոսի 13-ին ՀՀ կառավարության շենքի դիմաց ՓՄՁ ներկայացուցիչները պատրաստվում են բողոքի անցկացնել՝ ընդդեմ «Շրջանառության հարկի մասին» ՀՀ օրենքի: