Ձեր վստահելի աղբյուրը

Ցեղասպանության ինստիտուտ-թանգարանի տնօրեն Հայկ Դեմոյանը Ծիծեռնակաբերդի հարևանությամբ գտնվող Մարզահամերգային համալիրի վաճառքի մասին իմացել է մամուլից:

Հարցրեցինք, որպես տարածքում տեղակայված թանգարանի տնօրեն, այդ տարածքի մեծ մասի պատասխանատու՝ Դեմոյանի հետ համալիրի վաճառքի վերաբերյալ որևէ քննարկում եղե՞լ է: Նա Panorama.am-ին ասաց. «Բացարձակապես, ես տեղեկացել եմ մամուլից, որևէ տեղեկություն նախօրոք չեմ իմացել, նույնիսկ հիմա էլ չգիտեմ մանրամասն, թե դա ինչ է նշանակում»:

Համալիրի վաճառքի վերաբերյալ կառավարության որոշման մասին Դեմոյանը ձեռնպահ է մնում որևէ մեկնաբանություն անել.
«Ես գերադասում են հիմա լռել, որովհետև շոշափելի որևէ բան չկա, որի հիման վրա մենք քննադատենք, խոսենք կամ չգիտեմ՝ հայրենսաիրական ձևակերպումներ տանք: Սպասենք, տեսնենք՝ իրականում դա ինչ է իրենից ներկայացնում, որից հետո կարձագանքենք»:

Հիշեցնենք, որ հինգշաբթի կայացած կառավարության նիստում ՊՆ-ին պատկանող Մարզահամերգային համալիրը 30 մլն դոլարով վաճառվեց «ՆՏԱԱ ԻՆՎԵՍՏՄԵՆՏ ԳՐՈՒՊ» սահմանափակ պատասխանատվությամբ ընկերությանը (հասցեն` ՀՀ, ք. Երևան, Հր.Քոչարի փ., շ. 22/15, Արաբկիր 0012): Ռեգիստրում այդ ընկրությունը գրանցվել է մի քանի օր առաջ՝ հուլիսի 20-ին: Մի քանի լրատվամիջոցներ այցելել էին նշված հասցեով, փակ դռան հետևից մի կին ասել էր, Արմեն Գևորգյանը տանը չի: Նշենք, որ Ռեգիստրում որպես ընկերության հիմնադիր նշված է Արմեն Զավենի Գևորգյանի անունը:

Վաճառքի վերաբերյալ փաստաբան Կարեն Մեժլումյանը ֆեյսբուքյան իր էջում գրել է.
«Բայց մեր կառավարությանը հալալա.
10.2 մլրդ դրամ պարտքի դիմաց համալիրը վերցրեց, 30 մլն դոլարով (14.4 մլրդ դրամ) վաճառեց։ Պլյուս 70-100 մլն դրամի ներդրում պետք է կատարվի։
Էն ժամանակ հողը 20 հա էր, հիմա՝ 10։
2005 թ-ին ԲԱՄՕ-ն համալիրի համար վճարել էր 2.6 մլրդ դրամ (կեսից շատը Հայաստան համահայկական հիմնադրամին) և պարտավորվել էր կատարել 4.3 մլրդ դրամի (այն ժամանակ մոտ 10 մլն դոլար) ներդրում»:

Հիշեցնենք, որ անցած տարի օգոստոսի 21-ին կառավարության որոշմամբ համալիրը հանձնվեց ՊՆ-ին: Այն ժամանակ այսպես բացատրեցին. «Կառավարության որոշումը պայմանավորված է «Կարեն Դեմիրճյանի անվան մարզահամերգային համալիր» ՓԲԸ բյուջետային վարկի պարտքի (ավելի քան 10 մլրդ ՀՀ դրամ) եւ նախապես վճարված պետական տուրքի գծով դատական ծախսի (ավելի քան 205 մլն ՀՀ դրամ) բռնագանձման հարկադիր կատարման վարույթի շրջանակում սնանկության գործով ՀՀ ֆինանսների նախարարության ծանուցման հիման վրա Դատական ակտերի հարկադիր կատարման ծառայության կողմից 2014թ. օգոստոսի 14-ից հայտարարած՝ անշարժ գույքի հերթական էլեկտրոնային աճուրդը գնորդ չլինելու հիմքով չկայանալու եւ պարտքի դիմաց ավելի քան 10 մլրդ դրամ ընդունման մասին հարկադիր կատարողի առաջարկով»:

Համալիրի վաճառքի վերաբերյալ կառավարության որոշման՝ ներդրումային ծրագրի վերաբերյալ հավելվածում նշվում է.
««ՆՏԱԱ Ինվեստմենտ Գրուպ» ՍՊ ընկերությունը նպատակ ունի Կ. Դեմիրճյանի անվան մարզա-համերգային համալիրի ձեռք բերման և հարակից տարածքի կառուցապատման միջոցով իրականացնել խոշոր ներդրումային ծրագիր, որի ընդհանուր նկարագիրը հետևյալն է.

1. վերանորոգել Կ. Դեմիրճյանի անվան մարզա-համերգային համալիրի շենքը:
2. նախատեսվում է նաև իրականացնել կառուցապատում և ստեղծել ընտանեկան ուղղվածության համալիր կենտրոն, որը առաջինն է ոչ միայն Հայաստանում, այլև` տարածաշրջանում, որը ներառելու է հյուրանոցներ, փակ ջրաշխարհ, համերգային դահլիճներ, հանդիպումների սրահներ, ռեստորաններ, խանութներ և խաղատուն:
Հյուրանոցներն ունենալու են 350-ից ավելի ընտանեկան ոճի սենյակներ: Փակ ջրային ատտրակցիոնը ունենալու է ավելի քան 18.000 քմ մակերես, աշխատելու է 12 ամիս:
Ծրագիրը նախատեսվում է իրականացնել առավելագույնը 4 տարվա ընթացքում:
Ծրագրի ընդհանուր ծախսերը` ներդրումների չափը, գերազանցում է 100.000.000 ԱՄՆ դոլարը, որը կճշգրտվի համապատասխան նախագծերը հաստատվելուց հետո, սակայն հաստատապես չի նվազի նշված չափից: Համապատասխան դրամական միջոցները ներգրավվելու են օտարերկրյա պետություններից»:

Նախորդող հրապարակումներ՝

Մարզահամերգային համալիրը վաճառվեց
Մարզահամերգային համալիրի վաճառքի շուրջ հարցերն ու մտահոգություններն ավելանում են
Նորից կվերածեն ինչ-որ անճոռնի մի կառույցի. Կորյուն Գրիգորյանը ՄՀՀ-ի մասին